二零五零年 – 我女神係暴徒: 第二十六章

死黑警…係我睇咁多段片裡面, 絕大部分市民對警察既稱呼。以老豆既英勇戰績…封為黑警實在當之無愧, 而黑警…係要死全家嫁。
 
「阿熊你講乜野呀!!!! 我唔係黑警!!! 你收聲!!」老豆大喝一聲, 然後…「啪」一巴車左落我塊面度。
 
係阿媽離開左呢頭家之後, 老豆係第一次郁手打我, 重要係大大力煎巴我添。塊面真係好痛, 牙肉痛到火燒咁, 老豆呢一巴真係好出力。
 
我摸住塊面, 感覺到一陣陣既委屈感,隻眼開始有少少眼淚想湧出黎, 點解呢個人偏偏會係我老豆黎?
 
「你係!!! 我知你帶住班伙計通街打人!! 我係新聞片入面望住你拗斷左個女仔隻手…個女仔望埋去得十幾歲咋! 你望住你班伙計四圍打人…你個表情竟然重係度笑緊嫁! 老豆你根本無人性!」
 


老豆好愕然。「你…無可能有咁既片段! 你拎比我睇丫! 證據呢? 你究竟跟隻曱甴去澳門做左D乜野! 你自從痴埋去條女度之後就成個人變晒! 你以前好聽話嫁!」
 
「如果我有帶住條片係身, 我由澳門過關番香港果陣比人拉左啦!! 關口班武警剩係搜查我部電話既內容都搜左成個鐘呀! 你根本明知我唔會有證據係身上面, 老豆你有冇做過你應該自己心照啦!」
 
每個人多多少少總會有做過虧心事, 而每當虧心事被人識破既時候, 總會好大反應。對方既反應越大, 其實就越代表佢有做過。
 
「我…我地係為左保護香港!!! 用適當武力去鎮壓暴徒! 驅散黃色份子! 我地無做錯到! 我地做野光明磊落…我…」老豆越講越正氣凜然…滿口歪曲事實…我忍唔住要打斷佢…
 
「光明磊落…? 暗角打獲就真…你口中既暴徒…到底係手無寸鐵既街坊、公園路過既阿叔、著校服既妹妹仔、岩岩放工既西裝友…定係駁你嘴既大肚婆呀??」
 


「…反對政府既就係暴徒! 無論佢地假扮街坊、假扮學生、假扮番工都好…唔聽話既就係犯法! 犯左法就要付出代價! 我地執法者就要懲罰佢地!」
 
「你地武警唔係法官呀! 佢有冇罪唔係你講嫁! 你…」今次到老豆打斷我…
 
「法官都係我既人! 我講既野就係法律! 我話佢有罪就有罪! 如果每個人犯左法之後都要等三五七年先等到個官判, 到時蚊都訓啦!」
 
「老豆你…你地咁樣就係所謂正義咩…? 阿媽以前話你成日失眠…我記得好多時朝早佢都叫我唔好阻住你休息...老豆你有冇一刻…一刻咁多…諗過自己有冇錯到?」
 
老豆稍為平靜左落黎…「…阿熊, 永遠都係…贏左果一方…就係正義。所謂既正義…只係打贏左另一個正義…之後殘存既果一方姐。」
 


我突然…腦裡面叮左一聲。「老豆…阿媽其實係唔係因為知道左你開工果陣做左乜野…所以忍唔住離開左呢頭家??」