《我哋已經到達終點站⋯⋯》: 第十四章

起身梳洗一下，換件衫，揸架車出去。

你以為係私家車？唔係啦，係電單車呀。

話說某一日我上網見到架二手CBR600RR幾平，咁就買咗返嚟，好好彩咁架車又無乜問題，就揸到依家。

如果你問我係咪鍾情Honda，咁又唔係喎，你比架R6我，又或者比架ZX-6R我，我都係咁揸㗎喎。

話咁快嚟到第一城，面對哩個鎖車皇國，打死我都唔落車。過咗一陣，終於見到Rachel，我慢慢駛前架車。



「小姐，有無興趣去遊車河？」我特登壓低把聲。

「無興趣。」

「咁無情㗎，一嘢拒絕人。」

「⋯⋯」佢無應我。

「真係唔去？」



「我等緊男朋友，唔好再煩我。」

男朋友？睇嚟嗰位人兄係人生贏家嚟喎。

「咁幾時介紹我識先？」我用返平時把聲。

原本背對住我嘅Rachel嚇咗嚇，再紅住面咁擰過嚟望我。

「好準時喎。」我講咗句。



「你都係呀。」

「你男朋友去咗邊？」我多口問句。

「你⋯⋯」佢細細聲咁講。

「吓？」頂，咁細聲我點聽呀？

「無嘢啦，去睇展覽啦。」

「等我一陣。」我喺背包拎出一個頭盔，幫Rachel戴。

「唔該，不如你個袋比我孭啦。」

「哦，唔該。」



好彩個袋無乜其他嘢，所以都唔係好重啫。

行青沙出尖沙咀又真係幾快喎，唔洗一陣就出到去。

擺低架車喺骨位，放低埋兩個頭盔，落車冚同上鎖，之後就走得啦。