《突然有條女同我同居》(冇甜): 79－希篇

雖然係話要買禮物俾對方...但到底要買咩好？

...點解總感覺背後有股寒氣...

因為未諗好買咩，所以我決定行下睇下有咩適合買俾愛盈。

行咗幾步之後，我見到已經換返校服嘅愛麗絲捱住條柱喺度喘氣。

正當我諗住無視佢繼續直行嗰陣，佢竟然叫停咗我。



「希哥？你喺度做乜？」唔係應該我問你先啱...

「買禮物。」

「...哦～近門口嗰度有個賣飾品嘅攤位呀！我覺得愛盈應該會幾適合帶嗰度嘅嘢。」

「...多謝。」

「呀仲有！一陣間如果你見到馬尾姊妹嘅話，請你千祈唔好同佢哋講我喺呢度呀！」佢講完之後坐低休息。



「嗯...bye。」我向佢所講嘅攤位行。

「omg佢竟然講bye...」愛麗絲細細聲咁講。

就嚟去到愛麗絲所講嘅攤位嗰陣，我不幸咁遇到馬尾姊妹。

「師兄！」佢哋兩個截停我之後一齊講。

「你有冇見過愛麗絲姐姐呀？」雙手攬住奇怪紅色衫嘅馬尾問我。



「...佢啱啱話...今日有啲熱...所以就去咗後面個魚池到游水...」我諗到呢個完美嘅大話。

「嘻！我今日一定要俾佢cos惠惠！」拎住一頂類似係法師帽嘅雙馬尾講。

惠惠?

...咁似海洋公園啲熊貓或者鱷魚嘅名。

即係愛麗絲要cosplay紅色嘅法師熊貓...或者鱷魚？

「呀係喇！呢個送比你同盈師姐影相呀！」雙馬尾講完之後送咗一對貓同狗耳嘅頭箍比我。

「...多謝？」

「係咁先喇！byebye師兄！」佢哋兩個講。



「嗯...」

今次我終於到咗愛麗絲講嘅攤位，而且一去到就睇中咗適合送比愛盈嘅嘢。

「我想買嗰個，唔該。」

「好！你係希哥呀嘛，而家應該全校都識你同你女朋友。」負責呢個攤位嘅女仔收咗錢之後講。

「嗯。」

「係喇...你鍾意女朋友啲咩呀？」佢又問，同時幫我包裝一下禮物。

「因為佢係黃愛盈。」我即刻回答，如果有人問愛盈呢個問題，佢嘅答案應該都係同我一樣。