《我哋已經到達終點站⋯⋯》: 第十六章

送咗Rachel返屋企之後，我就返咗屋企瞓。

嚟到星期一，又收到公司電話。

「喂。」

「喂，俊仔今日得唔得閒返？」

「我Ok嘅，返咩？」



「962S呀，有個師傅請咗假，所以有個窿比你攝，咁廢事又收多架車。」

收車，顧名思義就係無車開，啲客就會去投訴。

就係咁我又換衫，咬住個包咁行返廠簽到。

「俊仔拎架車好行啦，就夠鐘啦。」

我行出泊車區，見到有架屬於柴廠（港島東區）嘅6頭豪。



「師傅我拎嗰架。」

「吓，唔好啦掛。」

「唔係拎咩？」

「唉，咁你照攞啦。」

「唔該曬師傅。」



就係咁，我拎咗架豪出街做生意。

一跳上車，揸過置樂花園嗰陣已經體驗到架車係虧到一個點，不過唔緊要，我就係鍾意佢夠虧。

由置樂花園慢慢行到黃金海岸，喺黃金海岸上到滿座，就飛曬打後嘅站，直上屯門公路。

由於架車載滿曬，所以上屯門公路啲斜路係慢過行路，我見後面有架960跟住我，咁廢事阻佢，打一打左燈再伸手揮一揮，示意比佢行先。

佢爬咗我之後都好好咁打兩下死火燈。可能各位唔知死火燈係咩意思啦，其實係代表唔該咁解，當你讓大車嗰陣，有禮貌嘅大車司機就咁做。

塞咗唔知幾耐車之後，終於嚟到銅鑼灣總站，即刻扔低部車去一去洗手間，之後行去休息室。

「師兄一陣做969，Ok？」站長同我講。

「Ok呀。」



「一陣我套返架12米8比你啦，仲有應該有個師姐跟車。」

「哦，好呀。」

坐多一陣就夠鐘，就行去Check Check架車，Check完無撞無壞就上車。

「唔該曬師兄。」有個着司機制服嘅後生女仔上車。

「唔洗。」

講完個女仔就行咗去上層坐，而我Check好無人追車就開車走。

因為過咗上晝繁忙時間，所以哩班車沿途都係得小貓三四隻，而我又可以揸快啲，快過平時去到天水圍。



返到總站，同個師姐行去站長室，順便簽一簽張跟車紙。

「師兄你放個break先。」

「好，唔該曬。」

「師兄可唔可以借一借件褸嚟？」個師姐問。

「嗱。」我除低件外套比佢。

「唔該你，你可唔可以帶一帶我去商場個洗手間？」佢將件褸圍喺腰間問我。

「哦，好。」