《我哋已經到達終點站⋯⋯》: 第十章

食完飯就各自各返屋企。

星期二至四都係溫書讀書，所以飛咗佢唔講啦。

星期五朝早，又收到Rachel Whatsapp。

「Hi」（09:51）

「做咩？」（09:51）



「今日洗唔洗返工？」（09:53）

「唔洗。」（09:53）

「咁一陣有無嘢做？」（09:54）

「無。」（09:55）

「咁出街行下？」（10:00）



「ok，去邊？」（10:00）

「葵芳啦。」（10:01）

「ok」（10:01）

「咁一陣十二點葵芳地鐵站等啦。」（10:03）

「ok」（10:03）



我起身梳洗一下，準備落街搭車。

屋企附近雖然有車出葵芳，但係一個鐘一班，唔睇app嘅話走車就要轉車，我自己偏向坐直車，唔洗咁煩。

落到街就有車，咁去到葵芳就11點10個字。

突然間有人拍一拍我膊頭。

「好準時喎。」

「大家咁話啦。」

「食咗嘢未？」

「未。」



「咁行啦。」

我哋去咗葵涌廣場嘅某一間茶餐廳食嘢。

「做咩無啦啦搵我出嚟行街嘅？」

「無呀，我想買幾件衫啫。」

「咁點解要搵我嘅？」

「乜你好唔滿意咩？」Rachel皺眉頭，唔係好開心咁。

我唔想令到女仔唔開心，尤其我係最驚女仔喊。



「梗係唔係啦。」

「我成日Whatsapp你，你會唔會覺得我好煩？」

「唔會呀，有人同我傾計幾開心呀。」

「咁就好啦。」Rachel露出一個放心嘅表情。

食完早餐就開始葵廣遊記。

行均成個葵廣，我聽得最多嘅一句嘢係

「哩件靚唔靚呀？」

而我講得最多嘅一隻字係



「靚。」

行咗幾個鐘之後，Rachel滿載而歸，而我隻腳亦宣告報廢。

我望一望隻錶，原來已經五點幾。

「乜依家五點幾㗎喇。」

「係呀。」

「同阿媽講今晚唔返去食飯先。」

Rachel喺我側邊打電話，我就幫佢拎住啲嘢先。



「搞掂，行啦。」

「仲行？」

「做咩？你攰？」

「梗係啦。」

「咁去嗰邊啲長凳坐下啦。」

我同Rachel行咗去小食店附近嘅長凳坐。

「去邊呀？」

「賣嘢食。」

「我又要。」Rachel即刻雙眼發光。

「食咩？」

「手抓餅。」

「Ok。」

我去咗兩款唔同口味嘅手抓餅返去，諗住睇下佢要邊款。

「我要左邊嗰個。」

正當我食緊自己嗰份手抓餅嗰陣，Rachel無啦啦伸個頭埋嚟，咬咗我個餅一啖。

「你嗰個好食啲喎，你食哩個啦。」然後一手搶走我個餅，遞返佢食淨嘅半個餅比我。

無錯，我係要食佢食淨嘅餅，不過算啦，佢開心就好了。

食完嘢，行多一陣就準備返歸。

「今次洗唔洗送你呀？」

「你肯送實好㗎。」

「咁行啦。」

好彩我哋走嗰陣未係放工時間，唔係嘅話47X轉49X都幾難上車。

照舊送到第一城商場，但今次我唔搭43X，上86K去沙田火車站轉263，因為放工城隧可能等幾架263都上唔到，所以去總站坐算。