《我哋已經到達終點站⋯⋯》: 第十二章

今日要同班Groupmates傾project，但係個腦諗返尋日同Charlie出去葵芳，個人就專心唔到。

「喂，喂。」

「下，做咩？」

「點呀，出嚟傾嘢發曬夢咁，平時你唔係咁㗎喎，係咪發生咩事呀？」

「無呀，哈哈。」



「唔通我哋嘅Rachel姐終於有拖拍？」

我都想係呀，奈何個男嘅無咩反應呢。

「梗係唔係啦，哈哈。」

「咁係咩呀？」

「無嘢啦，繼續個project啦。」



結果一傾就傾咗幾個鐘，叫係搞掂咗一半啦。

「我要同屋企人食嘢，我走先啦。」

我所指嘅屋企人係我細佬，佢要去香港公園影相返去做project喎。

「Bye。」

喺我搭緊車落金鐘，我收到細佬Whatsapp。



「家姐你喺邊？」（14:34）

「搭緊車去金鐘。」（14:35）

「可唔可以嚟巴士站接我？」（14:36）

「喺太古廣場等啦，我唔想行。」（14:36）

「嚟啦，我唔識路呀。」（14:37）

唔識路？你點睇都熟路過我啦。

「搞笑？」（14:37）

「講真呀，嚟啦。」（14:38）



「係啦係啦，巴士站等啦。」（14:38）

「家姐萬歲。」（14:39）

我行到巴士站，見細佬未到，玩陣電話先。

碌碌下ig，見到有個Little Twin Stars嘅展覽，即刻諗好無搵埋佢去呢，唔好理啦Whatsapp問佢咪得囉。

「有無興趣一齊去睇展覽？」（14:50）

等咗3分鐘、5分鐘、7分鐘，都無回覆，唔通佢覺得我煩？

正當我苦惱緊嗰陣，我無為意有架巴士停喺我側邊，我聽到有人喺車嗌。



「咁快又見啦喎。」

把聲咁熟嘅？無理由嘅，一定係我聽錯。

「你嚟等細佬呀？」

唔係喎，我好似真係無聽錯喎。

細佬拍一拍我膊頭，指一指司機位。

OMG，真係佢嚟。

「係呀，估唔到係你車佢嚟喎。」

我更估唔到咁快又有得見。



「好多嘢你都估唔到㗎啦，哈哈。」

「你啱，哈哈。」

「好啦，我走先啦，再傾。」

「好，bye bye。」

細佬多謝你呀，好彩你嚟叫我接你喳。

望住佢揸車走，我同細佬行返過去太古廣場。

「喂，家姐你有同師傅佢見面咩？」



師傅？邊個嚟？

「咩師傅？」

「頭先個司機囉，佢咪師傅。」

「做咩咁問？」

「唔係佢做咩話『咁快又見』。」

「關你咩事啫，你個project要做咩㗎？」

「去溫室影相。」

「咁快快手搞掂去食嘢。」