「Go~go~」,愛盈拖住螢螢興奮咁行入商場。

「你真係ok呀嘛?」,阿龍係我旁邊問。

「無...嘢...都唔係好多人啫...」,我微笑道。

點解星期六會有咁多人...而且耳邊充斥住一堆普通話...

我同阿龍一直係後面跟住興奮嘅兩人,只見愛盈佢哋突然行入一間奶茶舖。



正當我哋諗住跟上去果陣,有個男人突然撞咗埋嚟。

「丟!NMSL!」,佢講英文字嘅口音有啲奇怪。

聽到未聽過嘅詞彙,我即刻向阿龍求助。

「佢講咩?」,我細聲問佢。

「NMSL...老母死了?」,佢作出推測。



「嗯...節哀順變,好好珍惜眼前嘅其他人。」,我嘗試安慰佢,雖然我唔識安慰人...

只見眼前嘅男人對我哋舉起中指之後就急急腳咁離開,睇嚟係諗起啲傷心事。

「我想打鑊佢...」,阿龍抱怨道。

「佢可能只係太過傷心啫。」,我用平淡嘅語氣講。

不知不覺,我就行到咗愛盈嘅旁邊。



「嗯嗯嗯嗯嗯?{你哋咁慢嘅?}」,佢邊飲邊講。

「啱啱...安慰咗一個傷心嘅人,雖然好似失敗咗...」,我尷尬咁講。

「吓?」,愛盈滿臉疑惑。

「啱啱有個男人同我哋講NMSL,但唔知係咪講錯嘢,所以佢嬲爆爆咁走咗。」,阿龍幫我回答。

「佢係鬧緊你哋...」,螢螢滿臉無奈咁講出佢今集第一句對白。

「...我無聽過果個詞語...」,我充滿困惑。

「芝麻人係咁...你都係唔好知好啲。」,愛盈苦笑道。

之後我哋就去咗一間賣衫鋪到行,入到去之後我係旁邊等候愛盈。



然而有一個望落只有二十歲嘅男人鬼鬼祟祟咁行到愛盈旁邊,拎部電話出嚟然後故意咁整跌佢,前鏡頭正正對住愛盈裙底。

正當佢諗住執返起部電話果陣,我撘住佢膊頭,然後係佢耳邊問道:

「你覺得一邊膊頭嘅骨碎曬嘅話要用幾耐先好得返?」,我感覺自己嘅語調有啲陰沉。

「對...對唔住」,佢嘅聲線係到顫抖。

「嚟,笑一笑先。」,我用自己部電話同佢自拍一張 。

自拍完之後我就放開佢,只見佢冇拎返部電話就跑走咗。

我執起地上嘅電話,果然錄影緊...最後我唔小心就扼爛咗佢。



...我係咪又大力咗...

當我諗住睇下愛盈點樣果陣,就發現佢一早就匿咗去螢螢嘅身旁,一臉擔憂咁望住我,眼裏隱約有點淚光。

我行過去抱住佢微微顫抖嘅身軀。

「已經...無事喇。」,我溫柔咁講。

「...多謝你...」,佢嘅聲線比起平時更加柔弱。

「好彩我無激嬲過希仔...」,阿龍係旁邊講。

休息咗一陣之後,我哋就繼續行,亦無特別嘢發生。

夜晚九點,我同愛盈終於都返到屋企。



「你沖涼先定係我沖涼先?定係...一齊沖?」,佢邪笑住問。

「你沖先。」,我輕輕咁拍一拍佢個頭。

「係~」,之後佢就攞衫入廁所。

「呀!!!」,入咗去三秒都無,佢就衝返出嚟。

「做乜?」

「有曱...曱曱曱甴!」,佢一邊講一邊推我去廁所門口。

只見地上真係有隻曱甴係到蠢蠢欲動。



...我唯一比較害怕嘅嘢...係大部份嘅昆蟲...

我默默閂埋廁所道門,轉身同愛盈講:

「都係唔好沖涼住...」

「嗯...」

「喵~喵呀嗚~{等我嚟啦}」,憶奇行埋嚟我哋側邊。

我慢慢打開門比佢入去。

只見佢直接撲上去!然後將隻曱甴當係玩具咁玩...

最後佢張嘴向曱甴咬去!

「嗯?」

我默默咁用手擋住愛盈嘅視線。

「沖涼~」,處理完隻曱甴之後,愛盈就入返廁所。

而憶奇...好似仲係廁所入面,都係抱返佢出嚟...

我好自然咁打開廁所道門,只見愛盈仍然係到除緊條裙...塊臉漸漸變紅。

「sor...sorry」,我極速咁捉返憶奇出嚟然後閂返門。

之後我個腦成晚都不斷係到浮現果個畫面...