相吻過後,我同愛盈十指緊扣咁行去地下,打算行一陣感受下氣氛就返去。

「你哋慢慢去玩,我仲有嘢做。」,雲零同我講完之後就孭起自己個袋準備離開。

「呀係喇...」,佢突然轉身行返過嚟。

「我今日表演得好開心,希望仲有下次。」,佢講完之後伸出右手,握成拳頭,用佢嗰對從來唔會透露自己真實諗法嘅雙眼望住,但呢刻竟然感覺無比真誠。

「我都好開心,不過要有下次嘅話可能就有啲難...」,我苦笑道,然後伸出左手握成拳頭,輕輕撞落佢嘅右拳到。



「哼,bye~」,佢輕笑一聲,然後轉身離去。

雖然雲零矮我少少,但係當佢每次企喺我身邊,都總會覺得佢高過我好多,佢嘅眼神無論喺咩時候都係咁沉穩冷靜...

「頭先嗰幕真係好似啲少年漫畫,返去可以畫低佢...」,愛盈突然講嘢,打斷咗我嘅思考。

「落去。」,我拖住愛盈行落樓梯。

我哋決定由有蓋操場開始行,行過幾個攤位之後就見到白愁陽。



「喂,要食章魚燒就過嚟買喇喂,唔算貴,又幾好食,抵呀。」,佢毫無感情咁跟住手上嘅稿讀。

「呀痛,搞咩呀你。」,白愁陽咁樣做,所換嚟嘅就係俾佢隔離嘅女仔狠狠咁咬咗佢隻手臂一下。

...咬?

「我哋繼續直行...」,我扮睇唔到咁同愛盈講。

「咦螢螢佢哋喎。」,愛盈指住前面嘅攤位講。



「點解佢哋嘅生意好似慘淡咗咁...」,我講,只見佢哋嘅攤位得一兩個客人,雖然佢哋嘅攤位做嘅係「快速素描」,由阿龍招客,而藝術成績係全級第八嘅螢螢去素描,將客人想要嘅嘢畫出嚟。

「不如我哋去幫手呀?!」,愛盈積極咁講。

「好。」,我望住佢可愛嘅臉容,淺笑回答。

而且愛盈唯獨喺藝術我係完全唔會擔心,因為佢係全級第一。

「喂~我哋嚟幫手喇~」,愛盈拖住我,帶住興奮嘅小跳步行過去。

「全級第一同第二竟然一齊黎幫手同...呢個陣容會唔會太豪華...」,阿龍無奈咁講,順帶一提佢全級排最尾。

「好~開工!」,愛盈喺我隔離坐好之後,興奮咁講。