《War for God》: Ch.5

　「等我嚟。」 　

　為義在那男子的耳邊輕輕吩咐幾句後就步出房間，親自應門。 　

　「請問有咩貴幹啊小姐？」 　

　「你好常議員，我係太空日報嘅記者。我係嚟想採訪一吓常議員同你身後嘅地方，請問你方唔方便？」 　

　為義留意到那名女子手裡提著一部攝錄機。 　

　「好啊，儘管入嚟。」 　

　為義讓開後，女記者第一眼就見到單位內全是全身赤裸、對著她露出猥瑣笑容的男性，嚇得她當堂尖叫一聲。 　

　「哎呀！爭啲唔記得同妳講，我哋呢度係仿古希臘風嘅武術班....無嚇親妳啊嘛？」 　

　「多謝常議員，我諗今日嘅採訪都係暫時結束。」說罷，便轉身離去。 　

　「死八婆....同我玩！？未夠班啊你！」為義轉身對著自己的部下們說：「大家可以著番衫褲喇！」 　

　眾人無不歡呼。 　

　「啲女仔一見親除自己條仔以外嘅崩周自然就會落荒而逃㗎啦！尤其是兄弟們嘅嗰度咁大揪！」為義一邊猥瑣地笑著，一邊梳理著自己髮型。 　

　「大佬果然係大佬！」阿星拍掌。 　

　「不過條女咁都摷到上嚟....大佬，我諗你已經俾人跟蹤緊！」子軒說。 　

　「睇嚟班友真係玩到好盡....」家俊摸著下巴說。 　

　「無計啦，鬼叫我尋日個訪問咁具挑釁性咩....總之大家小心啲啦！」說罷，為義辭別眾人後便離開練武場。 　

　當為義走到樓下時，他的手提電話便響起來。 　

　「家明？做咩啊？又唔開心啊？」 　

　「嗯....我今日俾同學笑啊....」 　

　「咁啊....不如我嚟搵你，同你傾吓啊！」 　

　「好啊....」 　

　「去番上次嗰間茶餐廳啦，好無啊？」 　

　「嗯....」 　

　為義來到茶餐廳後，便見到一位身穿校服的男孩獨自坐在角落，為義便馬上走向他。 　

　「家明！係我啊！」為義坐在他的對面。 　

　「義哥哥，今日啲同學笑我打機又唔叻、讀書又唔叻，做人做好鬼渣啊....」 　

　「哦，原來係咁....」 　

　「義哥哥啊，做人係咪一定要叻先得㗎....？」 　

　「邊個話㗎！？係邊個話做人一定要叻先得㗎！？叫佢出嚟！等我送樣嘢俾佢！」說罷，為義將雙手放在桌上，然後豎起兩隻中指。 　

　「如果以後再有人想你叻嘅話，你就記得送呢樣嘢俾佢！Ok？」 　

　「呢樣嘢係咩嚟㗎？」 　

　「係專門送俾衰人嘅嘢。」 　

　「咁送完之後會點㗎？」 　

　「佢哋自然就會收聲。」 　

　「咁如果佢哋都係唔肯呢？」 　

　「咁嘅話就....」為義收回雙手。「我哋食咗嘢先啦！」 　

　為義招來侍應，為自己和家明點餐。 　

　「我就照舊。」 　

　「我要C餐。」 　

　為義與家明共進午餐後，便護送家明回家。 　

　「義哥哥啊，香港係咪永遠都唔會有改變㗎？」 　

　「我應承你！」為義緊緊地捉住家明的雙手。

　「我一定會建立一個唔單止屬於叻人、正常人嘅香港！就算係唔叻嘅人都好，都要一齊享福！如果有人夠膽阻住我嘅話，我一定會搞掂佢！」 　

　「真係嘅？」 　

　「真！到時候，香港會係一個好快樂嘅地方！」 　

　為義右手握緊拳頭，放在自己的左胸上。 　

　「嗯，我一定會支持你！」 　

　「多謝你，bye bye！」為義目送家明進入大廈的大堂。 　

　此時，為義的手提電話傳來震動。 　

　「喂？子軒，做咩啊？」 　

　「大佬，我收到風，立會聽日要開會。」 　

　「又會咁急....知唔知係咩會啊？」 　

　「咁就唔知，我都係聽我daddy講嘅，事關佢頭先同班高官食完飯嚟。」 　

　「咁好啦，唔該晒你。」 　

　為義掛掉通話後，返回自己的辦事處，當他步入門後便接到第二個來電，正是警務處處長。 　

　「啊義，聽日有個會啊，到時會傾吓『緊急法』啲嘢，你睇吓你到時點啦吓！」 　

　「唔係嘛，玩到咁盡？」 　

　「啊爺落咗order，話呢個月內就要搞掂班曱甴！」 

　「佢哋未免太天真啊嘛....」 　

　「鬼知佢哋咩！雖然我知道你不嬲就中立嘅，但喺官場，有時又真係唔到你話事嘅....總之你聽日自己執生啦吓！我去同班細仲有漁護處啲友傾吓點捉尋晚嗰隻救女猩猩先....係咁啦！」 　

　結束通話後，為義把電話放在辦公桌桌面，然後陷入沉思之中。 　

　「呢次真係仆街了....」 　

　為義走向酒櫃，倒了一大杯紅酒。


待續