二零五零年 – 我女神係暴徒: 第四十二章

反正老豆放左我個鎖匙扣係袋入面, 即係代表老豆遙距都已經知道我而家身在何處, 所以都無謂多想, 爭取時間直接衝入警署啦!
 
我行入警署, 直接就行埋去詢問處, 當值既又係果個肥武警, 佢一隻手揸住一堆薯片準備放入口, 另一隻手揸住部電話係度煲劇…遠處既櫃台, 我見到有幾個武警各自揸住份報紙圍埋一齊, 離遠睇…似乎係一份馬經, 大家似乎都查緊馬場大案, 甚為忙碌。
 
我行到詢問處櫃位前, 直接拎起鎖匙扣從上而下拍落肥武警枱上既掃瞄器度。「啪!」「哇! 想嚇死我嗎! 你怎麼回事啊! 恐襲嗎?? 你是不是襲警啊? 剛剛啪一聲震傷了我的耳道呢!」 肥武警除左雙手會被胸部既磁力襲擊外, 原來重會被物件碰撞既聲音震傷, 似乎佢全身都係由玻璃製煉而成。
 
大堂其他武警都同一時間停低手上既「工作」望向我, 肥武警望住我既時候…表情充滿住疑惑, 我估佢可能有少少記得我個樣, 雖然我而家比繃帶包住左個頭, 但我俊俏既外貌應該不失霸氣。
 
「警官! 你應該記得我吧, 我上週五才來過呢, 你那隻被磁力吸過去的手沒事吧?」我用手指指向肥武警既螢幕, 示意叫佢望一望掃瞄器顯示既記錄。
 


「媽的! 我記得你條毛嗎! 你這王八……啊!…哎?…哦?!...哇!…熊…熊…熊…上校的公子嗎…啊…歡迎光臨呢! 想喝茶還是咖啡呢? 今天飯堂的例湯是木瓜雪耳瘦肉湯呢!」肥武警突然起身立正, 用佢揸住一堆薯片既手伸向額頭敬禮, 薯片碎隨即跌落佢塊面上面, 產生薯片飄雪既畫面。
 
「喂! 肥龍! 怎麼回事啊? 這傢伙誰啊?」 果幾個應該係奉命研究緊馬場大案既武警都行埋黎似乎想湊熱鬧。
 
「啊…報告王隊長! 這位是…熊上校的公子啊…! 他…他…」 果位行緊過黎, 膊頭三條柴既應該就係王隊長, 佢聽到之後似乎收起左敵意, 望向我臉上重擠出左幾分笑容。
 
「哪…哪位熊上校啊…啊…哦…?! 校…校級警官協會那位嗎…?」肥龍點一點頭。老豆當年受到政府寵幸, 榮升上校之後兼任左由警司協會改編既校級警官協會既副主席, 一直到而家退左休都仍然留任榮譽副主席, 聽講每年都有繼續收到可觀既職務津貼。
 
「王隊長你好! 我就開門見山吧! 我知道黃暴編號1736112黃小姐的弟弟黃迪輝在這裡! 我要見他!」
 


我見到肥龍聽到之後快速係鍵盤輸入左堆野, 然後眉頭一皺咁向王隊長打左個眼色…王隊長似乎會意到呢個眼色既意思。「啊, 熊先生, 我沒聽說過這邊有收容這位先生呢! 是不是有什麼誤會哦? 我們這分部只是負責地區性巡邏呢!」
 
「我知道他在羈留室對吧! 別耍弄我了! 真的要我把我爸叫過來才願意幫忙嗎? 快帶我見他!」
 
「這…這…但…但…剛剛…剛剛已經…真的不行啊! 熊先生你先回吧! 我這邊沒權限幫你呢!」
 
我唔理佢既回覆, 直接向職員通道既入口行過去。
 
「喂! 停步! 你不能過去的…不要讓大家難辦好嗎…? 大家都是自己人啊!」
 


本來手握馬經企係大堂食緊花生既兩個武警, 隨即行左去通道門口擋住。我急步行到果兩位武警面前。
 
「我要進去! 你敢動我嗎?!」