二零五零年 – 我女神係暴徒: 第十七章

鏡頭一直捕捉住一隊綠色制服既警察…大部分警察都戴晒頭盔又有一個黑色面罩, 企係堆警察最前面有一個無戴頭盔又無戴面罩既警員…果個係我老豆。
 
乜老豆三十年前個樣都已經係咁老。鏡頭入面影住老豆佢地係條行人路上面, 佢似乎一路指揮緊班伙計, 老豆行行下伸手指住一個挨係欄杆既年青男仔, 佢班伙計就行埋去圍住個男仔。
 
其中一個警察突然伸手想搶個男仔部電話…個男仔反抗, 果個警察就大叫襲警…然後就一棍扑落男仔個頭度…跟住成班伙計圍住個男仔黎打…
 
拍緊影片既記者都似乎嚇一跳。「哇! 哇! 做乜野呀!」記者一邊拍都一邊叫左出黎。然後鏡頭見到有其他市民似乎想上前阻止班警察。
 
跟住老豆衝埋鏡頭同人群前…「行後D! 警方封鎖線! 唔好阻住我D同事做野! 行後呀!」
 


「退緊啦阿SIR! 唔好推呀!」記者比老豆推到個鏡頭唔多揸得穩, 搖得好西利。
 
老豆繼續推個記者, 個鏡頭影住老豆個大特寫, 佢果刻個表情竟然係度冷笑緊。
 
「叫你再行後D呀! TEN MILE呀! TEN MILE! 我限你十秒鐘之內退後 TEN MILE 呀!」
 
「點樣十秒退十公里呀SIR????」「毅進仔講乜鳩呀??」民情愈來愈洶湧。
 
老豆有幾個伙計行左過黎幫手推後D市民。鏡頭裡面隱約見到後面班警察重係度揮棍打緊個男仔。
 


有個大叔行埋去我老豆度。「阿SIR你D同事打人呀!! 你重唔阻止佢!」
 
「我睇唔到! 我唔知! 你再講我拉埋你告你阻差辦公呀!」老豆拎住支警棍指住個大叔…
 
「你幾號冧把呀?? 我要投訴你!」 大叔比支警棍指住都無後退。
 
「我地全部都無冧把既! 有乜野你搵PPRB啦!」 之後老豆一棍打落阿叔個頭度。
 
愈來愈多市民好憤怒咁衝到鏡頭前理論。老豆突然拎起左支噴霧…大範圍係咁噴…然後最後噴左去鏡頭果度…片段到呢度就停左。
 


我之後係其他幾段片…都有見到老豆執法既英姿。其他警察以為蒙晒面無冧把就可以為所欲為, 老豆無蒙面但都似乎覺得就算出晒樣都吹佢唔漲。呢班究竟重算唔算係人黎? 佢生出黎既我…又到底係唔係人?
 
係好多好多片段入面…我睇到好多市民係抗爭既時候…都唱住一首歌。
 
「同行兒女 為正義 時代革命」。。。。。。。