這一晚,簡紀明與潘瑋晴相約到天文台談心。這裡坐落於洛杉磯的山上,是LA LA LAND《星聲夢裡人》的拍攝場地,電影描寫男女主角在此處邂逅對方,亦是當地一般情侶拍拖的好去處。為隆重其事,潘瑋晴經過刻意打扮,同時間穿了一件走進高級時裝店才能找到的大露背黃色連身裙,顯得格外華麗。同行的簡紀明則身穿卡其色男裝西服,無論剪裁或衣料,一看便知是一流貨色。從任何角度去看,兩者除了相貌相襯之外,衣著更稱得上匹配。
二人進入天文台觀看關於星空的球幕電影,隨著節目完結後,他們步出天文台,在漆黑的戶外享受二人獨處的時間。面向山下洛杉磯的迷人夜景,簡紀明全程表現風趣,相反潘瑋晴卻心事重重,在璀璨星空映照下,彼此形成強烈對比。

「依度無論觀星抑或睇夜景都係一絕,值得我哋一去再去。妳話係唔係?」簡紀明興高采烈地問。
面對簡紀明的說話攻勢,潘瑋晴此刻竟啞口無言。
「妳仲係諗緊前晚關於娉婷講嘅野?」由於晚上天氣轉涼關係,簡紀明把外套放在潘瑋晴的肩上。
「有好多野我諗唔明...........」潘瑋晴若有所思地說。
「我明白喺依兩個月妳好唔開心,但嚮妳身邊其實係有一個非常關心妳嘅人支持緊妳。」簡紀明換上嚴肅的表情繼續說下去:「妳知唔知我一生最愛係妳,我對妳嘅感情至死不渝。」話畢,簡紀明突然從口袋取出一枚戒指。「我只想照顧妳一生一世,應承嫁俾我。」
「我...........」
「知唔知點解我要揀喺依度求婚?因為依度見證住我哋初次擁吻..........係一個好有紀念價值嘅地方。」



潘瑋晴猛然想起余泳心的日記及其養母說過的一番話,那種離奇的巧合令她感到毛骨悚然。就在此刻,潘瑋晴面上的表情作出了一百八十度轉變,同時開口問道:「你到底係唔係識得個綁匪?」
「妳喺度亂諗乜野?」
「我要你老實同我講。」
「件事完全唔係妳諗咁樣,我只係請人教訓一下嚮妳身邊嗰個成日造謠生事嘅麻煩人,亦即係Monica。唉,冇諗到會牽連埋妳.........如果我要收買人命嘅話,點會咁蠢用銀行過數俾.........」簡紀明說到一半,立即意識到自己剛剛說漏了嘴。
「紀明,原來係真,所有野都係由你安排.......」潘瑋晴說話時雙眼瞪大看著對方。
「妳........妳講野點解.......變到咁?我...........」簡紀明面容突然變得扭曲,說話結結巴巴,身體不斷後退,如同自己看到了死神一樣。
已有 0 人追稿