《突然有條女同我同居》(冇甜): 80－終

都差唔多夠時間，去阿峰個攤位嗰邊搵下愛盈。

阿峰同飾品攤位嘅距離好近，只係行咗十幾秒就到。

「佢果然仲未到...」我行到阿峰隔離講。

「又同你條女喺度玩咩遊戲呀？」阿峰望一望我。

「話說要唔要買返支潤滑油，見你係我兄弟，計你一支55蚊，買一送一！」佢突然喺身後拎咗支潤滑油俾我。



「原價幾多?」我望住佢身後存貨多好似成座山咁嘅潤滑油問。

我仲以為佢淨係搞抽獎...

「呃...40...一支...」佢尷尬咁答。

「我係邊個！」突然有人係我背後掩住我對眼。

「黃愛盈。」我無奈咁回答。



「回答正確！朕賞你一個攬攬！」佢講完之後用力咁由我背後攬住我。

「謝皇上...」我無奈笑道。

「咁你諗唔諗住買返支潤滑油呢，你哋夜晚做嗰陣都可以用架。」阿峰繼續sell。

「嗯?」我同愛盈反應一樣。

「做...腿部按摩!」佢兜。



「抽咗獎再諗下。」我遞咗兩張抽獎卷俾佢。

佢隨即係隔離拎咗一個箱仔出嚟示意我去抽。

「你抽先?」我問一問仍然攬住我嘅愛盈。

「好！」佢鬆開手回答道。

「我好歹都係抽獎大師嚟...」佢伸手入個箱，然後拎咗張紙仔出嚟，見到張紙上面寫嘅嘢之後即刻變得面無表情。

上面寫住:「謝謝惠顧。」

「到我。」我求其喺個箱入面拎咗張紙仔出嚟。

「果汁糖一盒...」愛盈幫我讀出上面寫嘅嘢。



「呢度一盒果汁糖...加十蚊可以買多枝潤滑油喎。」阿峰再sell。

「你好煩...」我一邊講一邊喺銀包到拎十蚊俾佢。

「呀～多謝多謝！」佢收咗錢之後就塞咗支潤滑油同埋一個用禮物紙包好咗嘅細盒俾我。

「咁我哋返去先。」我拖起愛盈隻手 。

「bye～」阿峰講。

「bye bye 阿...阿...阿方？」愛盈一如既往咁唔記得咗佢個名。

出到學校，個天已經黑曬，時間都嚟到七點，我拖住愛盈嗰隻溫暖嘅手慢慢行去巴士站。



「今日...好滿足呀，自從遇到希仔你之後，我嘅生活變得越嚟越精彩呀。」愛盈突然講肉麻嘢，令我感覺自己塊臉好似有啲紅。

「我都係...」我淺笑道。

「食唔食糖？」我接住問。

「好呀！」

我拎咗頭先盒糖出嚟，係一盒用鐵盒做包裝，好經典嘅一種日本水果硬糖，愛盈倒咗一粒啡色嘅糖出嚟，而我倒咗一粒紅色嘅糖，我哋兩個同時將粒糖掉入口。

「嗚...朱古力味...」愛盈擺咗入口之後唔夠五秒就直接咬碎咗佢吞落肚，毫不浪費食物。

「蘋果。」我講完之後含住粒糖，但愛盈拉一拉我件衫叫我停低腳步。

 我停低望住佢，佢突然鬆開手然後雙手㩒住我膊頭再踮高腳尖，勉強咁錫咗埋嚟，然後...



...搶走咗我粒糖。

然而佢偷咗粒糖之後自己塊臉都紅曬，又默默咁拖返我隻手繼續行去巴士站。 

我塊臉好熱。

個心跳得好快。

佢嘅嘴唇...好甜。

不知不覺就到咗巴士站，而且仲即刻有車，喺上層坐低咗之後，我拎出褲袋入面嘅airpods，然後將左耳遞俾坐窗邊嘅愛盈，佢戴好咗之後就將個頭靠住我左邊膊頭合埋雙眼，喺我自己戴好咗右耳嗰陣已經瞓著咗，明明仲含住粒糖...

我伸出右手摸下佢柔順嘅頭髮，然後向下游移，輕輕咁托起少少佢嘅下巴，最後慢慢錫落去。



...粒糖甜咗。

十分鐘之後，架車就到咗站，而愛盈亦喺落車前嘅三十秒醒咗。

「嗯...我粒糖呢?」佢好呆咁問我。

「你頭先瞓瞓下吞咗。」

「吓...咁驚...」佢皺眉道。

「無嘢嘅。」我摸一摸佢個頭，笑道。

「落車喇～」我再度拖起佢隻手，俾佢行喺我前面然後落車。

「呀！」搭緊𨋢上屋企嗰陣，愛盈突然大嗌。

「做乜?」我有啲緊張咁問。

「我哋唔記得咗買飯...」佢回答。

「屋企仲有少少菜同雞扒，一陣間攞嚟煮兩碗麵食咪得。」我又笑道。

「哦～好彩好彩～」佢回復笑顏。

打開屋企道門之後，只見憶奇訓咗喺地下，望落無乜力咁。

「我唔得喇...好辛苦...就嚟...餓死喇...」肥到好似個波嘅憶奇訓喺地下背住我講。

我幫佢倒咗貓糧之後，佢就好似瞬間移動咁出現咗喺我隔離，連憶雪都係。

「我又嚟整嘢食～」愛盈喺雪櫃拎咗兩塊雞扒出嚟之後再攞兩包出前一丁入廚房。

「等陣!」我㩒住佢。

「我嚟整就得...」

「呀呢家多！」佢講完之後就去梳化坐低睇電視。

我哋食完嘢之後，就到咗交換禮物嘅時間。

我哋一齊坐喺梳化上面，將準備送俾對方禮物擺喺自己隔離。

「我同你表白嗰陣，都係呢種時間。」我望一望自己左手戴住，愛盈送俾我嘅手繩，再將視線轉移到眼前嗰個，我最愛嘅人身上。

「我聽到你一開始話唔可以嗰陣真係差啲嚇死。」我溫柔咁望住佢嘅雙眼，輕笑道。

「因為我本來已經準備好要同你表白先架嘛...」愛盈攬住黑貓公仔，鼓起雙頰望住我。

「準備好未？」我問。

「嗯！」佢點頭。

我哋兩個各自拎出用禮物紙包好嘅禮物出嚟，然後放到對方嘅手上，同時拆開禮物紙，雙方嘅禮物，都係用同一種方式包裝，飾品店嘅盒。

佢先打開我嘅禮物，係一隻色澤偏暗灰色嘅戒指，上面刻有一隻黑貓向佢嘅前方，即係戒指嘅左手邊，伸出右手嘅圖案。

愛盈望住戒指，臉上泛出淺淺嘅紅暈，嘴角漸漸向上勾起。

「你唔可以唔鐘意架。」我望住佢時刻充滿活力，一次又一次咁樣治癒我嘅雙眼，燦笑道。

講完之後我就打開佢俾我嘅禮物，係一隻戒指，色澤同我送俾佢嘅一模一樣，然而上面嘅圖案，由黑貓變咗做一隻柴犬，向戒指嘅右手邊伸出左手。

「你無時無刻都要戴住佢架!」愛盈笑道。

「咁我哋兩個都將佢整成頸鏈，就返學都戴得。」我提議。

「嗯嗯嗯！」愛盈興奮咁點點頭。

「唔知點解...我哋喺埋一齊明明只有一個月都無，但係就好似過咗十年咁，每一日...每一秒，只要有你喺度，我就好幸福...好滿足，我真係好愛好愛你！」佢接住講。

愛盈同我同時將戒指戴落自己嘅右手無名指。

戴完之後，愛盈將雙手繞到我嘅後頸，兩個人嘅嘴唇慢慢靠近，然後溫柔咁輕吻一下，因為濃烈嘅愛意湧入頭腦，我哋慢慢變成熱吻。

熱吻過後，我哋冇進行到下一步，只係靜靜地相擁。

「我嘅世界本來已經變得只有孤獨同冰冷，但係因為你，令我無時無刻都咁有安全感，體驗到咩係家庭嘅溫暖，單純嘅快樂，黃愛盈，多謝你，我愛你，永遠都係。」我將自己嘅額頭貼住佢嘅額頭，慢慢咁講出我心中一直想講嘅嘢。

唔知係咪因為太攰嘅關係，我哋竟然保持住咁樣嘅姿勢直接瞓着咗，甚至連涼都未沖，比較早起身嘅我，見到清晨嘅太陽，嘴角竟然隨之勾起，心中只有溫暖嘅感覺。

我同愛盈雖然係同居之前就已經相識，而且懈逅得一啲都唔浪漫，但因為同居，因為呢個屋企，將我哋兩個嘅心連繫埋一齊，令對方變成自己嘅世界，無論聽日發生咩事，只要對方喺自己身邊，就已經足夠。

「多謝。」我望一望呢個住嘅時間唔長，但已經留低咗無數回憶嘅地方講。

「嗯？朝早喇？」喺我心口上面瞓到流曬口水嘅愛盈望住我，呆呆咁問，好可愛。

「係，早晨。」我微笑道。

「早晨!」愛盈用燦爛又美麗嘅笑容回答我。