《六樓B室》: 第二十七章 分手收場
第二十七章 分手收場
細賢打算在旺叔電話入面裝上間諜app。
我：「應該冇問題，豪仔最近幾年都係做緊電話app同系統保安嘅嘢，詳細我唔知，可能要問問佢先，但九成冇問題。」
細賢：「我就當豪仔做得到，我想佢控制旺叔電話睇到嘅六樓CCTV畫面，將實時畫面換成預設嘅畫面。之後我哋就趁機走入六樓範圍，試試係咪真係有迷魂氣體呢回事。就算我哋有觸及紅外線之類嘅偵測，旺叔收到警報，佢即刻開六樓CCTV個畫面睇，見到冇人，佢就會覺得係誤鳴。」
我：「OK喎。咦，唔係喎，佢有機會開工嗰陣check番座頭個CCTV，到時佢咪見到有人入去六樓囉！」
細賢：「係，我有諗過。富耀大廈嘅CCTV錄影片段係儲存喺地下座頭位置，可以隨時睇返之前嘅片段。我之前諗過趁日間標叔去巡樓嘅時候，喺部機落手腳，但難度太高，座頭本身都有CCTV影住。依家係有少少搏旺叔相信佢電話見到嘅片段，相信係誤鳴，或者係有老鼠之類嘅嘢經過。富耀大廈都曾經試過有鼠患。」
我：「屌，你做乜講呢度有老鼠，我最驚就係老鼠。」
細賢：「屌你唔好咁細膽啦。講返旺叔先，就算佢做事真係好小心，當更嗰陣即刻喺座頭check返CCTV嘅片段，見到嘅都只係兩個影。我研究過，個鏡頭雖然冇死角，但由後樓梯嗰邊入，見到嘅嘢係最少，佢未必會即刻聯想到我哋。」
我：「好，點都要做㗎喇，我再同豪仔傾吓。我覺得最難係氹旺叔裝個間諜app，因為旺叔太小心，一定唔俾人掂佢部電話。」
細賢：「你實有方法嘅！」
細賢講完這句說話之後，我聽到升降機的開門聲，心想：「仆街喇！」我立即將防毒面罩收在衣櫃入面，然後和細賢扮若無其事，閒話家常。
Hailey用我最近給她的門匙開門。對，我將我家的門匙給了她，以方便她來我家過夜。她最近經常在醫院陪伴蘭姨，翌日有早堂要上的話，她一定會來我家睡。
Hailey︰「咦，細賢你嚟咗！」
細賢：「係呀，見最近案情冇乜進展，咪上嚟搵阿傑吹吓水囉，可能搵到靈感嘛！」
我：「冇啦，吹水為主，想搵少少線索都冇。」
Hailey︰「唔緊要啦！喂，我買咗糖水食，但我唔知細賢你嚟，冇預你喎！」
細賢：「唔使客氣喇，我都差唔多要走喇。係呢，蘭姨佢點呀？」
Hailey︰「都係咁囉，未醒呀。」
細賢：「你都唔好咁擔心喇，蘭姨會冇事嘅。我真係要走喇，拜拜！」
Hailey、我：「拜！」
細賢離開後，Hailey準備去沖涼。我一直將注意力集中在衣櫃裡的防毒面具，怕她會無故開我的衣櫃，被她發現我們查案。所以我多由相反方向和Hailey說話，避免她留意衣櫃的方向。
我：「今晚做乜咁早返？」
Hailey︰「係呀，我見蘭姨都係咁，冇乜進展，聽朝又要present，我咪早啲返嚟預備present嘅嘢囉。你係咪嫌我咁早返，阻住你同細賢吹水吖？」
我：「唔係，梗係唔係啦，我點會咁諗！」
因為我身有屎，所以在對答上有些不自然。Hailey察覺得很快，已知道我在說謊。
Hailey︰「古古怪怪咁。啊，我知喇，你係咪收埋個女人喺度？你同佢偷緊情，見我返嚟佢就匿埋，一定係。」
我：「痴線㗎咩，頭先細賢喺度㗎，點偷情呀？」
Hailey︰「我點知你呀，可能你哋約埋一齊玩3P呢！」
痴線的嗎？有時女人就是這樣不可理喻。
Hailey︰「哼，個女人一定匿喺衣櫃之類嘅地方。」
今次仆街了，她一想就想到衣櫃。
Hailey說完之後，立即衝過去衣櫃，我想阻止也阻止不了。
她打開衣櫃，發現沒有人，於是就關掉它。幸好我將防毒面罩收得夠入，她又沒有仔細去找，因她只是想找「女人」，她發現沒有人在衣櫃，就自然會找其他地方。
Hailey再找廚房、廁所、床底的地方，當然沒有任何人啦。她隨即放下心頭大石。Hailey的疑心，真的超出我想像。
Hailey︰「算你冇對我唔住啦！我沖涼先喇！」
快些去洗澡吧！
可是，冷不提防，我那部與細賢和豪仔聯絡、用作查案之用的舊電話，被我放在飯枱上，剛才忘記收好它。Hailey最終發現了這部電話。
Hailey︰「喂，呢部電話邊個㗎？我未見過嘅？」
我：「以前我部舊電話囉。頭先我同細賢傾開電話呢個話題，咪攞出嚟研究吓囉！」
Hailey很明顯不信我的說話，按了Home鍵，發覺有訊號，証明我講大話。
Hailey︰「你講大話！你係咪用呢部電話，同第二個女人聯絡？」
Hailey一直都以「我有第二個女人」的角度去思考。正正因為這樣，反而令我放心一些，因她還未發覺我們繼續查案這回事。
我：「Hailey，你唔好咁敏感啦，我冇第二個女人呀，你放心啦。我頭先係講咗大話，sorry呀！」
Hailey︰「咁你做乜無端端用另一部電話吖，你有咩係唔俾得我知！」
我：「冇嘢呀，我收埋好多AV片喺部電話入面，得閒咪攞嚟睇吓囉。呢啲嘢我就係唔想你知嘛！」
Hailey︰「咁你解鎖俾我睇吓入面有啲咩！」
Hailey真的咄咄逼人。作為一個女朋友，我覺得不需要做到這個地步，雖然自拍拖以來，我覺得Hailey真的是一個非常痴身、又疑心重的女仔，但她今晚的行為真的有點過了火。
不，她真的是對頭人派來的臥底，所以才歇斯底里地向我步步進迫。如果單純以她的性格來看，她一定不會這樣做。好，我不可以坐以待斃，我要還擊。
我：「你好喇喎，夠喇！你想迫我迫到幾時呀！我都話我冇其他女人，你識我嘅為人根本唔會咁，你都唔信我。你唔信我，我講咩都冇用。」
Hailey︰「如果你冇其他女人，你怕咩俾部手機我睇！」
我：「咁亦都唔代表我一定要俾晒我所有嘅嘢你睇，唔通你連少少私隱都唔俾我！你唔好咁野蠻好喎！」
Hailey聽了我這句說話，開始流下淚來。
Hailey︰「你話我野蠻？嗚……嗚……」
女人一喊，我就會有點手忙腳亂。不，我不能自亂陣腳，要冷靜面對。
我：「Hailey，係咪蘭姨嘅事令你心情唔好，令到你咁敏感？係我冇好好體諒你，Sorry！頭先我語氣係重咗。」
Hailey︰「我冇敏感，係女仔都唔想自己男朋友有嘢隱暪住自己。如果你係愛我，你就打開部電話，俾我睇吓你入面只係收埋啲AV片，冇其他嘢。咁我就安心喇！」
Hailey的一句「隱暪住自己」，立即觸動了我的心靈。由我開始懷疑Hailey是「徐欣欣」，到後來懷疑她是對頭人派來的間諜，以及在我們拍拖之前就在我電話裝上間諜app，我覺得Hailey有很多人隱暪著我，令我非常苦惱。如今聽到她說我隱暪著她，我立刻無名火起。
我：「我隱暪你？你又幾時有坦承對過我？」
Hailey︰「你講咩呀？」
我：「我已經知道你喺我部電話裝咗間諜app。點解你要咁做？你真係咁缺乏安全感？」
Hailey知我踢爆了她，她一時無言以對。好，這就完全証明間諜app一定是她裝上的。
Hailey突然捉住我的手，哭著對我說：「對唔住呀，我唔想㗎。可能我真係太緊張我哋呢段感情，我唔想冇咗你，唔想你有第二個，所以我先裝個app，check住你send出去嘅message，睇吓你有冇出軌。」
和豪仔講的一樣，女仔真的會因這個原因而在男朋友電話上裝上間諜app，以防他們偷食。當然，我不會再相信Hailey，我已對她徹底失望。
我：「你唔好再解釋喇，個app係喺我哋正式拍拖之前已經裝咗，你唔好再用呢個藉口。講，究竟你係咩人？你根本就唔係我哋嘅同伴，而係我哋嘅敵人。」
Hailey︰「你講啲咩呀，咩敵人呀，我係你女朋友呀！」
我：「你根本係對頭人嘅人！」
Hailey︰「你係咪痴咗線呀，咩對頭人嘅人呀！」
我：「你根本冇鍾意過我，你一直利用緊我對你嘅愛，去進行你嘅工作，目的一定係阻止我同細賢嘅調查。」
Hailey︰「冇呀阿傑，我好鍾意你㗎，唔通你一啲都感覺唔到？」
我：「我都分唔清，究竟你對我嘅愛，係真，定係另有目的。我唔想再諗喇，呢一兩個月嚟已經纏擾咗我好耐，係邊個嘅錯都好，我都想冷靜下。Hailey，你走啦，我唔想見到你！」
Hailey仍然不相信我會說這樣的話，不停地哭泣著，但沒有走的意慾。
我：「我唔想再講第二次。」
Hailey︰「你咁講係咩意思？即係分手呀？」
我狠心地說：「既然你咁問，我就答『係』啦！」
Hailey含淚離開。
※※※※※※※※※※
我和Hailey一起未夠一個月，就嗌交收場。
其實我不想講分手，我只想暫時冷靜一下，但Hailey問我是不是想分手，我就順勢答了「是」。唉，究竟我在做甚麼？
就算她做錯了事，行為有異常，疑心很重，我仍然堅信我是很愛她的。而我也感到她對我是真心的，可能當中她有苦衷，但為何我要如此狠下心腸、對她說出這樣的話呢！
不，她是對頭人的人，不可有半點憐憫之心。
難道，查案真的那樣重要？還是我根本不夠愛她？
我的心真的很亂很亂….…
我立即whatsapp細賢，說出剛才發生的事。
細賢：「不如算啦 唔好再查 我唔想查案嘅嘢影響到你哋」
我：「事情已經嚟到呢一步 我唔想放棄 如果俾著係我以前 有女大個天 女友仲要係Hailey呢啲高質嘅女仔 但呢幾個月 我同你一齊查案 發覺事情冇想像中咁簡單 我唔想放棄」
細賢：「bro 我唔知可以講啲咩好」
我：「如果依家邊個放棄 就正衰仔」
細賢：「好 如果之後發現我哋怪錯咗Hailey 我死都幫你氹番佢返嚟」
我：「唔好講呢啲喇 講返查案先啦 我一直都覺得件事唔係咁簡單 我驚再查落去 反而會影響到你 我本來就係一個單身寡佬 錢又冇 事業又冇 件事係點對我都冇影響 你唔同喎 你人工高福利好 如果有乜差池 你會一無所有」
細賢：「我一早就豁咗出去啦 如果我怕呢啲 我一早就聽咗何sir講 唔再查落去 每日無驚無險準時收工啦 屌 最多咪唔撈 轉行囉」
我：「好 但我哋一定要安全」
細賢：「係」
我和細賢決定繼續查下去。
細賢會再叫情報科的朋友，繼續幫手跟蹤利智傑，但要盡量低調，以免何sir再起疑心。我又多口問細賢一句，除了情報科的朋友外，警署裡還有沒有其他熟人，細賢說有一個做EU的朋友，是學堂的同期，理論上此人是信得過的。
我：「我哋依家得兩條友 如果遇到危險 我哋都自身難保 如果有人back up會好啲 我唔知咁樣諗啱唔啱」
細賢：「啱 我會單聲俾佢聽 冇問題」
※※※※※※※※※※
決定了就要做到最好……
為了測試「迷魂氣體」的存在，根據細賢的計劃，我們要先將間諜app裝在旺叔的電話內。我問了豪仔，他說可幫我預備那個app，但要我親手在旺叔的電話上安裝。豪仔知道我和細賢在查案，也顯得很有興趣，還和我一同研究怎樣在旺叔電話入面裝app。
就在某一個晚上，晚飯後我返回富耀大廈，當時旺叔如常坐在座頭。我煞有介事地衝向旺叔那處。
我：「仆街喇旺叔，我頭先見到老鼠呀！」
旺叔：「唔使緊張，你喺邊度見到？」
我：「後巷呀，我離遠見到有四五隻老鼠呀。屌，唔係咁撚多吓話！」
旺叔：「我出去同你睇睇！」
旺叔和我一同離開大堂，走進後巷位置。
我：「就係呢度喇！」我指向我見到老鼠的位置。
旺叔：「我依家就唔見有。我睇睇附近個老鼠籠先。」
旺叔在附近揭起了一塊帆布，入面有一個老鼠籠，察看之下真的有一隻被夾的老鼠，還在掙扎著。
我：「屌，好核突呀，我都話有㗎啦，頭先我仲見到起碼有四五隻，其他應該已經走晒，話唔定會爬上嚟我哋座大廈。」
旺叔：「唔怕，我陣間即刻喺每層加返啲老鼠藥，冇事嘅，唔好生人唔生膽。」
我：「我聽過啲街坊講，以前呢座大廈有過鼠患，攪咗好耐先攪得掂。我唔想再嚟一次呀，我好驚老鼠。」
旺叔：「得啦，等我攪掂呢壇嘢先。」
旺叔要處理老鼠籠，要先為老鼠籠拍照，以紀錄在案。他拿出自己的手機，拍下老鼠籠。