《我哋已經到達終點站⋯⋯》: 第三十三章

返到屋企都只不過係九點半，咁既然有半個鐘時間，無聊不如睇吓片。

去雪櫃拎罐汽水，打開電視個Youtube功能，第一條推薦嘅片係講早排新出嘅CBR，雙缸250cc，架車個規格其實係幾吸引我嘅，但價錢真係一大考慮因素，新車車價接近8萬，我要買嘅話真係要儲下錢先。

當我睇片嘅同時，娘娘繼續攤喺梳化睇電話，而佢買嘅嘢就擺喺餐枱。

睇多陣片決定沖個涼先，拎埋訓覺衫，去沖涼之前同娘娘講聲先。

「喂？」



「嗯？」

「我沖涼先，一陣如果有人㩒門鐘，見到有個同我同齡傻仔嘅話，你就Play段錄音啦。」

「吓？」

「段錄音我airdrop比你。」

「Ok。」



「佢聽完係屌柒我嘅話你就比佢入嚟啦。」

「Ok。」

。

沖涼期間，我聽到門鐘聲，亦隱約聽到門聲，換言之Jason仔嚟到，咁我快啲手沖完涼出去。

出到去唔見咗娘娘，只係見Jason仔喺度開緊PS4。



「喂，拎咗咩上嚟益我呀？」

「啤酒囉。」

「酒呢？」

「阿嫂拎咗去雪。」

「屌你啦，拎啲唔撚凍嘅上嚟？」

「打舖機先啦，打完就凍㗎啦。」

打機之前，我入去廚房睇吓娘娘搞成點。

「嗯？」



「無呀，我睇吓你做緊咩啫。」

「你打機啦，我執吓個雪櫃先。」

「哦，好啦。」

講返先，我雪櫃長期擺咗唔同嘅嘢飲，所以多咗堆啤酒就要搵位雪。

「打咩？」

「Fifa？」

「好。」



喺我哋喺度打Fifa打咗半場，娘娘喺廚房出嚟，繼續坐喺度睇戲。

。

「屌你有冇咁撚勇呀，上半場入3粒？」

「係你廢啫。」Jason仔寸鳩我。

「我沖個涼先。」娘娘拍拍我膊頭同我講。

「哦，好呀好呀。屌，我依家炒返你轉頭呀，即刻嚟下半場。」

我同Jason仔繼續打Fifa，唔得閒理娘娘喺洗手間整咩。打咗四舖之後，娘娘終於沖完涼，素顏咁行返出嚟。

咕～咕～



「肚餓？」

「嗯。」

「想食咩？」

「有咩食呀？」娘娘喺度問。

「你喺廚房或者雪櫃搵到啱食嘅嘢我煮畀你食啦。」

點解我會咁放心叫佢揀，因為我從來唔會買啲我唔識煮嘅嘢放喺雪櫃。

「哩包Ok？」娘娘喺雪櫃拎出一包日式餃子。



「Ok，你食住薯片先啦。」

當我喺度煎餃子，佢哋兩個喺度邊食薯片邊打機。

急凍餃子開出嚟放落個平底鑊，落油煎，煎好放上個碟度，搵個碗仔將啲餃子汁倒落去，可謂係零技術可言。

拎碟餃子出去，Jason仔好驚訝咁望住我。

「做乜鳩？」

「我以為你淥杯麵啦，你竟然拎到碟煎餃出嚟。」

「煎餃好出奇咩？」

「屌識你咁耐，次撚次都係湪杯麵，但係你今日開爐煎咗喎。」

「咁你食唔食呀？」

「食！我幾大都食。」

其實喺我哋兩個互寸嗰陣，娘娘已經忍唔住，拎起筷子食緊餃子。

「好好食呀！」娘娘雙眼發光咁講。

你連啪咗五隻喎，見到哩個情況已經唔洗擔心，因為我所認識嘅娘娘係唔會放啲唔鍾意嘅嘢入口。

喺食緊嘢嘅同時我哋喺度飲啤酒，唔係賣廣告，但係某A字頭嗰隻日本牌子啤酒雪凍咗之後係真係幾好飲，而當我留意到娘娘飲曬成罐，我就知喺時候阻止佢。

「唔好飲啦你。」

「吓～點解呀～」此刻嘅娘娘塊面已經紅過關公，仲要一臉不願意咁講。

「你到頂啦。」

「哼！唔濟，我要飲！」娘娘從我手中搶走我飲過嘅啤酒灌落口。

唔好啦，我唔想清潔嘔吐物呀⋯⋯

「阿嫂好似唔多掂喎。」Jason仔做口型示意。

「屌，我都知。」

我真係唔想我屋企瀰漫住嘔吐物嘅酸臭味呀⋯⋯

「兵仔！」深夜咁樣大嗌一定會被鄰居投訴。

「細聲啲啦，做咩呀？」

「我攰攰，想瞓覺～」

望一望個鐘，乜已經咁夜，加上娘娘依家喺醉酒嘅狀態下，睇嚟我都係畀佢借宿一宵啦。

上次見識過娘娘飲醉酒，佢應該行唔到直綫，所以又要我出手，出盡食奶嘅力使出公主抱，抱佢去刷牙。

好彩我屋企有啲未開過嘅牙刷，唔係嘅話娘娘就無得刷牙。

放低娘娘喺閂咗蓋嘅馬桶上面，我就拎牙刷牙膏，並且準備𠺘口杯同洗面巾。

「擘大口，呀～」

「呀～」

喺娘娘擘大口嗰陣，我幫娘娘逐隻牙刷乾淨。

「好，𠺘口。」

咕嚕咕嚕～吐。

「之後抹面。」

我用暖水整濕條毛巾，扭乾佢，幫娘娘抹乾淨個靚靚樣。

「好，靚曬。」

「嘿嘿，唔該兵仔～」娘娘無啦啦錫咗我塊面一啖，之後又繼續瞓返。

接下來我又要出盡力，抱佢入房。放低佢喺我張床，幫佢冚好被，希望佢唔會介意啦。

安定咗娘娘之後，我出返廳執返啲碟入廚房洗碟。

「喂我走先啦。」Jason仔話。

「哦，好呀。」

「嗱，我識做㗎，所以唔好燒我春袋呀。」

「你再唔走就真係燒你春袋呀。」

「得喇，再約啦。」

Jason仔走咗之後，我去咗刷牙，熄燈熄電視，拎件外套冚住自己，做廳長瞓梳化。