《突然有條女同我同居》(冇甜): 67-校慶篇

「好，今日就上到呢度，無問題嘅話就落堂喇。」，小息鐘響起之後，雲零咁講。

其他大部份人聽到之後都開始離開班房，而當我諗住去個廁所嗰陣，雲零示意我去門口到。

「搵你嘅。」，佢講完之後就行返去教師枱執嘢準備走。

只見門外有兩個女仔喺度，外貌，身形，身高都係一樣，唯獨是髮型唔同，一個係普通馬尾，一個係雙馬尾，應該係雙胞胎嚟。

「咩事？」，我問道。



「因為校慶嗰日突然加咗一個環節，要搵兩個靚仔嚟跳舞，而我哋第一時間就諗到你，所以想請你幫下手！」，雙馬尾講。

「跳舞嘅話...我完全唔識...」，而且無記錯嘅話十一號就係校慶...

「唔緊要啦，我哋相信你學得識架喇，另外我哋想搵多一個同我差唔多高嘅靚仔，有無推介？」，馬尾講完之後就直接喺名單上填咗我個名。

「好似幾得意咁喎，老師參唔參加得?」，雲零突然行埋嚟好奇咁問。

「得！雲零sir嘅話應該都會有好多人鐘意嘅，咁就決定係你哋兩個啦！」，馬尾將雲零個名填埋喺名單上面。



「咁搞掂曬我哋就走先喇～bye～」，雙馬尾好快講完之後，佢哋兩個就極速咁離開。

「...雲零你識跳舞？」，無法拒絕嘅我，只好做好呢個任務。

「嗯?唔識呀。」，佢輕鬆咁講。

「咁我哋點跳...」

「學下就識架啦。」，佢講完之後就走咗返教員室。



「咁啱嘅？我校慶都要同團人跳舞喎。」，愛麗絲經過講。

「哈...辛苦曬。」,我苦笑回答。

無端端又多咗樣嘢做...

放學之後，嗰兩個女仔又過咗嚟，而且仲帶住雲零。

「邊個嚟架。」，愛盈問道。

「搵我去跳舞嘅人。」，我喺食飯嗰陣同愛盈講咗自己要喺校慶跳舞嘅事，佢聽到之後興奮咁話要企最前錄低佢。

「呢四日入面，你同雲零sir每日放咗學之後都要練習呀，加油喇～」，雙馬尾講。

「而家跟我哋落去舞蹈室啦～」，馬尾接住講。



「星期五唔係放假咩?都要練?」，雲零問道。

「係呀～個阿sir仲話可以練成日㖭～」，雙馬尾回答。

「我突然有啲後悔...」，雲零細聲咁講。

落到去舞蹈室之後，愛盈話想睇住我練，所以就喺旁邊拎咗張凳嚟坐。

擺好咗啲嘢之後我就企出去，面對住間房塊鏡。

「話說...我要着住校服練?」，我突然醒起。

「係呀～嗰日要着嘅服裝都係差唔多咋嘛～」，我透過塊鏡嘅反射，見到馬尾回答我。



「係跳咩舞？」，雲零企喺我旁邊問。

「應該就係韓團嗰啲。」，雙馬尾回答。

正當我諗住問個阿sir幾時嚟嗰陣，道門突然被打開，隨後係一個大叔行咗入嚟。

個大叔好似幾熟口面...王戴肅？地球到底係幾細...

「咦hi！估唔到喺到見到你喎～」，大叔對我揮一揮手。

「好～咁而家就開始練習啦！」，佢拍一拍手講，估唔到佢係教跳舞...