二零五零年 – 我女神係暴徒: 第四十一章

「包我雙程嗎?! 多謝長官! 但東區走廊限速七十! 快不了啊!」 的士佬揸紅跑竟然會跟牌行?! 佢係唔係食錯藥呀?! 會唔會真係武警扮的士佬呀?!
 
我情急生智…「我明明感覺到你現在才開五十啊…可以再提速二十看看啊! 你儀表板是不是壞了啊? 這麼慢怎麼會有七十呢!」而家的士佬真係當正我係武警…不妨利用下呢點!
 
「長…長官! 提…提速二十嗎?! 被抓到怎麼辦啊!」的士佬似乎唔係好願意。
 
「你…你現在在高速公路上慢速行駛…! 你信不信我用危險駕駛的罪名抓你回去啊? 危險駕駛都可以直接送到廣州受審啊!」
 
突然間車底再次傳黎巨大既引擎聲…又再有一股力量將我身體扯向椅背, 的士突然加速衝刺。「是! 長官! 哎呀…! 得罪問一句長官你是不是很高級的啊…? 如果你不夠高級的話我就死定了…我死定了啦! 啊!!!!」的士佬再次精神失常, 其實邊有高唔高級, 我本身都唔係武警。
 


終於捱到入東隧, 我由褲袋拎部手機出黎, 平時都無乜人搵我既…點解會有一堆未讀訊息嫁? 一打開訊息…咦?! 竟然係女神搵我!
 
「熊主任…你怎麼今天沒上班啊?」上午08:06
 
「校長剛跟我說…你進醫院了???」上午10:27
 
「校長說你爸早上幫你請假了…還請了一個星期的假, 發生什麼事了? 很嚴重嗎??」上午10:28
 
「我們很擔心你呢! 看到訊息的話報個平安吧!」下午1:17
 


．．．．．．
 
原來迪儀真係咁關心我…! 除左迪儀之外…校長好似都有發幾個訊息問我情況, 但我就無仔細睇啦! 校長就唔應該啦…員工請左假就係私人時間, 點解要聯絡我呢! 佢有咩事搵我可以多D叫迪儀幫忙聯絡我麻。
 
「迪儀我沒事! 遲些見面再說, 等我消息!」下午2:48√
 
駛出東隧, 的士佬繼續一邊尖叫一邊爬頭, 左穿右插咁向牛頭角方向前進。我打開斜揹袋盤點一下老豆幫我執左乜野, 果然…老豆有放到我個鎖匙扣入去。
 
沿鯉魚門道駛經觀塘道, 剎那間已經到達武警牛頭角分部門口。放低幾張毛主席比的士佬, 關埋的士門之際, 的士佬搞低車窗…「長…長官! 你…你留個警官編號給我行不行啊? 救命的啊! 如果被拍到違規了要拜託你幫幫忙啊!」
 


「我…? 啊…我的編號是…T69!」我係學校既教師編號的確係T69。
 
的士佬神情驚訝…「這麼短的編號…聽說編號愈短愈高級啊…! 真的多多得罪了!! 長官再見!!」的士佬突然好似放下心頭大石一樣, 開車飛馳而去。