我叫葉正希,廿五歲,職業係作家。

因為今日係情人節,所以我理所當然咁走咗落樓下個公園到觀察下各種情侶,順便買咗盒朱古力返去俾老婆。

一講起老婆,我部電話就開始喺度震,係我可愛嘅老婆打嚟。

「希!煮好飯喇,返到嚟未呀~」老婆軟綿綿又溫柔嘅聲音喺電話入面傳嚟。

「喺樓下。」





「收到~咁我哋擺定嘢等你!」老婆把聲無時無刻都咁有活力。 

「嗯。」我溫柔咁答佢。

上到去之後,準備打開門嘅我突然感慨:「原來都喺度住咗十年有多...」 

「咔!」

道門突然俾人打開咗,隨之而來嘅...





「爸爸!」 係村愛,我五歲嘅女。

「喵!」 然後係憶奇同憶雪。

「老公!」 最後就係黃愛盈,我最愛嘅人。

...

成個故事去到呢度就停咗,我將視線由黃愛盈本簿轉移到佢本人身上,只見佢一早已經伏咗喺枱面上面瞓到流曬口水。





我細細力咁撥開佢額前嘅瀏海,然後喺佢額頭到輕輕一吻。

「喂,黃愛盈。」 我盡量溫柔咁叫醒佢。

「嗯...?」 佢眯一眯眼答道。

「去食情人節大餐。」 

「好!!!!!」 佢即刻坐起身,充滿精神咁答我。

「話說...」我喺行出房嗰陣問。

「嗯?」 佢側一側頭。 

「如果生男仔嘅話...叫葉熹形都唔錯。」 我笑住講。





「你睇咗我本簿?!」 佢驚訝咁問。

「嗯...唔知呢?」 我不禁偷笑。

「嗚...」 佢塊臉瞬間紅曬。