《突然有條女同我同居》(冇甜): 72

一月十一日，校慶日，或者好聽啲就學園祭。

朝早八點，我已經俾憶奇踩醒咗，都好耐冇試過咁晏先起身...

之後嘅流程都係同平時一樣，刷牙洗臉煮早餐同埋叫醒愛盈。

喺十點半，我拖住愛盈返到嚟學校，只見四圍由有蓋操場去到籃球場嘅攤位已經大致上佈置好曬，唯獨令人擔憂嘅，就係滿佈灰雲嘅天空，感覺一定會落雨...

因為約好咗大叔十一點先要上去搵佢，所以我同愛盈就喺有蓋操場到周圍行下。



「嘩～螢螢嗰到嘅攤位好似好犀利咁喎！」，愛盈佢興奮咁拉一拉我隻手，雙眼發光咁望住前方螢螢同阿龍負責嘅攤位。

無記錯嘅話阿龍都係第一次會喺呢啲攤位到幫手，畢竟以往每年我哋都係三個人喺度無所事事，不過佢應該九成都係俾螢螢拉過嚟幫手。

「我去搵螢螢傾下計，一陣夠鐘過嚟嗌我～」，愛盈講完就過咗去螢螢隔離。

「睇嚟姊妹果然係重要啲...」，我細細聲咁自言自語道。

突然，有人拍咗拍我右邊膊頭，我轉身一望，係一個全身着住純白端正嘅西裝，外貌成熟沉穩嘅男人，而且仲高得可怕...佢可能有兩米都唔出奇。



「唔該...請問街舞隊係幾點表演？」，佢用沉厚嘅聲線禮貌咁問。

「大概係十二點半。」，我保持警戒回答，因為呢個男人...

「哦～唔該曬呀靚仔，我去搵我個女先喇。」，佢微笑一下後就轉身走咗。

呢個男人...有股詭異嘅氣味。

「希，咁早到嘅？」，雲零嘅聲音喺我旁邊傳嚟，只見佢唔知幾時出現咗喺我隔離。



「你做乜喺度嘅？」，我反問返手上拎住一支朱古力味甜筒嘅佢。

「我早咗嚟無嘢好做咪喺度行下，跟住呢支甜筒係啱啱有個學生送俾我，但我又唔係好鍾意食雪糕，你要唔要？呀...不過你一陣要唱...」

「要，要。」，我不加思索咁點頭答應。

「哦？咁俾你。」，佢將支未郁過嘅甜筒遞畀我。

「喂，雲零。」，一個着住暗紅色衛衣喺校服外面，深紅色嘅頭髮自然咁露出咗左邊額頭，而且瞳孔係血紅色嘅男人，一邊飲住右手上嗰盒維他奶一邊行去雲零隔離。

「哦，陽？好耐冇見。」，雲零望一望身高比我高少少嘅男人，仲有佢嘅右手面講。

仔細一睇，佢嘅右手面好似有一道淡淡嘅黑色身影，唔通我...光天化日下撞鬼？

嗰個男人用左手喺袋中拎出兩盒士多啤梨味嘅薄荷糖，然後交俾雲零。



「最多咪兩三日...嗯？」，佢俾完嘢雲零之後望一望我，然後向我伸出已經冇拎嘢嘅左手。

「白愁陽。」，佢睇嚟係講緊自己個名。

「葉正希。」，我都伸出左手同佢握一握手，然後回應。

呢個俾人稱為「紅眼惡魔」嘅人，感覺都唔係個壞人。

「喂～羊仔～返嚟幫手喇喂～」，一把女聲喺不遠處傳嚟。

「係喇～」，白愁陽向聲音傳嚟嘅方向回應。

「Bye。」，佢望一望我哋兩個講，然後一邊飲住盒維他奶一邊行過去。



佢盒奶好似都飲咗幾耐...

「雖然佢個樣望落好似有啲惡，但其實係個好人嚟，即係所謂嘅傲驕...掛，呢個係我作為識咗佢幾年嘅師兄感覺到嘅嘢。」，雲零溫柔咁微笑道。

「的確，睇得出。」，我一邊撕開甜筒嘅包裝紙，一邊回答。

小心咁撕開咗之後，正當我充滿期待咁諗住享用嗰陣，一道再熟悉不過嘅聲音傳入我耳中。

黃愛盈迅速咁喺我支甜筒上面咬咗啖。

呀...佢肯定會頭痛。

「嘶...好撚痛呀嗚...」，果然，佢仲要用可憐嘅聲線配搭上粗口。

「嘻...哈哈...抵死...」，我不禁恥笑佢。



最後我換嚟嘅，係連環粉拳。