《女朋友全家變咗隻蛋》: 08
嗰位家庭主婦略略唱完之後，遞張遊戲卡俾職員：「係咪可以吸個印啦？」
總係笑面盈盈嘅白衣職員，心情好似十五十六：「呃，好似唱錯咗一句，不過我都照......」
「唱...唱錯咗！！」突然間，攤位後面嚟咗個神色繃緊嘅男人：「係赤日赤日！！！」
睇佢嘅衣著，同佢嘅吊飾......
佢係一名求導者。
佢咁樣喝一喝法，成個場嘅歡樂氣氛一時間變得安靜。
「唔好意思，你挑戰失敗......」白衣職員見到求導者出嚟指證後，就轉口風講。
「喔......唔緊要。」家庭主婦尷尬咁拎返張遊戲卡。
然後，一切如常。
咁樣睇一睇，每個攤位嘅後面，原來都有求導者睇場，但同參加者溝通嘅，最主要都係會內嘅義務員工，即係好似譚國源嗰種身份咁。
呢到四面環山，場地就好似一個年宵嘅小維園咁。從遊戲卡上見到嘅關卡睇，數字越係高嘅關卡，攤位擺放嘅位置就越係深入，人流亦相對地稀少。
轉眼間，我已經無意見到嗰個年輕嘅少女，一個人企喺第五關遊戲攤位到。
「咁快...？」我有啲愕然，因為佢可以算係第一個挑戰到求導第五關嘅人。
第五關內容，生吞雞蛋。
我見到挑戰內容，就下意識想彎腰作嘔。
到我抬返頭嗰陣，嗰女仔已經一手將雞蛋打碎，仰頭吞蛋。
蛋液慢慢流出嚟嗰下，我有十萬個不願千奇唔好係紅色嘅血漿......
好彩...
最後流落嚟嘅係正常嘅黃色蛋黃，但呢一幕都足以令我不忍直視。嗰女仔強行吞食完雞蛋後，遞張遊戲卡俾工作人員吸印，行動完全係似有目的性，而唔係享受緊重生會呢個所謂嘅「家庭日」。
因為佢比較特別，我期間一直留意觀察住佢。
見佢吞完蛋一陣過後，就跑咗過去遠處一個垃圾桶嘔吐，我諗佢都唔係太頂得順。佢嘔完之後，輕微咁喘氣，坐喺一張長櫈上休息。
「要唔要枝水。」我行過去，俾樽水佢。
佢望一望我，無任何表情轉變：「唔洗，唔該。」
我扭開樽水，離口飲咗啖：「樽水我喺出面帶入嚟。」
我咁樣講一講，佢又盯我一眼，但今次拎咗樽水：「唔該。」但佢唔係拎嚟飲，係拎嚟漱一漱口。
「挑戰得幾快。」我橫視第一至五關嘅攤位。
第一關，背唱讚頌《紅神目詠歌》。
以示歌頌教會。
第二關，戴住白兔頭套，槍殺獵人
以示人類對自然的過度殺戮。
第三關，親自到附近山上採集一朵「重生會」種植嘅彼岸花，再由工作人員磨爛成渣，混合水飲用。
以示面對死亡嘅勇氣。
第四關，持續跪拜二十四分鐘。
以示虔誠。
第五關，生吞雞蛋。
由第五關到第七關開始，彷彿一切都變得再無意義。
遊戲唔再作任何解釋，點解要咁做。
如同宋文德所講，喺一切走向極端之前，都係風平浪靜，第五關就係一個分叉口。
佢冇答啲咩，只係望望之後剩低嘅嗰兩關。
中間，我見宋文德成功著住求導袍混咗入嚟，其他人對佢都無起咩異心，可能求導者都係啲戴住袍帽嘅人，所以通常只會留意到對方嘴部至下鄂。
「各位加油喇！呢位女仔已經突破到第六關，求導七步嘅挑戰差唔多完成！就有資格留喺呢個營內一晚，然後獲主教接見。」重生會嘅女課長，忽然行過嚟我哋身邊同大家宣佈。
「咁...會唔會...可以接受「重生儀式」！？」一位中年男子問。
「當然唔可以，但獲得主教接見，正式成為「信徒」，更話唔定......」女課長神色變得詭異，嘴角嘅孤度彎彎勒起：「可以為你求導路上，指點一條明路。」
經女課長宣佈，大家參與程度更為熱烈，特別係自己一個嚟嘅成員。
原來，要從一般成員，變成為「信徒」，就要經過呢七步曲嘅遊戲。
「咳...俾返你。」個女仔俾返樽水我，且企返起身經已休息完。
「你......去挑戰第六關？」我呆呆咁拎返樽水。
「嗯。」
佢係個話不多嘅人，一眨眼就行去第六關攤位──直視紅光。
呢個活動，無意何意義、無任何解釋、無何目的，單純就叫你直視住兩顆會發出紅光嘅強燈，直到佢哋話停止。
呢個遊戲，已經好明顯同兔子人嘅「紅目」拉上咗關係。
「弟兄！」正當我想過去睇嗰陣，一直行嚟行去監視眾人嘅女課長走過嚟攔住我：「你好似一關都未過喎，走過去第六關做咩？」
「我...我想睇...下。」我說。
「心動不如行動，去挑戰一下。」女課長露出意味深長嘅微笑，令人不寒而慄。
睇嚟，女課長無俾我通過嘅意思，我只好返轉頭。而一轉身，就見到即將與我擦肩而過嘅宋文德......
喺身影交疊嗰瞬間，佢低住頭淡淡向我交代咗一句：
「你一定要拎到「信徒」資格。」
然後，佢好安全咁喺女課長身邊經過，無人對佢起異心，如同可以自出自入。
於是乎，我開始挑戰佢遊戲卡上所謂嘅「七步求導」。
背歌、射靶、採花、跪拜呢啲我都無問題，但去到第五關呢個明顯嘅分水嶺，我就開始猶豫，就連同其他人都一樣。
因為呢個，係瘋狂嘅第一步，違反你日常認知嘅第一步。
當有第一步，就會有第二步，由淺由深。
「咔」又一個人，成功將生蛋打碎放入口中。
「通關。」工作人員喺佢卡上，默默吸一個印。
我拎住手上隻雞蛋，望咗接近十五分鐘。
如果俾著係你，
你又會唔會敢做？
我.......
我...
要拯救Chloe。
「咔」
打蛋。
「咕」
吞蛋。
「嗄......」
「通關。」