《六樓B室》: 特別篇 - Hazel視角 (七)
特別篇 - Hazel視角 (七)
※※※※※時間線 - 第二十六章※※※※※
雖然已經跟阿傑表白，我們仍然是朋友關係，心情也輕鬆不少。可是，我心裡仍然經常記掛著阿傑，無時無刻都想起他。幸好最近接了很多訂單，繁忙的工作減輕了我對阿傑的思念之情。
今天只有兩個蛋糕訂單，下午一時多已完成。我準備將廚房的垃圾放去後樓梯，就在我開門之際，我看見阿傑，站在我的門口。
我︰「嚇死我咩！好彩日光日白者。你搵我？」
阿傑心裡有鬼地說：「唔……唔係呀！」
我︰「仲以為你搵我添！咁你落嚟三樓做乜呀？仲要鬼鬼鼠鼠。」
他尷尬地以笑遮醜。
阿傑：「咁，我可唔可以入嚟坐一陣呀？」
我︰「好啦。」
※※※※※※※※※※
我沖了咖啡給阿傑。
阿傑的神情很古怪。我認識他已有三個月，說長不長，說短不短，但從未試過見他這樣。他又古古怪怪，無端端在三樓出現，但又不是找我。
阿傑：「唉，好苦惱，唔知點講。我唔知點樣解釋我點解喺你門口，我唔講得俾你知，sorry！」
我︰「唔講得就唔使講啦，你唔使同我解釋。」
阿傑：「多謝你。」
他心裡很苦惱，我無謂再追問下去。我現在又沒事做，就當陪陪他，希望能舒解一下他的煩惱。
阿傑：「痴纏男有冇再搵你呀？如果仲有，你要同我講喎！」
我︰「冇喇，上次你做得實在太好。」
阿傑：「咁就好喇！」
我︰「咁你呢？你同你鍾意嘅人最尾有冇喺埋一齊？」
阿傑：「有，我哋已經拍緊拖，但我好迷惘。」
我︰「你又苦惱，又迷惘，我幫你唔到喎！」
阿傑：「苦惱嘅嘢唔講得，迷惘嘅嘢可以講。我係同我鍾意嘅人拍緊拖，但我唔知佢係咪真心鍾意我！佢有太多嘢暪住我喇！」
其實我有些衝動，想對他說「條女隱瞞你咁多嘢，都係飛咗佢啦」，但我不可以這樣有私心地說這番話。
我︰「你同佢一齊開唔開心吖？」
阿傑：「開心，好開心。」
我︰「咁你想唔想冇咗佢？」
阿傑：「唔想呀！」
我︰「如果佢呃你係有苦衷，你會唔會原諒佢？」
阿傑：「會。」
我︰「你咁在乎呢段感情，如果我係你，我會同佢攪清楚成件事先。你由得佢唔理，心裡面有條刺，之後一定唔會開心。」
阿傑：「明白。」
我真的不敢相信，我還能客觀地對他說出這番話。
既然阿傑有那麼多的煩惱，不如和他玩一個魔術，看看能否令他開心。這個魔術是我最近在一次朋友聚會中學會的，非常簡單，希望不會一下子被識破吧。
我︰「唔好諗咁多嘢喇。我最近學咗一個魔術，等我玩俾你睇啦！」
阿傑：「好呀！」
我取出了一張正方形的紙，然後平均分成九份，再隨意取其中一張，叫他寫上他的幸運號碼。然後再叫他在其餘八張紙隨意寫上不同的號碼，之後反轉放在枱面，我說我會找到他的幸運號碼。
阿傑：「有冇可能估得到呀？」
我：「你唔好理我吖！嗱，睇吓我揀唔揀得中你嘅幸運號碼先！」
我拿起其中一張紙，揭開來看，是「12」。
我：「係唔係呢張呀？你嘅幸運號碼係「12」，係唔係？」
阿傑：「吓，點解你估到係呢張嘅？點解嘅？好勁呀！」
我：「哈哈，你唔好吳若A上身啦！哈哈！」
他好像已知原理，但他仍浮誇地問魔術怎樣玩，我就順應他意，向他解釋一次。
阿傑：「咦，係喎，原來咁簡單！Hazel，好多謝你呀，你氹得我好開心，頭先啲苦惱嘢、迷惘嘢都唔記得晒喇！」
我︰「你開心就好喇！」
阿傑在他自己仍很苦惱的情況之下，仍然非常在意我的感受。我真的很感激他。
※※※※※時間線 - 第二十九章※※※※※
我相信，隨著時間的過去，我對阿傑的掛念會逐漸減退，奈何我暫時辦不到。究竟我需要多少時間，才能完全熄滅我對他的愛慕？
今日，是最近少有的零訂單日，就讓自己休息一下吧！我正準備外出吃早餐，就收到阿傑的來電。
我：「喂，阿傑！」
阿傑：「Hazel，你……你依家得唔得……閒呀？」
我：「得，做咩呀？你把聲咁嘅，你病咗呀？」
阿傑：「係……係呀，我……我依家好唔舒服，你可唔……可以幫我買啲嘢食上嚟俾我……我食呀！唔該你！」
我：「好，你等我！」
我心想：「你做乜病咗唔搵你女朋友，係要搵我幫手！」可能我住得近掛。
我立即落街買早餐，買二人份，一份自己食，一份給阿傑。
我按阿傑屋企門鐘，等了二十秒他才應門。他開了門之後，立即攤在梳化，一動不動。
我摸摸他額頭，很熱，發燒。病到咁，好彩我醒，戴了口罩。
我︰「睇你個樣就死得咯！」
阿傑：「未死得住。」
我立即扶阿傑起身，一起食早餐。我見他吃了幾口，之後就沒有胃口再食。
我︰「冇得唔食呀，食多幾啖，之後食藥。」
幸好，他肯聽我的話，吃多幾口，再吃了退燒藥。
阿傑：「Hazel，多謝你，你真係好。我頂唔順要瞓多陣喇，你自便喇。到我好番嗰陣再請你食飯。」
之後他自己返回房間。他沒有關門，我見他一撻落床就睡著了。他真的很病。
我在阿傑屋企吃完我自己的早餐後，本來想離開，但我見阿傑發燒，想待他睡醒後陪他看醫生。他的女朋友可能有事要做，沒空陪他，所以才找我。就由我頂替一回吧！
沒事好做，我周圍參觀一下。阿傑的家沒有特別，基本上就是甚麼也沒有。跟之前看到的一樣，除了基本傢俬之外，沒有多餘雜物和擺設，非常簡約。
不過，跟上次我來的時候有些不同，就是客廳的某處牆壁上，貼了十數張照片。
在眾多照片當中，大部分都是他跟一個女仔的合照，我想她就是阿傑的女朋友吧！她很靚女，必定比我漂亮，身材也好過我。輸給這樣子的女仔，我也算是心服口服吧！
再細心看看其餘的相，有兩張是阿傑跟兩個不同的男仔合照，應是他的好朋友。再向右邊看，我發現有我的蹤影。對，這兩張是我和阿傑的合照，就是在我們唯一一次約會時所拍下的。
原來我真的在阿傑心目中佔了一席位。雖然不是女朋友，但也令我開心了一陣子。