二零五零年 – 我女神係暴徒: 第十六章

「迪儀…你就是聽完Felix的憶述…就接受這個事實了嗎?」
 
「當然不是哦, 熊主任, 我帶你來這裡, 並不是單單為了讓你跟Felix見面的, 你跟我們來!」
 
迪儀一路扶住Felix, 一路開門帶我行出走廊, 我地行入左隔離果間房, 入面…有一座比我人更高既伺服器, 隔離有一排長枱放左幾部電腦。
 
Felix 慢慢一步一步行到一部電腦前面, 單手係登入界面上面快速輸入左密碼, 電腦解鎖之後彈出一個好似土豆網咁樣既影片平台。
 
「阿熊, 我們星火團隊當時為了讓下一代有機會尋找到歷史的真相, 我的小隊當時帶著這些比性命更寶貴的記錄, 逃到了澳門。我們在這裡保留了已經於香港絕跡的記錄, 裡面存放了大量當時的新聞、影片和證據。那幾年被埋葬的黑暗歷史就在這裡了, 如果你還願意去觸碰真相的話, 請在這裡慢慢去參透吧。」
 


吓…乜迪儀帶我山長水遠黎呢度煲劇?! 我坐低左之後望左一望呢個頁面, 似乎佢地將好多影片分左類, 其中我見到一類係「黑警極醜惡」。
 
我用滑鼠按入去, 見到有大量標題為「濫暴」、「私刑」、「行刑」…為首既影片, 我就開始左慢慢睇落去。
 
「熊主任…今天我們都還沒吃飯, 不如先去吃點東西你再慢慢看吧? 我們在樓上八樓有。。。」。。。。。。。。。。。。。。「熊主任…聽到嗎?」
 
「迪儀, 我們出去吧, 讓他自己在這裡慢慢看。我們上去邊吃邊談一下迪輝的情況。」
 
我聽到迪儀同Felix好似講左D野, 之後聽到一聲關門聲, 我無理到佢地, 因為我眼前播緊既影片…震撼力非常大。
 


我睇到好幾段幾十年前既新聞評論…片段裡面加插左好多警察無差別攻擊市民既畫面…有一單係摸完女仔個胸然後話個女仔用胸襲警…又有一單係警察制服左個黑色衫既年青人之後十幾個警察埋去圍毆佢…好多年輕人比警察打爆頭…我望一望呢D新聞片段既右上角…「RTHK 香港電台」…竟然係官媒?!
 
RTHK其實作為其中一個政府部門而家都仍然存在, 但RTHK主要只係負責轉載各部門既聲明、新聞稿同埋大量中央領導講話…RTHK點解會有自己既新聞評論嫁?! RTHK明明應該只係一個政府發放資訊既工具, 幾十年前竟然可以手指拗出唔拗入調轉槍頭批評番政府?
 
我慢慢睇到關於黃大仙區既影片…老豆講過我好細個果時係住係黃大仙, 當年黃大仙區有警察宿舍, 係後來政府收番太古, 我先搬左去港島區。
 
一路播D片…影片裡面當年既黃大仙猶如戰場…煙霧瀰漫偏地傷者…其實呢D影片會唔會係電影入面剪輯出黎嫁? 我一路睇一路思考呢個問題…
 
直到…我係段片入面見到著綠色制服既老豆。