《我哋已經到達終點站⋯⋯》: 第十五章

「乜你好鍾意Little Twin Stars㗎咩？」

「Ok㗎。」

嗰展覽原來係喺一間舖頭入面，其實嚴格嚟講唔係展覽嚟，但係就堆滿買嘢嘅少女們。

見佢望住條頸鍊，睇睇其他飾物，再望返條頸鍊。

「條頸鍊好似幾靚喎。」我話。



「你都覺得呀，但係有啲貴⋯⋯」佢細細聲咁講。

我望望價錢，都唔係太貴啫。

「好啦，我哋去食嘢啦。」佢接住講。

喺我哋離開間舖嗰陣，Rachel有意無意咁擰一擰轉望間舖，比我發現咗。

我哋去咗食拉麵，食完之後Rachel話去一去洗手間，咁通常女洗手間都大排長龍，所以我周圍行吓。



行到嚟頭先間舖，我行咗入去。

「唔該，我要哩條頸鍊呀。」

「好，我幫你包起佢呀，哩邊請。」

我企喺收銀機前，拎出我自己嘅銀包。

比完錢，就收到Rachel電話。



「喂，你去咗邊呀？見唔到你嘅？」

「你喺洗手間出面等一等呀，我過返嚟。」

接下嚟，我就急步行返頭先個位。

「我返嚟啦。」

「頭先去咗邊到睇嘢呀？」

「唔好講哩啲嘢住，你合埋眼呀。」

佢好聽話咁合埋眼，而我就拎出啱啱買嘅頸鍊，輕輕幫佢戴喺頸。

「睇吓鍾唔鍾意？」



見到身上頸鍊嘅Rachel雙眼發光，臉頰通紅。

「頭先見你喺咁望住條頸鍊，知你想要㗎啦，送比你啦。」

「真係㗎？」

「係呀，你睇吓你幾靚。」我指一指身邊落地玻璃嘅倒影。

「多謝。」