《我哋已經到達終點站⋯⋯》: 第三十六章

喺十一月嘅某個星期六凌晨四點幾，我出咗門口去遊車河，不過就唔係揸車，係搭車。

咁凌晨遊車河都無乜嘢揀啦，所以一落到街就自自然然行咗去等N260。

加上N260聽講就好似好多時就派MAN（某間德國商用車車廠）車行，睇睇ETA，預計下一班車五分鐘後到，咁一於睇吓嚟嗰架係咩車啦。

。

噢，估唔到嚟嗰班車唔係MAN嚟，反而嚟咗架三代老闆（某款德國製巴士），喺度講多些少，其實第三代老闆都係用MAN引擎，所以照遞手上車。



唔該各位，想上車就一定要遞手比個司機睇到，司機唔識讀心，唔遞手係無人知你想上車嘅。

「喂，咁啱呀。」

「宏哥仔做乜拎架咁嘅嘢呀？」

「上面派落嚟咪照揸。」

話說宏哥仔係我嘅中學同學，無記錯佢應該好似讀IVE之類嘅嘢啦，之後轉折下就入咗巴士公司做。



咁既然班車無乜乘客，咁我就企喺車頭望下風景啦。

「咦，架車頹頹地喎。」

「還好啦，揸咗成晚都無壞算係咁。」

「咁低要求㗎咩。」

「係咁㗎啦，點會部部都係跑車嚟，安全就得。」



「你啱。」

架車經過荃灣、葵涌，嚟到美孚巴士總站，所以乘客都落曬車，而我就同宏哥仔去拍卡報到。

「做咩咁好死嚟探我呀？」

「我咁啱得閒咪嚟遊下河，之後就見到你。」

「收工去唔去食嘢？」

「無所謂呀，橫掂我今日放假。」

傾傾下又夠鐘開車，我就依舊企喺車頭，而哩班車都係無乜乘客嘅。

架車唔知點解感覺上比上一單好力咗，喺葵涌道爬咗架行N368嘅E50D，但唔排除係我自己嘅心理作用，又或者係架N368慢慢行。



又經過葵涌同荃灣，之後就上屯門公路，跑屯公嗰陣我的確感覺到架車係比頭先好力咗。

「架車好力咗喎。」

「喂我收工單呀，話曬揸咗佢成晚，佢點都要死啲力出嚟畀我啦。」

就係因為咁，哩單N260比正常行車時間快返到總站，跟手就返廠泊車，我就喺車廠門口等佢，廢事入去啦。

「朝早六點幾有咩好食？」我問。

「跟我嚟啦。」

跟住宏哥仔行，行到去啲屋村大排檔，去飲早茶。



飲茶少不免傾下近況，傾下返工有啲嘢發生，總之乜餐都傾下啦。

邊飲茶邊傾計，話咁快就過咗個零鐘，無謂阻住店家地方太耐，加上宏哥仔都攰，所以就埋單走人。

「有咩Whatsapp再傾啦，呵～眼瞓。」

「好，走先，Bye。」

「Bye。」