特別篇 - Hazel視角 (八)

※※※※※時間線 - 第三十章※※※※※

可惜,真的只開心了一陣。我入阿傑的睡房,看看他睡成怎樣。誰知他發開口夢,不斷說著「欣欣」、「Hailey」,重重複複說了很多次。原來除了正印之外,他還有另外喜歡的人 (但唔係我囉)!

我很憤怒。他之前跟我講過,他懷疑女朋友隱瞞他很多事情。誰不知,他又有第二個心儀對象!他夠有嘢隱瞞女朋友啦!可能佢仲要係一腳搭兩船!

可惡,我竟然愛上了對愛情不忠之人!我真的有眼無珠。



我想離開,但又不忍心丟下這位病人。好,我等他醒來,再罵他一頓後才離開也不遲。

一直到下午三時多,他足足睡了數小時。

突然,我聽到「嘭」一聲,是由阿傑睡房內傳出。我立刻衝入房,看見阿傑跌了落地。我扶他起來。

我︰「咁大個人瞓覺都仲會碌落床,你真係叻喇!有冇撞親呀?」

阿傑:「冇事,我冇事,發惡夢者!」



我︰「我知吖,頭先我入嚟望過一下你,你發開口夢,聽到你講咩又『欣欣』呀又『Hailey』呀,你鍾意嘅人都幾多㗎喎,抵你發惡夢啦!」

阿傑:「我……你誤會我喇!我冇呀!我……」

我︰「你唔使解釋,我唔想知,你亦都冇義務同我講。既然你都醒咗,咁我走先喇!」

我轉身就走,返回自己屋企。

本來一個好好的假期,被阿傑狠狠糟蹋了!



※※※※※※※※※※

吃過晚飯後,想飲一杯暖水。我按下電熱水壺的出水掣,發覺水是凍的,原來電熱水壺壞了。我立即取出水煲煲水。

對於我來說,電熱水壺是必需品,見時間還未算晚,電器鋪應該未關,我等水滾後,便落街買新的電熱水壺。期間,我又再次想起負心漢阿傑。可唔可以唔好再諗起佢呀!

順利買了新電熱水壺,便立即回家。正當我出lift之際,我看見阿傑。我看到他眼濕濕,很緊張的樣子,更激動到握著我的手。

阿傑:「原來你唔喺屋企!快啲開門啦,水滾喇!」

我心想:「吓,我唔係熄咗爐喇咩!係喎,又好似冇熄到。」

我立即開門入屋,阿傑立刻衝進廚房,幫我關掉煤氣爐。

阿傑:「做乜煲緊水仲出街呀?」



我︰「我知道就唔出街啦,我以為我熄咗爐!」

阿傑:「你唔似咁大頭蝦喎?」

我︰「咪係因為你囉!」

阿傑:「關我咩事呀?」

我︰「我愛錯咗你呢個賤男囉,玩劈腿!攪到我今日心不在焉!」

阿傑:「冤枉呀大人!聽我解釋啦!」

我︰「都話唔使解釋咯,我又唔係你邊個!」



阿傑:「你喺我心目中係好重要㗎!」

阿傑望著我,我又望著他。他不似講大話,但他發開口夢時又不停喊著兩個女仔的名字,難怪我會這樣去想。

阿傑:「Hazel,之前我有啲嘢唔講得俾你知,但依家我可以講喇,你想唔想聽呀?」

我︰「你鍾意講咪講囉!」

之後,阿傑滔滔不絕地說起這四個多月來,他在富耀大廈所發生的事,也有提及過五年前所發生的五屍命案,以及他們對6B單位的調查。最重要的,是他提及了Hailey,即是他現在的女朋友。他說Hailey很像五年前死去的徐欣欣。

阿傑:「就係咁,你get唔get到,我一次過塞咁多嘢俾你。」

我︰「好亂呀!你竟然做緊咁多嘢,我初時仲以為你吹水,但係見你講得咁流暢,有紋有路。」

阿傑:「其實到頭來,我都唔知自己做緊啲乜。總之,呢座大廈嘅6B單位,除咗發生過五屍命案之外,我覺得仲係有其他陰謀。」



我︰「你懷疑Hailey就係徐欣欣?」

阿傑:「係,所以喺個惡夢裡面,我不斷叫『Hailey』同『欣欣』個名。咁你信唔信我呀?」

我︰「唔信你都唔得啦,你冇必要為咗澄清你自己冇劈腿而作個咁大嘅故仔。」

阿傑:「係呀,多謝你呀Hazel!」他笑逐顏開。

當阿傑知我相信他的說話,不再懷疑他劈腿之後,他立即顯露了笑容。我知道,他真的很在乎我的感受!

我︰「唔……你做乜咁在乎我嘅感受?」

阿傑:「係呀,唔知點解,我就係唔想你唔開心。你知唔知呀,頭先水滾嗰陣我以為你喺屋企,你知唔知我有幾緊張呀!」



的確,剛才我見他急到眼濕濕,生怕我會有危險,這些反應都不會是假。

我︰「知喇知喇,我見到。知你對我好喇,又知道你冇一腳踏兩船喇!」

阿傑:「咁我就放心喇!既然你原諒咗我,咁呢盒原本送俾你嘅咖啡膠囊就可以慳番喇!」他假裝收回送給我的禮物。

我︰「你就想呀,你又用唔著。」我當然不會讓他得逞。

我知道,現在的阿傑,確實非常苦惱。他問我究竟怎樣才可以証明到Hailey是、或者不是徐欣欣,我建議他找找以前見過徐欣欣的人,看看他們還記不記的徐欣欣的身上有何特徵,他也接納了我的建議。希望我也可以為他分擔一點煩惱吧!
已有 0 人追稿