《六樓B室》: 第二章 五屍命案

第二章 五屍命案

「6B阿……阿徐生佢……佢五年前已經……死咗㗎喇！」

旺叔顫抖地說出了這番話，我的心，也顫抖地、急速地跳動著。

我：「旺……旺叔，你唔好攞呢啲嘢嚟玩好喎！」

旺叔：「我個樣似講笑咩！你上網打富耀大廈搵吓啦！唔講喇，今晚要拜一拜神先。」



頂，講清楚好喎！

我進入升降機，如常按下「8」字。當見到下面的「6」字時，我的手跟心臟一起顫動著，心想：「仆街你唔好突然間停六樓呀，唔好玩呀！」幸好，驚嚇片的橋段沒有發生在我身上，有驚無險返回家中。

我立即跳上床，將被子蓋過全身，心想的模式跟小學雞一樣：「一返房大被冚過頭，隻鬼就唔會跟住嚟！」真的很怕，怕6B徐生會突然走入來。啊，救命呀！

突然，牆上傳出敲擊的聲響，「屌，真係殺到嚟！救命呀，我唔想咁快死呀！」再細心聽那些聲響，是由8A蘭姨的單位傳過來。不久又聽到蘭姨大聲講：「阿欣你死得好慘呀！」「你返嚟呀！」雖然聽到蘭姨把聲，心裡立刻感到安慰，但蘭姨的叫聲真的充滿了淒怨、悲憤，我的心仍未能平復。直至數分鐘後，叫聲才停止。

當時我已沒有時間去埋怨舊樓的隔聲為何做得這麼差，我立刻在電話的瀏覽器輸入「富耀大廈」，結果，我看到了真相。「旺叔真係冇昆我！」



網上的新聞報導，講述了五年前的五屍命案：

「土瓜灣富耀大廈一單位昨晚發生致命火警，消防員二十分鐘後救熄。現場發現五具燒焦屍體，死者身份有待確認。」

「警方指，其中四位死者是居於上址，分別是男戶主徐英 (45歲)、女戶主孫麗霞(43歲)、戶主女兒徐欣欣 (15歲) 及徐思思 (12歲)。另一位死者則是男戶主胞弟徐力 (43歲)。警方初步懷疑火警與家庭糾紛有關，暫無可疑，會由九龍城警區刑事調查隊繼續跟進。」

「警方指，單位內沒有外人闖入的痕跡，而引致火警的火水已証實由男戶主徐英所購買。有証據顯示，徐力與大嫂孫麗霞通姦，徐英報復而引起火警。」

我隱約記起五年前真的有一單五屍命案，五名死者活活被燒死，不過我並不知道這是發生在富耀大廈。還有報導指出富耀大廈之後鬧鬼，令樓價大幅下跌。唉，怪不得租金那麼便宜，只怪自己簽租約前沒有了解清楚，陸叔和豪仔又沒有主動講給我知。



我立即打電話給豪仔，大罵他隱暪富耀大廈發生過命案的事實。豪仔說不知道，真的沒有隱暪，還要玩發誓。當然，我會選擇相信豪仔多過他的表姨丈陸叔，豪仔說我現時住的8B單位，理論上不算凶宅，又不是與凶宅 (6B) 同層或上下一層，表姨丈也不算是刻意隱暪。唉，算啦，唔租都租咗，唯有硬食。但是，如果我再遇到那個「徐生」，我應怎麼辦呢？

幸好，接著的一兩天，我再沒有遇到那個「徐生」。我都講過，我平生不做虧心事，行得正企得正，怕乜俾鬼嚇？

於是，我腦海浮現了一個想法。既然「徐生」不再找我，令到我心掛掛，不如我主動出擊，主動去六樓一探究竟，釋除這個疑慮。

我再次找豪仔，叫他陪我去六樓。豪仔大叫痴線，話我好攪唔攪攪鬼，我罵了他一聲「廢豪」就收線。好，我決定獨闖六樓。

※※※※※※※※※※

今日我沒工作，是時間去六樓探一探「徐生」。當我離開屋企，望一望升降機，「頂，又停喺六樓！」我的心臟又立即急速跳動。有人可能會講「你唔俾係6A有人出入㗎咩」，但這兩天我問過標叔，自從6B單位出了事之後，6A的那個租客已急速走人，寧願蝕幾個月租金都不住在凶宅隔鄰，之後就一直空置。即是說，現在6A和6B也沒有人居住！升降機經常停在六樓，根本就是不可能的事。

好，不知那裡來的勇氣，我一入lift，就按下「6」字，死就死啦！lift門打開，是六樓，基本格局與其他樓層一樣。我一踏出升降機，我就開始頭暈，暈得很不舒服，有種天旋地轉的感覺。

「唔係咁猛吓話！」



我立即轉身襟lift掣，頂，升降機剛剛走了。我暈到就來企不穩。

無辦法之下，我慢慢行入後樓梯，暈眩的感覺開始減少。正當我回過神之際，突然後面有人拍我膊頭……