《我哋已經到達終點站⋯⋯》: 第三十四章

仆街早知尋晚閂窗簾啦，啲陽光照入嚟點瞓呀。唉，起身算。

一早起身刷個牙，之後插耳機睇片，廢事開電視嘈親娘娘。

。

原來唔經唔覺已經睇咗幾個鐘片，乜娘娘仲未起身咩？

咯咯。



「娘娘？」

「⋯⋯」仲未瞓醒？

「娘娘？」

「⋯⋯」仲係無人應。

「我入嚟先啦。」



我打開門入去，見到嘅係娘娘攬住張被瞓。

「嘿嘿～」

搞咩？做乜瞓瞓下都喺度笑？唔通發緊好夢？

「嘿嘿～兵仔～」

「唔？」



「兵仔～」

做乜鳩？行埋睇吓咩料先。

「唔～呀！嘿嘿～」

癡線，無啦啦又嘴埋嚟⋯⋯

。

噢噢，今日唔洗面嚕～

。

算啦，肚餓，出去煮啲嘢食。



煎下煙肉，炒下蛋，炒下蘑菇，哄兩塊多士，再開多罐茄汁焗豆，沖埋壺花茶，應該都叫見得下人掛。

「娘娘？」我再次叩門。

「入嚟啦。」終於瞓醒啦咩。

「係。」

我打開門，娘娘坐咗喺床上面。

「早餐煮好啦，刷牙啦。」

「嗯。」



既然娘娘起咗身，咁我打開喇叭播下歌都無問題啦。

「嘩～」

「唔？」

「你煮㗎？」

「係。」

接下嚟娘娘即刻影相，係咁影，之後隊部機畀我，叫我幫佢影。

「你拎住呀。」娘娘遞咗佢嗰支叉住食物嘅叉畀我。

唉，我知佢想點啦。



幫佢影相嗰陣，要影到好似有人餵佢咁。無錯，又係啲所謂男友視覺。

「嗱，係咪你想要嘅嘢呀？」我遞返個電話畀佢。

「叻仔～」

「識你咁耐唔知你想點咩。」

聽住音樂食早餐，哩種生活畀人感覺勁Chill。

食完早餐，娘娘主動去洗碗，叫我抖下，但我驚佢打爛嘢，所以我都係同佢一齊洗啦。

。



「點呀？一陣間想做咩呀？」

「有你陪我嘅話做咩都得。」

「吓？」

「唔好咁望住我啦⋯⋯」娘娘頓時變得怕醜起嚟。

我無回應佢，只係摸下佢個頭。

。

結果佢拖住我隻手，睇咗成個下晝戲。黃昏嗰陣我送返娘娘返屋企。

同佢並肩而行嗰陣，我哋無乜點講嘢，而佢繼續拖住我，唔肯放手。

「到喇喎。」

「送埋上去啦。」

「好，好。」

上到去，佢寧願單手拎出鎖匙，但都唔肯放手。

「今次真係到喇喎。」

「嗯⋯⋯」

「仲有嘢想講？」

「er⋯er⋯我⋯」

「放心啦，哩隻手你隨時隨地想拖就拖啦。」

「真係？」娘娘開始眼濕濕。

「係呀～」

「應承我，衰人唔好再扔低我一個呀！」娘娘攬住我，喺我膊頭喊。

「係啦～我應承你啦。」

「嘿嘿，好啦。」

「笑返啦，喊就唔靚女㗎啦。」

「哦～啱啱先應承我，依家又嫌棄我醜樣～」

嘩屌，咁都比佢有位入到添。

「唔係呀，唔係呀，我唔係咁嘅意思呀。」

「噗，哈哈，玩你喳。」

「呀，衰妹玩我！」我即刻攬到佢實一實。

「咳咳，兩位唔好喺我面前玩啲咁嘅嘢好唔好？」身後傳嚟女聲。

「家姐！」

「死女包成晚唔返嚟，一定去咗玩啦。」晴姐輕輕拍娘娘個頭。

「嘿嘿嘿嘿～」娘娘喺度傻笑。

「咁我走啦。」

「好啦。」

「Bye～」

望住佢兩姊妹入屋，我就放心搭返𨋢落樓。