「咔咯。」

「嗯~?返嚟喇?」,坐喺梳化嘅愛盈放低PS4嘅手掣望向我。

「嗯,我沖完涼之後就去煮晚餐。」,我微笑道。

入到浴室除咗上身衫之後,我望住鏡中反射出嚟嘅自己,啱啱喺外面嘅擦傷,喺返嚟嗰陣已經用能力自愈咗。

我緩緩舉起自己仍然震抖緊嘅雙手,震嘅原因,我自己都唔知係咩。



係因為要殺人,而感到害怕?緊張?定係...興奮?

我思考唔到,因為呢種感覺...就好似係唔屬於自己咁,反而係好似...本能驅使咁樣。

「諗咁多麻煩嘢都無用。」,我緊握下拳頭,然後開花灑沖涼。

不過呢半年都發生咗好多麻煩嘢...咩潛能,組織,仲有今日嘅小丑,感覺全部嘢都仲好漫長...其實我都幾想同愛盈平凡幸福咁生活落去,不過睇嚟現實都係依舊殘酷,而家做到嘅嘢...只有見步行步,同埋...必須要保護好身邊嘅人。

舒暢咁沖完個涼之後,我吹乾個頭之後就行去廚房煮飯,今晚我簡單咁炒咗碟菜,蕃茄炒蛋同埋煎咗幾塊雞胸肉,想盡量健康少少。



「嗯~咁清淡嘅?」,愛盈探個頭入嚟廚房望住啱啱煮完餸嘅我講。

「最近食得太多唔健康嘅嘢喇。」,我裝好兩碗白飯之後,再整個罐罐俾黑白兩貓。

愛盈拎咗兩碗飯同兩碗罐罐出去擺好之後乖乖地咁坐低等我,而我除低圍裙再洗過手之後都出去坐好。

「開飯~」,佢用可愛嘅聲線講,然後夾咗兩舊蛋,一舊落自己碗,一舊落我碗。

望住佢可愛嘅食相,我不禁淺笑:「嗯,開飯。」



感覺每次同黃愛盈喺一齊,煩惱都會自動散去。

食完飯一齊洗好碗之後,愛盈就即刻捉我去梳化坐低,然後輕輕捉住我衫袖,抿嘴講:

「我哋繼續做埋琴晚...未做完嗰樣嘢啦...」

我望一望個鐘,而家已經九點,即係起碼要搞到十二點幾,而聽日十一點先要返到學校準備...

「好啦。」,我講完之後望向愛盈,然後伸出右手,拎起佢隔離嘅電視遙控。

因為我哋最近呢幾晚,每日食完飯之後都會睇幾集Marvel嘅戲先會瞓,而今日終於都睇到Endgame。

一段時間後,電影終於都去到尾聲,只見傷痕纍纍嘅美國隊長,突然聽到右耳嘅小型耳機傳來人聲,摸一摸之後,再次傳來聲音:

`On your left.`



伴隨住背景音樂嘅響起,突然出現於美國隊長後方嘅傳送門,緩緩走出三個人影,分別係奧歌耶,黑豹,同佢妹妹。

「Wakanda Forever.」,  我係心中默唸嘅同時,愛盈含淚咁講。

呢一幕,係我哋兩個最鍾意嘅一幕。

雖然一早已經喺戲院睇過,但再次見到嗰啲驚喜嘅畫面,都仲係會起曬雞皮。

睇曬套戲之後,我伸個懶腰,然後企起身。

「刷牙瞓覺啦,黃...!」,未講完愛盈兩隻字,佢就拉我落嚟坐返低。

「希...」,佢騎上我大髀,用一種誘惑嘅語氣講 。



「做...做乜...」,我吞一吞口水回答。

佢望住我雙眼微笑,然後直接錫埋嚟,佢隨即喺我嘴內展開功勢,最後我哋嘅嘴唇,隔咗一分鐘先再次分開

「呢個係幫你聽日加油,如果聽日你表演得好好嘅話,我再俾第二啲獎勵你...」,佢喺我耳邊用氣音講。

望住同我一樣,塊臉已經紅曬嘅愛盈,我勾起嘴角回答道:

「咁你要好好咁準備定獎勵。」