二零五零年 – 我女神係暴徒: 第二十五章

打開屋企既大門, 拉門既時侯覺得今晚度大門好似比往日重左幾斤。步入屋企既時候每一步都好似逆風而行咁, 我對腳似乎好唔願意行入去, 連從屋企入面吹出黎既風都好似特別凍左幾度。
 
今晚番到屋企, 同上次一樣聽唔到任何電視機發出既聲音, 平時呢個鐘數應該播緊中華翡翠台既天氣預報, 平時每晚都會聽到天氣小姐預報聽日有可能落雨, 亦有可能唔落雨。一路行到大廳, 果然…見到老豆再次好靜咁坐左係梳化度, 佢又再次用好凌厲既眼神啤住我。
 
「老…」可惜, 成功打破沉默既…係佢。
 
「阿熊, 你做乜野同果個唔三唔四既女仔去澳門過夜?...你係咪想激死我??」
 
老豆果然早就知道我去左澳門。我呢幾十年黎究竟重有冇私隱呀? 我都已經放低左個警隊家屬鎖匙扣係屋企…即係老豆果然係一直透過街上面既閉路電視監視住我既動向。
 


我塊面呢一刻既表情應該僵硬左, 老豆究竟係度講緊乜野呀?! 同女仔過夜呢類咁尷尬既講法真係…老豆諗左去邊呀?
 
「老豆…乜野唔三唔四既女仔呀! 迪儀係我同事, 係正經女仔黎! 你唔好再因為人地係黃色份子你就…」我都未講完…
 
「哎呀!!! 阿熊!!! 我都同你講左幾多次, 做男人唔可以喺呢度食又同時喺呢度痾嫁! 重要同隻曱甴搞埋一齊! 你以為同隻污糟野搞一劑你打個冷震爽一爽咁, 但我地熊家族譜會衰三代嫁!」
 
「我無…我…」老豆竟然以為我同迪儀山長水遠去左澳門爆房…我明明係正人…君…咦…?! 點解我無諗過可以有呢一著?!…我都想幫我把收藏左三十年既寶劍開光呢…
 
「我我我乜野姐?! 比我踢爆左就講野一舊舊咁! 隻曱甴女比乜野藥你食? 食到你迷迷糊糊咁, 你…」
 


「唔好再叫迪儀做曱甴!!」老豆呆左一呆。我一時激動呢一聲叫破喉嚨…真係好嬲, 唔好再叫我女神做曱甴。
 
「阿熊你乜野態度同老豆講野呀? 吓! 你為隻曱甴女喝我!」老豆企左係身行埋去我面前, 我見佢兩隻手既拳頭握得好緊, 佢望住我既眼神亦充滿怒氣。
 
「咁點呀老豆? 你係唔係想一棍打爆我個頭呀? 黎丫!」我舉高手指住我自己個頭殼頂。我聲音略為調低, 因為太古城呢度鄰居全部都係武警, 我好怕隔離屋會聽到。
 
老豆神奇有些少錯愕, 一時間無出聲。
 
「定係你想拗斷埋我隻手呀?? 叫你黎呀!」我舉高隻手水平停係半空。老豆雙眼掹到好大, 但仍然無出聲。
 


最後我伸起雙手平排遞前。「定係…你而家想拘捕我, 然後送我番大陸行刑呀? 熊長官!」
 
「阿仔…隻曱甴到底同你講左D乜野…?」
 
「真相。多得迪儀, 佢令我知道左老豆你係一個死黑警!」