《六樓B室》: 第九章 少女閨房
第九章 少女閨房
我見伯伯一副無奈的樣子，步履蹣跚地、絕望地離開醫館。羅醫師真的很有性格，會罵走自己的病人，而且說話都幾難聽。
還有，我偷偷聽到了羅醫師，細細聲、自言自語地說：「個阿伯過多幾年都拜拜啦，仲咁多嘰趷，咁多人死又唔見佢死！」我當堂O嘴，完全不相信他會說出這種涼薄的話。他以為沒人聽得見，因他真的說得很輕聲，但他不知我有順風耳，很細聲也能聽得到。
既然羅醫師為人那麼心胸狹窄、涼薄，蘭姨罵他仆街真的有根有據，亦令我更覺得他有古怪，說不定真的和五屍命案有關。
我：「羅醫師，我有腰酸背痛係真嘅，感覺身體真係唔好，你地武館嗰邊有冇啲初階武術班，俾我呢啲初學者去學？」
羅醫師：「你問得啱時間，成人初階武術班上星期先招生，依家應該仲有位，你晏晝好過去報喇，我驚冇位。」
我最終成功報讀了他們的「成人初階武術班」，希望從中可以查到線索。唉，從羅醫師身上攞料，成本真的很高。
※※※※※※※※※※
某天晚上，我如常在七仔享用我的晚餐。很期待會再次在這裡碰見Hazel。事實上，自從發生上次她喝醉、送她回家的事件之後，我再沒有和她聯絡過，因為我根本沒有她電話，而我又未試過在大廈出入時碰見她。可惜，今晚便利店未有她的足跡。
回家後，我又是如常地洗澡，原以為會過一個平凡的晚上。突然間，我聽到有人按門鐘，我就知，今晚會變得不平凡。
我高聲說：「邊個呀，我沖緊涼呀，等等啦！」
我快速地穿上內褲和短褲，上身赤裸地出去開門，按門鐘的，原來是Hazel。她也好像剛洗完澡，頭髮還未乾透，穿著小背心短褲，踢著拖來找我。
我：「咦，係你呀Hazel。Sorry，我衣衫不整。你搵我？」
Hazel︰「係呀，唔通我出錯lift，襟錯鐘咩！」
我：「你啱。入嚟先講啦！」
Hazel︰「你可唔可以落嚟我屋企，幫我一個忙呀？」
原來她剛洗澡時，企缸的去水位塞了，去不到水，又不方便找其他人幫手，所以想起我。莫非她覺得我有做渠王的潛質？好，有靚女叫我幫手通渠，當然「𦧲飯應」啦！
我穿回上衣，拿了廁所泵，便跟Hazel下去。幾天前才來過，但當時時間很趕，沒有花時間去留意她家中的細節。她的客廳有少許凌亂，但不知為何，總嗅到一股很香的味道，很有少女的味道。
她浴室的企缸去水位只是例牌被頭髮阻塞，「三扒兩撥」已經通到。原來我真的有潛質做渠王！
剛剛通完渠，正想出廳和她示意渠已經通好，一個「Red Object」正高速向我身上飛來。幸好我伸手敏捷，一手接住。飛來的原來是一罐可樂。
Hazel︰「可樂啱唔啱！」
我：「唔啱，啱啱先喺七仔飲完，唔飲喇。」
Hazel︰「你真係好鍾意去七仔㗎喎！」
我：「你都係吖！」
Hazel對著我笑。想必她也是笑我們之前兩次相遇，都在七仔裡面發生。
我：「你同呢座大廈嘅人唔熟㗎咩？點解淨係諗起我？」
Hazel︰「其實我都係搬咗嚟半年左右，同呢度啲人唔係好熟，同埋啲人都係怪怪哋，得你一個比較正常。」
我：「我都係咁覺得，呢度好多人都怪怪哋，雖然初時我都覺得你好怪。」
Hazel︰「係咪因為見到我同條仔當街打車輪，同當街飲醉酒呀？」
我：「係呀，但今日冇咁覺得噜。」
Hazel︰「即係變咗一個會搵男仔幫手做嘢嘅女仔，就唔怪喇，變返正常喇！」
我報以一個微笑，也是苦笑。Hazel真的很特別，在言語間會和人針鋒相對，性格率真，又不怕別人眼光……
Hazel︰「喂，你真係唔飲嘢喇？」
我：「有冇啤酒？」
Hazel取了她雪櫃僅餘的一罐啤酒給我。一見到啤酒，我就想起上次她在便利店喝醉時的情況。
我：「你……你依家冇野吖嘛？」
Hazel︰「吓，我有咩嘢呀？你指我之前條仔偷食？」
我：「咁冇嘢喇。聽你口吻，你心情應該平復咗。」
Hazel︰「仲好，俾我一次過睇到我兩個最親嘅人出賣我，令我死咗條心。當我冇識過佢哋，唔使再諗，醉咗一次就冇嘢。」
我：「咁就好喇！」
Hazel︰「多謝你呀阿傑，嗰晚送我返嚟。」
她突然講多謝，還叫我的名字，令我有少少手足無措。
我：「哦……小意思，唔可以揼低我個怪鄰居嘛。」
之後我講解當晚的情況，原來Hazel在我送她回富耀大廈的途中已斷了片，她並不知道她嘔在利仲謀身上。
Hazel︰「阿傑，可唔可以幫多我一個忙？」
我心想：「莫非Hazel仲有渠要通？嘻嘻！」
原來她想我幫忙換她睡房的燈泡。也是簡單事。
不知為何，這座舊樓的樓底很高，就算我有182厘米的身高，也要企在高椅上才能觸碰到天花板的燈泡。
我除下舊燈泡，並示意Hazel拿新燈泡給我。由於當時我居高臨下，可以說是一覽無遺，大家應該明白我想表達甚麼 (見到個型同黑bra，冇其他嘢)。其實我有些詫異，Hazel身形蠻瘦，但應大的地方就大 (雖然冇Hailey咁大)。怎樣才可會有這種比例？
正當我陶醉於Hazel的美麗身形之際，我聽到附近有吵架聲。我問Hazel聽不聽到，她說見怪不怪，這是由樓上4A單位傳出來的。4A單位住了一家三口，黃生黃太經常吵架，一吵就最少吵兩三個字，有次更吵足一小時。Hazel覺得他們的兒子軒仔很可憐，生長於一個這樣的家庭。
我：「我都話呢棟大廈啲住戶怪㗎啦，又一例證。5A陳生陳太又係怪㗎，扮鬼嚇我。8A蘭姨又係，不過佢真係有精神病嘅。」
Hazel︰「係呀，其實我唔驚呢棟大廈死過人，但我介意呢度啲人好怪。我打算死約一完，我就同陸叔講我唔租喇。」
我：「咦，呢度係陸叔租俾你㗎？」
Hazel︰「係。」
原來陸叔在富耀大廈有兩個單位收租，說不定他會知道一些甚麼重要資訊。好，明日打去找陸叔傾傾。
我：「如果你搬，我連唯一住喺呢度嘅意義都冇埋。」
Hazel︰「我唔受呢一套㗎，你咁講唔work㗎。不過……」
我：「不過咩呀？」
Hazel︰「我都鍾意聽嘅。」
看來Hazel是一個外冷內熱的女仔，剛剛我好像有少許打動了她那顆冰冷冷的心。不對，我不可以繼續這樣，我的心只有Hailey。
4A黃生黃太終於都吵完架，歷時二十分鐘。我也喝完我的啤酒，回家休息。
※※※※※※※※※※
翌日早上，我打電話給陸叔。
我：「陸叔，阿傑呀。」
陸叔：「喂傑仔。做咩咁早打俾我呀，間屋係咪有咩問題呀？」
我：「唔係，間屋好好，傢俬又新正。不過你3A個單位唔得，條渠塞咗。」
陸叔：「吓，你又知3A條渠塞咗？同埋，你又知3A係我嘅？」
我：「有幾難呀？你租咗俾個後生女，我一早已經識咗佢啦！」
陸叔：「好嘢，效率高，高過宅男豪仔好多！」
我：「3A條渠我幫手通咗喇，你唔使煩。係呢，查實你喺富耀大廈仲有冇其他單位？你份人似係禾稈冚珍珠。」
陸叔：「哈哈，冇喇，我都係靠呢兩間屋收租，過埋呢下半世喇！富耀大廈最大嘅業主，其實係利仲謀。你識唔識利仲謀係邊個。」
我：「知啦，十大富豪吖嘛，我仲喺富耀大廈撞過佢。」
陸叔：「唉，其實想當年，我差啲俾利仲謀玩死。」