《六樓B室》: 第八章 舊居之謎
第八章 舊居之謎
沒錯，Hazel的嘔吐物不幸濺中了利仲謀的外衣。
利仲謀的左右護法大為緊張，一個忙於為利仲謀清理污跡，另一個則擋在利仲謀面前，不斷斥責我們。
利仲謀沒有發怒。他望見了我們，知道有人喝醉，不小心嘔向他的外衣，第一句就是問：「小姐，你冇事吖嘛，做乜飲到咁醉呀？」
他對突發事件的反應和臨場應變，比起他的兒子利智傑，不知好上多少倍。記得當初我向利智傑擲雞蛋，他的反應甚大，一副狼狽不堪的樣子，還在眾目睽睽下對我破口大罵，完全欠缺了風度和斯文 (我好像在說風涼話)。
我：「對唔住呀利生，我朋友整烏嘈咗你件衫。」
利仲謀：「唔緊要，小意思。」
利仲謀保鑣：「利生，我叫人喺公司攞件新衫俾你啦。」
利仲謀：「唔使咁麻煩喇，公司喺中環咁遠，小問題，唔好攪咁多嘢。我地上去啦。」
利仲謀應該是剛剛到來，正準備他每月一次的念舊活動。於是，我鼓起勇氣對他說：「利生，我同你身形相近，如果你唔嫌棄嘅話，不如我返屋企攞件衫俾你換啦，我就住喺樓上8B，我啱啱新搬嚟冇耐。」
利仲謀：「你講到咁，我拒絕你即係代表我嫌棄你啦，哈哈！好，唔該晒你喎後生仔。你先送咗你朋友返屋企先啦，如果你唔介意，陣間嚟四樓搵我，或者我叫同事上八樓搵你都得。」
我：「唔使，係我地整烏嘈你，我親自落嚟俾件衫你啦，你等我。」
於是，我繼續扶Hazel回家，先送她回家。我成功從Hazel的手袋之中找到門匙，成功入屋，亦成功將她放在床上。
我見Hazel已經失去了知覺，似乎已睡著了。此時此刻，我才認真直望Hazel。今晚她穿了一件領位很闊的鬆身Tee，配襯一條短褲。由於是鬆身Tee，所以剛才由便利店到她家，都沒有特別去留意。
但現在躺在床上的Hazel，由於領位太闊，鬆身Tee已被拉低了少許，右肩變成了跌膊裝，右胸還露出了「北半球」，和少許事業線。我可以發誓，我真的沒有刻意這樣做，只是那件Tee真的很鬆，剛才放她在床上時不小心弄低了一些。
我心跳又開始加速了。唉，怪我滿腦子又是一大堆壞思想，但單身狗如我，在這種情況之下，很難不想太多。
不，我要趕緊去找利仲謀，正經事要緊。但我看到Hazel鎖骨附近的位置有她自己的嘔吐物，於是我立即去浴室，弄濕她的面巾，再幫她拭抹。
我小心翼翼，君子地抹去鎖骨上的污物，盡量不碰那些不該碰的部位。過程中一直在冒汗，情況就好像一個正在幫病人做手術的外科醫生一樣，可惜沒有人幫我印汗。好，總算完成，乾淨晒！
為她蓋上被子之後，我趕緊離開Hazel屋企，去做我要做的正經事。離開時，真的有少少依依不捨，如果我不是要去找利仲謀，我可能會留下來，慢慢欣賞Hazel那美麗的胴體。
※※※※※※※※※※
我立刻飛lift上我自己屋企取衣，再飛lift落四樓找利仲謀。到達四樓時，已見到其中一個保鑣在門口站著。他示意我將衣服交給他，並說遲些洗乾淨後會還給他。他這樣擋在門口，我根本沒法入屋。
不久，從4B屋內傳來利仲謀的聲音：「俾佢入嚟啦，過門都係客。」於是，保鑣開門讓我入內。
第一次來4B單位，感覺真的返回三十幾年前的年代。老舊的木製衣櫃，中間一格是透明趟門，放置了茶杯；也有木製的椅子，旁邊有數張摺起了的舊摺椅，還有破損了的紅A膠桶作點綴；最美妙的，就是那台舊式電視機，只會在舊片才會見到的老爺電視機，還有舊式收音機，收音機還附設了卡式盒帶機……
對我來說，屋內每一件都是古董。而且，有一種很溫暖的感覺。
利仲謀：「係咪冇見過呢啲嘢呢？睇你個樣都似係廿幾歲。」
我：「係呀，未親眼見過，舊片入面就見得多。」
利仲謀：「你會睇舊片？我仲以為依家啲後生仔淨係睇Marvel。」
我：「我好鍾意睇港產片㗎，基本上八十年代到依家嘅港產片我都有睇。」
利仲謀：「係呀，我就係大約喺……喺三十五年前搬走，所以呢啲裝潢，全部都係七、八十年代，我冇改過任何嘢㗎。」
我：「利生，唔好怪我八卦，其實一個月前我喺樓下撞見過你，覺得你熟口面，於是問吓啲街坊，從佢哋口中知道你同富耀大廈嘅關係。你每個月嚟一次舊居呢度，究竟係為咗咩？」
利仲謀：「後生仔，你一生人搬過幾多次屋？」
我：「吓，你咁樣一問，我要諗諗……好似係三四次啦。」
利仲謀：「你仲記唔記得你小學嗰陣時嘅舊居係點？傢俬、擺設、房間格局係點？」
我：「嘩，咁耐，冇印象喇，少少記憶啦，有時睇返啲舊相就會記得吓。」
利仲謀：「我每一間住過嘅屋，我都記得清清楚楚。我細過已經住大屋，仲要試過由三千呎複式單位，搬去八千呎獨立屋。之後就一下子搬來這裡，一個二百零三百呎嘅單位，之後再搬返去幾千呎嘅獨立屋。」
我：「嘩，轉變實在太大。」
利仲謀：「但我過得最開心嗰段時間，並唔係八千呎獨立屋，而係我住喺富耀大廈呢五年。生活雖然艱苦，但我同我老婆過得好開心。因為嗰段時間我老婆要同我一齊捱，所以我知我要做得更加落力，唔可以再俾佢同我一齊受苦。呢度對我嚟講，係有好重要嘅意義。」
我：「明白。我係外人，如果唔知咁多嘢，真係會好難明白。」
利仲謀：「年輕人，了解多啲你身邊嘅人，身邊嘅事。一個你住過嘅地方，點都會有些少感情，點可以話忘記就忘記。」
我：「知道。同埋，利生，你叫我阿傑啦！」
利仲謀：「你全名叫譚志傑吖嘛！」
甚麼？為何他會知我全名？莫非，我的身份已被識破？
利仲謀：「我頭先第一眼見到你，已覺得你好面善，後尾我記得你就係丟雞蛋嗰個男仔。」
我：「原來你已經知道。」
利仲謀：「我個仔當眾俾人丟雞蛋喎，我點會唔搵人查你。後來知道你丟雞蛋嘅目的，我就叫智傑唔好攪咁多嘢喇，多一事不如少一事。」
我：「你有冇話怪我呀利生？」
利仲謀：「怪你就唔會叫你入嚟坐，仲同你傾偈啦！嗰次收購行動，智傑係做得太急進，可能我曾經同佢講過唔好拖太耐，佢就做衰嘢去迫啲小業主，佢有唔啱㗎。」
我和利仲謀，一個是一事無成的廢青，一個是香港十大富豪，竟然可以Connected。和他談了很久，直至他說要換上我的外衣，我才中止了對話，返回自己的家。
我覺得利仲謀對人很真誠，也沒有架子，很難想像他會收藏著某些驚世大陰謀，更加不會和6B的五屍命案有關。唉，到頭來也是沒有頭緒。
※※※※※※※※※※
某日，我們三人又再研究案情。我將當晚遇見利仲謀的事講了給他們聽，細賢說我太容易相信人，利仲謀是見慣世面、老謀深算的富豪，未必會對我講真說話。更何況，細賢覺得利仲謀好像好刻意引我去4B單位，去讓我看到一些預先設計的場景。
Hailey︰「或者咁講，你就當利仲謀係好人，但亦唔排除佢係為咗某人去掩飾一啲嘢。如果我哋覺得五屍命案有疑點，6B單位有問題，旺叔係被安排去隱暪真相，而指使者真係利仲謀嘅話，咁你哋覺得，佢最有機會幫邊個去掩飾？」
我：「仲使講，梗係佢個仔利智傑啦！」
細賢：「都好，我哋可以咁樣假設住先。我會再叫情報科朋友，調查一下利智傑同徐氏一家有冇關聯。阿傑你幫我哋再留意一下羅醫師，Hailey你都試吓繼續喺蘭姨口中套吓料。」
我、Hailey︰「OK！」
要我再去羅醫師那裡調查，根本就是沒可能的事，我已被醫館放進了黑名單。當然，我其中一個優點就是面皮厚，試試向羅醫師負荊請罪，看看他會否原諒我。
※※※※※※※※※※
某日中午，趁羅醫師完成了上午的症之後，我帶同一打、每件價值二十大洋的西餅，前來醫館謝罪。羅醫師見我真誠前來道歉，我再美言幾句，羅醫師似乎很受落，他便原諒了我。好，只要我夠阿諛奉承，應該不難從他身上套到資料。
此時，一位伯伯走入醫館，看他的樣子估計已有八十歲。職員對伯伯說已過診症時間，請他下午再來。伯伯說昨天來過，經羅醫師治療之後，今日膝痛反而更痛。
羅醫師說這是正常，濕毒發出時會有少許不舒服。伯伯說他從未試過看醫生後會更痛。可能是這句觸動了羅醫師的神經，羅醫師大發雷霆。
羅醫師：「阿伯，你質疑我你就唔好嚟睇我，我話冇嘢就冇嘢。你又識幾多，你睇吓我牆上面啲證書先啦！」
伯伯：「我……我唔係質疑你，我……我嚟問吓你點解會咁者。」
羅醫師：「咁你依家知啦！你一係聽日照常嚟覆診，一係就過主，唔好阻住我睇症，我仲有大把病人要睇。」