《突然有條女同我同居》(冇甜): 56

「...吓？」，佢望落有啲詫異。

「嗯？」，唔通係某啲禁忌？

「...咁又係嘅，你對學校啲謠言不嬲都無興趣。」，佢一臉理所當然

「紅眼惡魔呢，就係一個頭髮同瞳孔都係紅色嘅超級靚仔，身高好似有差唔多米九，性格孤僻，好似無朋友，但冷峻嘅外貌吸引咗好多女仔，不過好似已經有女朋友。」，阿龍好難得一本正經咁講。

「咁關惡魔咩事？」，我有啲不解。



「因為所有人都話企係佢隔離好有壓逼感，又高大，所以好多人都驚佢。」

「其實覺得你同佢某程度上都幾似呀。」

「嗯嗯！」，愛盈突然點頭讚同。

「邊忽似...」

「陰沉，又冷冰冰。」，阿龍用一個理所當然嘅表情回答。



「嗯嗯嗯！」，愛盈繼續表示認同。

「不過睇嚟佢存在感都幾低，我讀咗三年都未見過佢。」

不過紅色瞳孔嘅人我反而係街見過。

「呢個好明顯係你問題啦...」，阿龍一臉無奈。

「白愁陽。」，愛盈突然講出一個名，睇嚟係回答我頭先嘅問題。



「你又知嘅？」，我望住佢問。

「啲朋友之前講架，佢哋好似好鐘意佢，不過我無興趣～因為我淨係...」，愛盈突然唔講嘢，而且塊臉好似有啲紅。

「嗯？」

「淨係對你...有興趣...」，臉頰泛紅嘅佢望住地下細聲咁講，係陽光嘅照射下，佢嘅美貌格外動人，令我嘅心跳好似失咗控咁。

「咳...唔阻你哋談情說愛喇，走先。」，阿龍迅速咁離開咗班房。

「返屋企喇，你今晚想食咩？」，我摸住佢個頭講，呢個動作已經就嚟要變成習慣。

「你整咩我食咩～」

「好～」，我繼續摸佢個頭，呢種感覺...真係好幸福。



「多謝你。」，我錫咗佢額頭一下，然後微笑道。

「做...做乜...」，佢塊臉越嚟越紅。

「無，返去喇。」，我邊講邊執書包。

我而家...望落應該笑得好開心，真係...呢個女仔嘅魔力真係大。

係返屋企嘅途中。

「點解你今日會問果個白愁陽嘅嘢嘅？」，愛盈臉上寫滿咗「我很好奇」。

係喎...點解我會對一個男人咁有興趣嘅？



「純粹係好奇。」

「難得喎～」，佢繼續搖晃拖住我嘅果隻手。

...

某棟大廈嘅天台上，一個紅色頭髮嘅男人係度用紙巾捽鼻。

「最近係咪凍咗...點解我係咁係度打乞痴嘅...」，佢望住佢嘅左手邊講。

...