星期日,比賽嘅日子。

「其實你唔洗跟嚟都得...」,我望住旁邊打扮得清新可愛嘅愛盈講。

「點得架!我要睇我男朋友打波嘅英姿~嘻嘻~」,佢用理所當然嘅語氣講。

「嗯...咁幫我影啲靚相啦。」,我摸一摸佢個頭。

「其實你緊唔緊張架?」,佢用小狗般可愛嘅眼神望住我。





「呢啲嘢唔會緊張。」,我不作思考直接回答。

傾傾下阿龍佢哋都到咗。

「行得!」,阿龍士氣高昂咁講。

「贏咗有咩拎?」,我抱住手問。

「好似係五舊水...」,阿峰諗一諗之後作出回答。





「咁快快趣趣去拎咗佢跟住返歸。」,我用沉穩嘅語氣講,呢個係我提高士氣嘅方法。

「好好好!!!」,阿龍心中團火感覺越燒越旺。

「一講到籃球就成個人唔同曬咁...」,愛盈同螢螢異口同聲咁講。

架巴士嚟咗之後,經過大約一個鐘嘅車程之後,我哋終於到咗比賽場地內,啟業運動場。

我一邊用紙巾抹乾被口水沾濕嘅右邊膊頭,一邊行過去籃球場。





「你個膊頭咁濕嘅?」,愛盈活躍咁問。

「係囉,我都想知。」,我臉掛微笑咁搣一搣犯人塊臉。

  去到籃球場之後,只見在場只有十幾隊係到...

係我觀察周圍嘅時候,一個男人突然拎住支咪行去中圈入面。

「咳...由於大量參賽者臨時退賽,所以而家場內只淨低十六隊係到,不過唔緊要!咁樣反而仲刺激,所以比賽會繼續開打!」,佢越講越激昂。

「...」,場內冇任何人俾反應佢。

「嚟嚟嚟!熱血啲!!!」,佢嗌到走音。

「...熱血!!!!!」,場內只有阿龍回應佢。





「好!可以準備開始喇!」,講完之後佢就行返去主辦單位嘅位置。

「...我去登記先。」,我同愛盈講,然後獨自行去登記處。

「你好,請問叫咩名?」,負責登記嘅小姐問我。

「....好似未改」,竟然會唔記得改名...

「『好似未改』,隊員係葉正希,王許龍同埋...文清峰!好得喇!」,只見佢係名單上面,一隊叫「好似未改」嘅隊伍旁邊打剔。

...果然係阿龍。

「好~咁俾份賽程表你先!」,佢遞出一張紙俾我。





 我粗略咁睇一睇,只見第一場比賽就係我哋,對上「晏啲俾返錢」隊。