我叫洪天傲,我係一個經典的00後, 我諗我阿爸阿媽幫我改名既時候一定對我有好大期望,希望我可以成為佢地既驕傲,咁我一定令到佢地好失望,因為我從來都一個有咩特別既人,只係一個普通既中學生,我成世人冇咩大成就,我諗如果要話我有咩特別既話,我最多就係一個比一般00後更鍾意自己一個思考人生,和‘認識’女生,我諗很多男生都同我一樣,係咪? 就當我仲係到思考緊點解女人是一種咁麻煩的生物,比其他女人更麻煩的生物出現啦,講既就係我老母。 
 
「你可唔可以快手啲?你三點鐘船啊!再唔快點你就遲到啦!」 
 
咁大聲以為我聾架咩 大鑊,唔記今日要返大陸參加個唔知乜鬼英國文化交流團添,都唔知佢係咪有病,竟然要我返大陸學英文,佢地啲英文咪仲屎過我,我依家唯有希望個團有靚女啦。 「得啦,我依家就出來」 我拿拿聲着返件衫就出咗門口。
 
係搭車嘅路上,我就同我兄弟WhatsApp吹吓水。
 
「喂聽日出嚟打波啊,傲哥」
 
「唔得呀,我嚟緊嗰兩個禮拜都要返大陸啊。」
 
「返大陸?叫雞啊!」
 
「你就叫雞!返去學英文啊。」
 
「你玩我呀?返大陸學英文,叫雞你就認啦」

都費事同佢講,本身我屋企同尖沙咀碼頭好近,所以冇幾耐就到咗。終於都可以唔使同我個麻煩老母一齊。我頭也不回就走咗入去,仲要聽到我啊媽喺後面大叫。
 
「記住小心啲呀,得閑就打俾我啦。」
 
我都費事理佢,咁難得可以自己一個玩兩個禮拜一定好爽。入到去第一件事就梗係搵我個領隊點名,順便睇下有冇啲靚女啊嘛。
 
好快就見到有個女人舉住個牌,鬼死咁大隻字寫住’“英國文化交流團”,講就講得好聽,咪又係為咗賺錢,氹我地去。
 
好在個領隊都幾靚女,眼大大,白雪雪帶住眼鏡,有啲鄰家女孩feel,咁都算一個好開始,跟住就梗係面帶笑容,過去點名啦。
 
「Hello,我係洪天傲,我係咪要喺呢度排隊架?」
 
「你係咪報咗名參加交流團,我哋呢就係E組,年紀最大嘅組別。」
 
嘩!佢把聲真係好好聽,有啲陳妍希嘅感覺。
 
「而隔離A至D就一組細一年啦,你冇問題就去後面排隊。」
 
「好,唔該晒」
 
真係正,一嚟到就有個靚女,心情都靚啲。終於搵到我個組啦,睇吓有冇靚女先,環顧四周都唔見有啲特別靚嘅女仔,唉,睇嚟今次都有排捱...
 
當我以為今次就咁玩完嘅時候,隔離組有個人吸引到我嘅注意,佢就好似一朵玫瑰屹立喺啲雜草中間,無論點樣都咁引人注目,但係嗰陣時我唔知呢個女仔對我有咁大嘅影響。
 
正當我諗住過去同佢傾下計個領隊就嚟個完美嘅程咬金。
 
「咁多位同學我哋要上船啊」
 
真係令我有啲衝動想打佢,不過算啦同團兩個禮拜,總有機會可以見面。
 
就係咁,呢個就係我同佢第一次見面...
 

已有 0 人追稿