二零五零年 – 我女神係暴徒: 第三十九章

「我要去見迪輝…你行開! 我唔可以比你亂黎嫁…!」我點都要比個交代迪儀…唔可以比迪輝出事!
 
「你…你唔好癲啦! 訓番低啦! 無用嫁! 你幫唔到佢嫁! 你想去邊度搵佢呀? 你聽老豆講啦, 顧惦自己先啦!」老豆一路講, 雙手一路稍微比力想推我訓番低。
 
我不停掙扎, 我想推開佢, 我要離開呢間病房, 我要阻止李叔叔搞迪輝…! 我心底裡面知道, 我唔可以再做扯線公仔, 我唔想成世都做一隻狗, 我唔想每日困係個狗籠入面追住老豆個紅色屎忽係度跑圈…
 
「冷靜D呀仔! 有冇人呀?? 入黎幫手呀!! 人呢??」 老豆愈來愈大力想制止我, 唔知佢有冇帶到振中棒出黎呢? 會唔會一陣又拎出黎再扑濕我一次?
 
掙扎既過程中…我同老豆互相拉扯, 最後我突然失左平衡…由床上面碌左落地下, 個額頭陷左落地…超痛。「仔…! 仔…仔…呀! 喂…!」又再模模糊糊聽到老豆把聲…我望向老豆, 佢今次既表情非常肉緊…
 


雖然唔係後腦落地, 但後尾枕都一樣好痛…我伸手摸向自己既後尾枕, 濕濕地既喂?! 望一望自己隻手…紅色一片, 似乎傷口裂開左。
 
「仔…你…等…等…陣…我…搵…醫…生……」隱約聽到老豆話去搵醫生…然後就跑左出病房, 我知道今次係…機不可失。
 
我扶住張床慢慢企番起身, 用床頭櫃既紙巾大力按壓住後尾枕既傷口…然後開始望向病房四周圍, 好彩! 老豆有拎我個斜揹袋黎醫院…打開見到銀包係入面。
 
快速換走左件醫院衫…著鞋拎袋就衝出病房, 拎起電話果陣…見到有十幾個未讀訊息…暫時唔理住, 走為上計, 我記得有句成語係…走…走乜野…走得快好世界! 打開個百度地圖…嗯, 我果然而家身處係東區近平萬歲武警醫院。
 
我記得好細個黎睇病果陣, 呢間醫院人來人往…非常多市民求醫, 當年仍然係叫做東區尤德夫人那打素醫院。
 


印象中唔記得邊年開始, 由於東區住既武警軍官愈來愈多, 東區醫院就被征用為武警專用醫院, 剩係醫武警、武警家人或者高官。為左多謝中央賞賜棟醫院比武警, 就改名叫做東區近平萬歲武警醫院。
 
後來由於大部分公營醫院都被紀律部隊或政府征用, 諗諗下我都唔知到底普通市民重可以去邊度睇醫生?
 
我伸個頭出走廊偷望…果然人都唔多個, 成棟醫院咁大…邊有咁多武警同時入院丫! 可能根本都無乜醫生護士當值, 唔怪得老豆咁耐都未番入黎。我估老豆係跑左去護士站果邊既…我就反方向急步衝向後樓梯。
 
一直落到地下果層…突然行左咁多路, 個頭愈來愈暈…要支持到上到車呀。一路向住醫院大門方向行…頭先係病房照鏡我見到自己頭上面既紗布都染左血紅色既…但醫院大堂既護士見到我都無乜反應。
 
直至…我見到大堂警崗果個當值武警定左格咁望住我…然後佢即刻對住個通話器講左堆野…佢既視線一直無離開過我。
 


我知道…老豆黎緊了。