被武警發現既一瞬間…腦入面突然回憶起一個技能, 中學時期…有一位樣貌與巴斯光年百分之九十九相似既老師經常告誡我地「同學! 上課要一直看著我, 一直看著書本!」咁到底係望住你定望住本書呀? 「左眼看著我! 右眼看著書!」我一直都以為呢個老師係痴線。
 
但就係呢一瞬間, 我竟然成功用右眼持續啤住警崗, 同時左眼不斷尋找緊邊條路係去的士站, 我由警崗果位武警既口形中推斷…佢不斷對住通話器叫緊「在正門! 在正門!」。轉向前往的士站既最後一條走廊果陣, 我右眼啤到警崗果邊走廊既盡頭…老豆正跑緊過黎。
 
拖住只係跑左幾步但已疲態盡現既身軀…我駁命向前跑, 我心底裡好明白, 呢場同老豆既賽跑…我仍然有勝算。因為我聽老豆講過…武警高級軍官身體年檢果陣既一百米短跑, 平均時間係…34秒37, 即係…稍微比我行路快少少。
 
衝出醫院大門…好彩一排排既的士已經係的士站等緊我。終於…終於都成功走甩! 我撲入去隊頭果部的士裡面。
 
「司機! 快點開車! 去牛頭角武…」
 


「哎呀! 不過海啊! 我不去九龍新界的啊! 你下車吧!」我屌你老母的士佬…緊要關口拒載?!
 
「快點開車啊! 開車啊! 去牛…」
 
「靠腰! 年輕人, 都說了我不過海啊! 我連什麼是牛頭角都不知道啊! 哪裡是九龍啊?! 我到底在哪裡啊?! 你下車…」
 
「幹你娘啊! 你再不開車我以叛國罪拘捕你再把你困在警署一年半載, 最後送你全家到廣州受審啊! 媽的你知道這裡是武警醫院嗎!」時空係呢度靜止左一秒…的士佬無再出聲。
 
突然間車底傳黎巨大既引擎聲…有一股力將我身體扯向椅背, 的士以火箭一樣既速度「飛」離的士站。「是! 長官! 多多得罪了…! 不知者不罪啊…放過我家人啊…求求你啊…!」
 


的士佬突然好似精神失常一樣係度糊言亂語…係咪真係驚武警驚成咁呀?! 我回頭望向醫院門口…老豆企係門口外面望住我, 同時見佢揸住部電話係度講緊, 老豆唔係諗住派裝甲車追我呱?!
 
同的士佬講左係去武警牛頭角分部之後, 的士沿住柴灣道上左東區走廊, 我一直望住車後面有冇可疑既車跟蹤住我。老豆教落, 當一個司機好唔專心咁揸緊一架車, 而佢又望住你嘅話…佢就係警察。我望向四圍…咦?! 好似無乜邊個專心揸緊車啵…途經架架車個司機都單手拎住個電話搞緊既…
 
再望番去的士佬果邊…咦?! 的士佬何止單手拎住個電話…佢直情係兩隻手都放開左呔盤…同時操作緊兩部電話喎?!
 
「喂喂大哥! 專心開車啊…! 這樣出事的啊!」唔通的士佬先係鬼…佢唔通收到指示要同我攬炒?!
 
「長官…! 生活艱難啊…! 我要先在九龍那邊找到客戶啊…! 不然我一會回程就虧錢啦!」的士佬繼續左右手各操控一部電話既滴滴打車…
 


「我付你兩程的錢不就好了嗎! 你專心點開車, 再開快點啊! 很急的!」
已有 0 人追稿