《六樓B室》: 第三章 初次相遇
第三章 初次相遇
「媽呀，唔好攪我後面呀！」當時我好低能地說出這句。「喂，唔使驚，我係人嚟㗎！」後面的人跟我說。我慢慢回頭一望，真的是人呀！
他是一個年紀和我相約的男人，是我搬入富耀大廈兩個星期以來從未見過的人，應該不似是住客。他說不方便在這裡說話，叫我和他一起下去，慢慢再講，並多次說他沒有惡意。這和飲醉了酒的人說自己沒醉有甚麼分別？不過肉隨砧板上，我只好聽他的意思去做，跟他一起下樓梯。
慢慢，我暈眩的感覺已逐漸消退。來到G樓，他刻意經後門出，以避開標叔，不被其他人發現。他似乎很熟富耀大廈的路，他又不似是住客，真的很有問題。最後我們去了附近的一間茶餐廳，坐下來慢慢傾。
神秘人：「今日你見到我嘅事，千祈唔好同人講出去。」
我：「我點講出去，我又唔知你係邊個？」
神秘人：「你叫我細賢啦，呢個係我pass。」
這是一張警察委任證。真的，我真的很久未見過警察會出示委任證。我看到他叫梁傲賢，是一個普通警員。
細賢：「我係九龍城嘅CID，之前一直調查富耀大廈6B嘅五屍命案。你係咪又嚟發掘啲無聊靈異事件？」
我：「我係新搬嚟㗎，住喺8B，叫我阿傑啦！」
細賢：「你無端端去六樓做乜嘢！」
我：「咁你又無端端上去做乜，五年前嘅案乜都完啦。」
細賢：「你係咪想知我點解會上去查案？」
我心諗：「我唔想知㗎，但我勝在得閒，聽吓佢講乜都好。」
我：「想呀，我會保守秘密。」
細賢：「當年單案，話晒都死咗五件，但查咗唔夠一個禮拜就close file，然後就好肯定咁對外講係徐英放火，冇可疑。」
我：「係呀，報紙講係徐英個細佬徐力勾大嫂，徐英戴帽，一怒之下攬炒吖嘛！事情都好合理，我戴帽嘅話都有可能會咁做！」
細賢：「五條人命呀，好好醜醜都問吓徐英、徐力同孫麗霞啲共同朋友呀，親戚呀，了解一下三者關係，係咪真係如外界所講。但我哋team人，淨係問富耀大廈嘅住客，問到個似樣嘅原因就草草結案，唔係咁做嘢吓嘩。」
我：「你講到你好似唔係呢team人咁，你反映俾你老頂聽啦。」
細賢：「肯聽就唔使咁啦，我再講我驚冇得紮。」
我：「咁你查成點吖？」
細賢：「得我一個人查，平時返工已經好忙，放假先嚟查，查唔到好多。你係咪有興趣一齊查呀？」
我：「我有興趣知但冇興趣查喎。」
細賢：「屌，套我講咁多嘢，幫吓手都唔得。」
我只講過我想知但你可以選擇不說，我沒有「套」你講呀！
如是者，我和細賢傾了很久，一路食一路傾。我很喜歡說話，他也喜歡，我覺得我們應該「做到friend」。
當我食完最後一啖飯，我留意到茶餐廳裡面一個有趣的情景：餐廳內所有雄性動物都望著同一個方向。於是身為雄性動物的我，也自然地跟著大家的視線，望向那個方向。原來有一位雌性動物，旁邊的衫鈕甩了兩粒鈕，露出了白滑的纖腰，以及粉紅色的乳罩。
我正打算提醒細賢望向他十點鐘方向之際，原來他一早已經聚精會神地欣賞著，自私！我再望一望茶餐廳裡面的雄性動物，大家的視線真的完全沒有離開過這位走光少女，我開始對走光少女心生憐憫。於是，我除下我的外套，準備走過去幫她蓋好。
細賢：「唔好多事啦，你唔似咁正直喎。」
我：「人渣，卑劣！」
我冒著被她當成色狼的風險，慢慢走過去走光少女那處。我為她披上外套，她回頭一望，這是我和她的第一次眼神接觸。
走光少女：「做咩呀！」
我：「對唔住呀，我見到你有啲衫鈕甩咗，所以幫你遮住。」
走光少女望一望她的兩側，發現了走光的地方。
我：「對唔住，我冇心睇到㗎，你想鬧就鬧我喇。」
走光少女再望一望我。這是我們的第二次眼神接觸。
之後，她向我報以微笑。這個笑容，是我一生中見過最甜美的笑容。
走光少女：「俾你電話我。」
我：「吓！」
走光少女：「你電話呀。」
我遲半拍地拿了電話出來，並解了鎖，她輸入了她的電話號碼。即是，我無意地抄了牌。
走光少女：「遲啲我還返件衫俾你啦，唔該晒！我走喇，拜拜！」
我呆站在原地，目送這位女神級的少女離去，心情久久未能平伏。
細賢：「啊，你都幾好嘢。」
我：「幸運女神永遠都企喺正義嗰邊。」
甚麼撞鬼、甚麼五屍命案，全部都抛諸腦後，我的心現在只有這位女神。
※※※※※※※※※※
回家後，急不及待whatsapp女神，相約下次見面的時間。只可惜，由下午兩點等到夜晚十一點，都未等到女神回覆。明顯是藍剔，但她已讀不回，我由開心、期昐，變成失落、沮喪。甚麼是心情好像坐過山車，今日真的完全體會到。
我望著她whatsapp個人頭像的相，她真的很美麗，目測只有二十一、二歲。我呆望她的相接近半小時，為失落的心情帶來少少安慰。
我正準備睡覺之際，訊息聲響起，我即刻仆過去拿手機。「屌，係豪仔！」之後我用文字喪鬧豪仔乜乜乜。講真，他真的很無辜，他只是不跟我一起去鬧鬼的六樓，沒有做過對不起我的事，就被我鬧得狗血淋頭。
由於第二日要返工，鬧完後就繼續睡覺。不到十分鐘，訊息聲再次響起，我再次仆過去拿手機，這次真的是女神回覆。
女神：「唔好意思呀 咁耐都冇覆你」
我：「唔緊要 係咪好忙？」
女神：「係呀 其實我今日去土瓜灣 係約咗個大學同學做project 依家啱啱先返到屋企」
我：「原來係咁 我叫阿傑 你叫咩名」
女神：「叫我Hailey啦」
我：「真係一個好好聽嘅名」
Hailey︰「😄😄」
我：「今日真係唔好意思 我係咪好多事？」
Hailey︰「唔會呀 我好多謝你呀」
我：「幾時得閒出嚟 俾返件衫我呀？」
Hailey︰「冇咁快 我都要洗乾淨先俾到你」
我：「唔使洗㗎喇 著過喺你身上都應該係香」
Hailey︰「🤭🤭 想笑死我咩」
我：「你冇聽過咩 靚女痾嘅💩都係香㗎咩」
Hailey︰「夠喇夠喇 我下個禮拜六會再嚟土瓜灣傾project 到時我再約你啦」
我：「一言為定」
結果，我當晚完全睡不著覺，一直都記掛著Hailey。
第二朝，睡不著都要起身返工啦。搭升降機落地下大堂，一出lift，嚇到我彈回入lift。我、我又見到「徐生」呀！