「你係幾時開始有呢個...潛能?」,唔知係咪因為雲零呢個人總係但住一種比較憂愁又成熟嘅氣味,我竟然冇懷疑過佢會有潛能。

「嗯...年幾兩年前掛,有一晚突然發咗高燒,然後第二朝就變咗咁樣。」,佢一臉平淡咁講。

「所以你嘅能力係可以控制天氣?」,如果佢係同伴嘅話,我絕對會可以安心好多。

同埋佢身上由頭先停咗雨之後,就開始有陣怪怪地,唔識形容嘅氣味...

強大嘅好奇心驅使我去再聞清楚啲,,,



「...你當係啦,應該都差唔多嘅...喂你喺度索咩...」

「磅!」,課室道門突然俾人打開咗。

「你哋搞咁耐到底喺度做...!」,打開門嘅係我親愛嘅女朋友,而我同時開始感覺到而家嘅畫面有幾大鑊,因為我唔知點解㩒住咗雲零嘅兩邊膊頭,而且仲喺度聞緊佢條頸...

愛盈喺衫袋神奇咁拎咗一本簿同一支筆出嚟,然後喺上面飛快咁寫嘢。

[size=100]「滿雲零...警戒名單...嘖...仆街...」,佢邊寫邊講。



「我咩都無做過...」,雲零無奈咁講。

「喂~換好衫就練一練之後去後台喇喂~」,大叔休閒咁行入嚟講。

「好。」,我同雲零回應道,鬧劇亦暫時結束。

簡單咁練咗陣之後,我哋全部人就一齊去到後台準備。

等咗一陣之後,上一 隊表演隊伍嘅音樂慢慢停低,意味住我哋要上台嘅時間終於到咗。



「呼...準備好未?」,雲零以冰冷嘅表情問我,但眼神中仍然無法隱藏佢嘅緊張。

「嗯...」,我亦同佢一樣咁緊張 。