我成為了一個女孩的守護靈（重製）: 第六章

「就咁咋？」雁婷聽完我和心渝的相遇過程之後這樣說道。

「有時有啲嘢，簡簡單單，平平凡凡，先刻骨銘心。」我說。

「我係話，你就咁就由佢跑走？問下佢叫咩名都好嘛，講聲早晨，打聲招呼都好嘛！」

「哦…無呀，中一咋我嗰陣，邊識咁多嘢…」

「咁好可惜喎！你哋咁有緣，開學第一日就一齊遲到，偏偏要等到中四先熟到，足足錯失咗三年時間呀！」



「嗯…」我黯然。

「咁你地係點熟架？」

「仲想聽？」我反問她。

「想，不過我落山食啲嘢先！」

我看一看窗外，早已日落西山，雁婷居住的單位可以眺望維多利亞港，景色閃閃生暉。



這個家的樓價絕對破千萬吧，只是家中卻沒一點人氣。

「我知你諗咩喎，我基本上無屋企人。」她看穿了我的想法，並向我主動解釋。

「佢哋離咗婚，又分別再婚，所以各自都有另一頭家，間中佢哋都會返嚟同我食飯，不過成餐飯都無人講嘢，都唔知食嚟為乜。」

「其實佢地正式分開之前都已經無偈傾，可能結咗婚咁多年，咩偈都傾晒啦…由我細細個開始，所謂一家三口樂也融融嘅畫面出都無出現過，係呀佢地係好錫我，俾好多錢我使，但咁又點？我唔係想要呢啲，我想要嘅嘢，佢哋永遠都俾唔到我。」

「所以，我唔相信愛情。」



雁婷說得淡然，亦是這種淡然，令我更加體會到她的心到底有多傷。

我不知道說些什麼樣的安慰說話，同時覺得再多的安慰說話都不過是多餘。

「唔使呆晒咁喎，我慣架喇！」

「等我做你屋企人啦！」我衝口而出。

「哈哈哈哈哈！聽住先啦。」雁婷笑笑說，卻不難察覺到她面上泛起了些紅暈。

我下了決心，希望能讓這個小女孩感受到家的感覺。


晚飯過後又回到這空蕩蕩的房子，她打開電腦開始瀏覽起網頁。



原來已經是二零一四年的八月，我足足死了三年。

正值暑假時份，雁婷湊巧那天要補課便遇上車禍，真倒霉。

不過幸運的是，她認識了我。

「使唔使幫你search下你女神facebook呀？我都想睇下佢咩樣。」雁婷說。

「心渝唔玩呢啲…」

心渝就和她的樣貌一樣脫俗，我死的時候她還未換智能電話呢。

「我反而想睇下呢幾年更新嘅漫畫…」我說。

「乜你都啱架？」



「基本上係仔都鍾意睇漫畫架啦！咦…你又啱？」

「梗係啦！最鍾意睇全職獵人！」

說起全職獵人，我還未等到自己的孫燒給我，便已死了，面對著休刊無止境的富奸，我恐怕死了三年都還在休刊吧。

「咁快啲開嚟俾我睇啦！」

果然不出我所料，三年時間只有他媽的數十話，到喉不到肺。

「又翻睇咗一次…蟻篇真係好神呀！」

看著蟻王牽著小麥的手的那一幕，所謂愛情的究極形態，也不過如此吧…



我和心渝有牽過手嗎？好像有吧…

那次算得上是牽手嗎…？

「淅淅？」

「係？」

「點呀，又諗起你個心渝呀？」

「嗯…」

「不過夜喇，睇咗幾粒鐘漫畫，你聽日再同我講你同佢嘅事吖！」

「嗯嗯，咁你早啲休息。」我對她說。



雁婷亦乖乖地去刷牙上床睡覺。

她蓋上了被子然後閉上了眼…

「我會唔會瞓醒就見你唔到…然後發覺你只係我幻想出嚟陪住我嘅角色…」

「諗太多喇…我係生勾勾嘅鬼魂。」

「唔好笑…」

「嗯…早啲瞓啦。」

「淅淅，多謝你…陪著我…」

「傻瓜，屋企人嚟架嘛。」

「嗯嗯，早抖。」她微睜雙眼向我報以一個淺笑。

「早抖。」