《我哋已經到達終點站⋯⋯》: 第二十七章

過咗半日，夕陽西下，娘娘終於起身。

「唔？你仲喺度嘅。」

「驚你一個人有意外嘛。」

「哈，可以有咩意外呀。」

「點知你呀，你知你尋晚飲醉酒㗎喇。」



「吓！我無亂講啲咩呀嘛？」

有都唔講得啦吓嘛，唔通話你屌柒我咩，雖然我係抵屌嘅。

「無喎，你飲醉嗰陣會講啲咩？」

「唔好理啦，無亂講嘢就最好啦。」娘娘看似鬆一口氣。

「咁你仲有冇頭痛呀？」



「無啦，不過我依家肚餓喎。」

「咁你想我買上嚟定落街食呀？」

「有人買就最好不過啦～」

「咁你想食咩呀？」

「唔～紅豆沙加芝麻湯圓，仲要芒果西米露。」



屌，乜家陣啲人肚餓食糖水呀咩？

「吓，你認真㗎？正餐呢？」

「紅豆沙咪正餐，西米露係甜品。」

屌，這是何等的歪理？

。

。

。

轉眼間，我已經買好嘢返到去，除咗兩碗糖水外，我另外買咗碗粉仔比自己。



喺食緊嘢嘅途中，娘娘拎住隻沾滿紅豆沙嘅匙羹，一嘢隊落我碗粉仔度。

「我又要食一啖。」

你都隊咗落嚟啦，我有得唔比咩。

「Ok喎～」

望住碗溝咗紅豆沙嘅粉仔，究竟扔唔扔咗佢好呢？

。

。



我都係照食啦，無謂浪費食物。

「嗱，請你食返粒湯圓嘞。」我都未反應得切，佢已經攞自己隻羹隊咗粒湯圓落我口。

仆街，咬唔咬好呢？一陣啲芝麻漿爆出嚟我就冚家祥㗎喇喎，唔理得咁多啦，咬咗先算。

唉屌，真係爆出嚟，辣親個口添。但話雖如此，粒湯圓又真係幾甜嘅。

食完嘢執埋枱，抖到陣我都差唔多要返屋企。

「睇你無乜事啦，咁我返屋企㗎啦。」

「咁下次⋯⋯？」

「唔？」



「都係無嘢啦⋯⋯」

「想見嘅咪Whatsapp約囉，橫掂又唔係住得遠。」

屌，我哪來的自信口出狂言呀⋯⋯

「嗱，你話㗎，唔準甩底㗎。」

「得啦，真係走啦。」

「好啦ByeBye。」

「Bye。」



就係咁，我離開娘娘嘅屋企，一個人行返屋企。