我叫已霧,係傑鳴中學新聞學會嘅副主席,呢個學會除咗每個禮拜一嘅週報之外,日日都係做一啲九唔搭八嘅野。

「霧仔~」,主席一邊攤喺梳化打機一邊嗌我,佢叫古紗花,係大我一年嘅中五師姐,而且仲係級花,不過個人懶到爆,又鐘意點我做嘢。

「嗯?」,因為今日係星期五,所以我一邊較對下個禮拜嘅週報一邊回應佢。

「我突然有個idea!」,佢坐起身,雙眼發光咁望住我。

「又係啲咩呀?」,我繼續較對。





「書包突擊檢查!」

「吓?」,我比佢呢個似乎可行嘅諗法稍微吸引到。

「即係喺週報到印多一頁,用嚟寫一啲學校入面比較多人識嘅人,書包入面有啲咩!」

「又好似唔錯...咁要搵邊個先?」

「嗯...葉正希啦!」,佢諗一諗之後答。





葉正希...用佢嚟做第一個好似唔錯,睇嚟主席佢都唔係完全廢曬...

「好~咁你快啲去搞掂佢啦,我瞓陣先~」,佢講完之後就攤返喺梳化。

我都係收返...

上咗差唔多半日堂之後,我選擇喺第二個小息去搵葉正希,去到佢班房門口,只見佢哋班房入面只係得幾個人,佢坐喺窗邊嘅位置睇緊書,而佢隔離嘅應該就係佢女朋友,喺度瞓緊覺。

我直接行去佢隔離,開始我嘅任務:





「得唔得閒幫手做啲嘢?」,咁樣講係咪有啲無禮貌。

「...好。」,佢竟然爽快答應咗。

「我係新聞學會嘅副主席,想睇下你個書包入面有啲咩特別嘢,然後寫喺週報到,介唔介意?」

佢點一點頭,然後放低本書,再將個書包擺喺枱面。

「...跟住要做咩?」,佢企起身問。

「嗯...我睇下入面有啲咩就得。」

佢嘅書包成個都係全黑色,前面,中間,同背部嘅側面各有一條拉鏈,我小心咁打開佢書包最前嘅一格,只見入面有一幅無鏡片嘅圓框眼鏡,一包紙巾,三條綁頭髮嘅髮繩,同埋...

「M巾?」,我疑惑咁問。





「...預備定比我女朋友,佢成日唔記得嘢。」,佢望一望佢熟睡嘅女朋友再講。

呢個就係花式放閃?

睇完閂返好之後,我就打開中間,最大嘅一格。

...頭先見佢個書包好似都有啲重量,佢可能係個好學嘅人都唔定。

只見入面整齊咁擺好咗幾本教科書同工作紙,佔咗一半嘅空間,然後用一個file隔開咗...

「一堆朱古力?」,我再度疑惑。

「朱古力...好食。」,佢認真咁解釋。





「都...幾特別下...哈...」,我邊講邊拉返好條拉鏈。

最後就係背部側面,擺到嘅嘢比較少嘅位置。

拉開拉鏈之後,入面淨係放咗一本簿,我拎出嚟睇咗一下,上面佈滿咗密密麻麻嘅文字,之前聽講過佢係一個有出書嘅作者,令我以為佢只係一個比較幸運嘅天才,但估唔到...佢喺背後付出嘅努力,竟然多得可怕...

「嗰本無記錯嘅話係上個禮拜寫。」,佢突然出聲。

「只係一個禮拜...就寫滿曬成本簿?」,我吞一吞口水。

「嗯,好正常嘅事。」,佢用理所當然嘅語氣回答。

諗唔到要點樣回答嘅我,默默咁擺返本簿入去,然後拉好拉鏈。

「唔該曬,要做嘅嘢已經完成咗,你下個禮拜有興趣嘅話就睇一睇週報。」,我微笑一下之後轉身離開,返去學會嘅活動室。





一入到去,主席就一臉充滿好奇咁問我:

「點呀點呀!順唔順利?」

「非常順利。」,我回答道。

「哦~話說葉正希份人點架,我聽人講佢又靚仔又聰明又高大,好多女fans架喎。」,佢趴喺梳化講。

「嗯...幾有趣,而且係個值得尊敬嘅人,同埋幾有魅力。」,我正經咁回答。

「嗯~反正我都係無乜興趣。」,佢一路碌電話一路講。

「話說。」,我望住佢講。





「嗯?」,佢抬起頭望一望我。

「你條裙,小心啲好。」,因為我哋學校女同學嘅校服係水手服嘅關係,所以條裙通常會比較短。

「你...你睇到曬?!」,佢迅速坐起身掩住條裙。

「主席你童心未泯呀。」,我講完之後輕笑一聲,平時比佢蝦得多,而家終於有機會可以報復下。

「衰人!」,佢將梳化上比較硬嘅一個咕臣掉過嚟,精準咁命中我嘅頭部。

痛...