「好~咁就開始練唱歌啦!」,大叔講。

「唱...歌?」,我同雲零異口同聲咁問。

「無謂再關心你~我沒資格慰問你~」,唔知邊個嘅電話突然響起鈴聲。

我擰轉身望一望,只見雙馬尾拎起電話:

「喂?係,吓?今...今朝講錯咗?校慶係要搵兩個靚仔表演唱歌,最好就一彈一唱?!好啦...咁我同佢哋講。」





「哈...哈哈...sorry呀,今朝個負責老師同我哋講錯咗,原來係唱歌唔係跳舞...嘻...」,雙馬尾尷尬咁講。

「無所謂啦,反正我識彈琴。」,雲零個樣望落輕鬆咗好多。

「我唔識唱歌,彈琴,跳舞。」,我回答,雖然淨係要唱歌感覺輕鬆咗啲。

「好~咁我睇嚟淨係教唱歌就得喇,話說阿雲零sir彈琴去到幾多級呢?」,大叔和善咁問。

「嗯...我淨係聖誕歌。」,雲零回答道。





「Lonely Christmas?」,大叔笑住咁問。

「We Wish You Are Merry Christmas。」,雲零微笑道。

「咳...咁我都係教埋彈琴會好啲...」,大叔苦笑道。

因為我哋嘅舞蹈室唔知點解有部鋼琴係到,所以大叔就行去琴前坐低。

「咁而家就嚟試一試阿希哥唱歌點樣先啦,求其揀首歌嚟唱下啦。」,大叔望一望我之後問。





「浮誇!浮誇!我覺得佢會幾適合唱呢首。」,愛盈嗌道。

黃愛盈你係咪玩我...

「Ok~咁開始架喇!」,大叔講完就開始彈,我亦迫住要開始唱。

聲嘶力竭咁唱完之後...佢作出評語:

「嗯...我覺得把聲就唔係幾啱唱呢首,不過我覺得用嚟唱洪嘉豪嘅《十號儲物櫃》應該會幾好。」

「而家試下唱一段仔先~」,佢接住講,然後開始彈。

我亦盡量跟上:「舊時~傷心多赤裸 現時開心怎樣過 竭力娛樂 埋首工作  仍為快樂未怕忙~」

隨住我僵硬咁唱咗陣之後,音樂就停低咗,大叔再作出評語:





「好好!就唱呢首啦!」

我望一望雲零,只見佢點頭表示可以。

「...好,就呢首。」,我回答道。

跟住大叔就開始教我唱歌同埋教雲零彈琴,一直教到夜晚七點。

喺走嘅時候,大叔提議同我哋一齊行返去,而雲零就自己撘的士,至於雙胞胎...愛盈話佢哋六點幾就走咗。

「估唔到你會去表演唱歌喎~」,大叔問道。

「因為完全冇機會拒絕...不過總比跳舞好...」,我回答。





「幾好呀,就當係燃燒下青春囉!呢種機會好少有架!」,大叔略帶興奮咁講。

「...好。」,我淺笑回答道。

「不過我都係想聽下《浮誇》呀...」,愛盈忽然講道。

「嗰首唔易唱呀...」,我同大叔異口同聲回答道。

「係~係~」,愛盈可愛咁回答道。

眨眼間...喺幾日嘅勤奮練習後,終於嚟到星期五,亦係最後一日練習,由於放假嘅關係,所以愛盈留咗喺屋企,而我自己一個返學校去揾雲零佢哋練習。

我同雲零喺呢幾日嘅磨練下,已經可以複製到成首歌,流暢咁翻唱出嚟,而且雲零因為太快學完首歌點彈,所以仲順便學多咗幾首陳奕迅嘅歌...

「好~因為你哋都已經可以好靚咁演奏到首歌,咁而家就要投放更多嘅感情落去,先試下代入首歌嘅感受先,可能會有啲難架,慢慢嚟就得。」,大叔喺開始練習之前先講幾句。





「代入...」,我正喺度思索緊,呢首歌所表達嘅感受,再嘗試進入佢嘅角度。

「如果覺得有啲難嘅話,我可以教你地一啲技巧架。」,大叔講道。

「唔使...」,雲零講。

「因為呢個...」,我接住講。

「係我哋嘅專長。」,我哋相視而笑,同時異口同聲咁講。