雖然係話要買禮物俾對方...但到底要買咩好?

希仔佢呢個時候一定係咁諗,而我!黃愛盈作為一個細心體貼又溫柔嘅女朋友,一早就決定好要買咩禮物喇! 

跟住落嚟只要一路直行去到近操場門口嗰間舖頭就得喇...咦嗰度嗰間章魚燒好似唔錯,仲要有個勁靚嘅女仔同埋一個飲緊維他奶嘅男仔,好似係叫做白...白咩咩。 

「唔該我想要一盒章魚燒。」我行埋去講。

「收你二十蚊~」個女仔溫柔咁講。





「廿蚊。」我喺銀包拎咗二十蚊俾佢。

 「嗯。」白咩咩喺我俾完錢之後,眨眼間就將盒章魚燒放到我手上。

佢係幾時整好架...

唔理喇,食物到手!繼續冒險!

之後唔洗兩分鐘,我就到咗目的地。





呢度係一個賣飾品嘅攤位,負責嘅係一個高form嘅師姐。

「我想要呢個呀唔該。」我指住我一早睇中咗嘅禮物。

嗰個師姐隨即將佢小心咁放入一個盒仔入面,然後交俾我。

「二百四十~」

「係!」我將一早預備好咗嘅錢交俾佢。





禮物到手!

「係呢...你覺得...你男朋友點樣呀...?因為而家全校都講緊你哋呢對超sweet嘅情侶,所以我都有啲好奇。」師姐喺我準備走嗰陣突然問我。

「點樣?」而家啲人講嘢咁深奧嘅。

今晚不如同希仔買外賣返去食呀?話說上次食嗰間茶記都唔錯...

「即係...你鍾意佢啲咩...佢有咩優點呀...之類...」

「點解鍾意佢...?因為佢係葉正希囉!」我第一時間諗到嘅答案就係呢個。

唔...我開始有啲肚餓。

「呀...真係有啲深奧呀...」佢尷尬咁笑咗幾聲。





「咁我走先喇~」好想食嘢!