《六樓B室》: 第二十八章 成功達陣
第二十八章 成功達陣
突然，身後有一名男子經過，不小心撞向旺叔。旺叔冷不提防，手中的電話被撞跌，丢在地上。該男子講了一句不好意思，就似趕時間的急急腳走人。
旺叔：「屌，睇路啦盲毛！」我都是第一次聽他爆粗。
旺叔拾起了電話，發覺電話螢幕已爆，但仍操作到。他無奈地跟我返回大堂的座頭位置。
我：「旺叔，都係我累到你跌爆芒，不如我搵人幫你整返好佢。」
旺叔：「唔使，我去斜對面信記整得㗎喇！」
我：「信記信唔過，我上次又係爆mon，佢收貴我足足一倍有多，唔係我嗰陣趕住要用，佢又肯即刻幫我換到嘅話，我都唔會幫襯。我介紹你去偉強整，近紅磡嗰邊，我有朋友喺嗰度整過電話，人又好老實，價錢又公道。」
旺叔：「咁你俾個地址我啦，我聽日去整。」
我：「我上網搵一搵佢地址電話先。」
我拿出我的手機，在旺叔面前搜尋google「紅磡 偉強 手機」。不幸地，我的手機剛巧無電。於是我很自然地借旺叔的手機去搜尋，在旺叔面前google一下，成功找到「偉強手機維修」的地址和電話。
我：「由呢度行去，十幾分鐘就行到。」
旺叔：「好。我要上去加老鼠藥喇，遲啲再講。」
旺叔到士多房取老鼠藥，而我就逕自回家。
Yeah，成功在旺叔電話裝上間諜app！我和豪仔預先找一隻老鼠，放在老鼠籠內。然後我找旺叔，引他去後巷檢查老鼠籠，趁他拿出手機時，豪仔冷不提防將旺叔手上的手機撞跌，他的手機mon一定會爆。
之後游說旺叔去紅磡的「偉強手機維修」整機，在我的手機沒電的情況下，自然地用旺叔的手機搜尋，順利進入豪仔預先整好的網頁，間諜app隨即自動裝在旺叔電話裡面。
為甚麼要動用老鼠？預備老鼠也太麻煩了吧！但我覺得是值得，因為這樣做能增加旺叔相信因老鼠而誤觸紅外線的機會，從而減低旺叔在座頭看CCTV的可能性。當然，我們要多預備一隻死老鼠，到時放在六樓後樓梯位置，旺叔發現後會更相信是老鼠觸碰到紅外線。
※※※※※※※※※※
好，一齊準備就緒，是時候要勇闖六樓。心情難免有點緊張，但在豪仔的配合下，應該不會輕易被識破吧！
我們三人約定今日中午，也是旺叔正在睡覺的時候下手。
我們要先確認標叔去了巡樓，一般他會由八樓開始巡，一直向下巡，直至返回地下，之後他一定會出後巷食兩支煙，才返回座頭。我們要在標叔巡樓經過六樓之後、食煙後返回座頭之前，要完成所有行動，以免被標叔從座頭的CCTV看到有人進入六樓。
我和細賢從八樓、沿後樓梯到達六樓的防火門前。我立刻傳信息給在我家中的豪仔，可以開始控制旺叔的電話。
我們再次確定樓梯上下都沒有人之後，便小心翼翼地戴上防毒面罩。當聽到細賢的一聲「Go」，我們便推開防火門，進入六樓走廊範圍。
我感覺到……我感覺到……無比舒暢，完全沒有頭暈眼花的感覺。媽，我們成功了！
細賢之前和我協議過，我們起碼要在六樓走廊位置逗留二十秒，之後無論如何，都要離開六樓範圍。當我見到細賢的手勢，倒數「三、二、一」，我們立刻沿防火門離開，放下死老鼠在六樓後樓梯位置後，便快速地沿樓梯上八樓，先回家再算。
※※※※※※※※※※
回家後，我大嗌一聲：「Yeah！」，細賢也非常高興。現在我們証明到，六樓令人頭暈眼花、產生幻覺的力量，其實就是不明的迷魂氣體。
細賢立刻問豪仔，旺叔剛才有否使用過電話，豪仔說有，這就証明六樓真的安置了類似紅外線的裝置。旺叔的日常生活很規律，中午時份一定處於熟睡階段。他突然使用手機，一定是收到警報系統才會醒來，並開手機查看六樓閉路電視的影像。
豪仔也順利將旺叔見到的影像，換成我們預設的畫面。如果旺叔相信富耀大廈開始有鼠患，就算收到警報，他查看六樓閉路電視的影像，發覺沒有人闖入，便會懷疑是有老鼠經過。如果最終他發現了後樓梯有死老鼠，即表示真的有老鼠經過六樓，誤觸紅外線，釋放了迷魂氣體，導致老鼠死亡。那麼，旺叔就不會再煞有介事地重看六樓的閉路電視。
※※※※※※※※※※
富耀大廈六樓的秘密，我們又接近了一步。下一步要怎樣做呢？真的要硬闖？幸好，好消息一個接一個，令我們對前路更加清晰……
細賢的情報科朋友，回覆細賢說，利智傑最近去私人會所和其他富二代的聚會，去得愈來愈密，試過一星期兩次，每次都最少四至五個小時。每次大家都低調地進入會所，但高調地離開，大家都顯得非常開心。情報科朋友試過跟蹤過其中一個單獨離開的富二代，他滿身酒氣，還不小心丟了一包藥。
細賢：「我哋拎咗包藥去化驗，我估兩三日後就有結果。你覺得包藥會係啲咩？」
我：「毒品！富二代嘅聚會，越開越密，每次都異常興奮咁離開，仲唔係集體take嘢！」
細賢：「係，事情開始明朗化。如果係利仲謀或者利智傑指使旺叔，睇住6樓B室，咁入面好有可能係收埋毒品。」
我：「啱，係藏毒嘅地方。如果我哋成功搗破呢個藏毒嘅地方，你就可以升職加薪，我就可以明留青史喇！」
細賢：「發夢唔好咁早。如果我係利智傑，生意牽涉到毒品嘅話，依家講緊嘅係正當生意人撈偏喎，有冇咁容易俾我哋發現到呀？我寧願揀工廈，或者村屋做貨倉啦，並且長期有人喺裡面把守。無理由派個保安喺外圍睇住咁低嘅保安意識。」
我：「可能利智傑佢深信『最危險嘅地方就係最安全嘅地方』呢個定律呢！」
細賢：「等埋個化驗結果出嚟先決定要點做先啦，呢幾日你都攰喇，休息下，唔好諗咁多喇！」
就在此時，我的手機響起鈴聲，原來是Hailey打來。我將手機螢幕展示給細賢看。
細賢：「聽啦，你唔可以避。」
我按下接聽鍵。
我：「喂，Hailey！」
Hailey︰「阿傑！」
我：「搵我咩事呀？」
Hailey︰「我……我有啲嘢想同你講，想約你出嚟同你講。」
我：「唔使喇，你俾我再冷靜下先啦！」
Hailey︰「我約你出嚟，係想講關於富耀大廈嘅嘢俾你聽。你可以約埋細賢一齊嚟聽。」
我：「好，今晚你得唔得閒？」
Hailey︰「今晚八點，喺你屋企附近嗰個公園仔等啦！」
我：「好，到時見。」
※※※※※※※※※※
吃過晚飯後，我和細賢準時到公園赴約。當時公園沒有其他人，只有Hailey一個在等待著我們。
Hailey︰「好開心你哋嚟見我！」
我：「Hailey，你想同我哋講咩？」
Hailey︰「我想講，我一直都呃緊你哋，對唔住！」