［校園/歡喜冤家］火星撞地球,撞撞下就有火花㗎啦: 第八章「海洋公園？？」（下）

佢咁樣講我當場呆咗，因為睇佢上次嘅反應佢好似對呢樣嘢好反感

「我好熱吖我哋去企鵝館先啦」

之後佢就抿住我件衫向企鵝館方向進發，我估係人哋眼中一定以為我哋係情侶，入到企鵝館之後佢望到啲企鵝就衝咗埋去，雙眼發光咁。好似一個細路女咁...好得意...
我點可以咁諗㗎 ，佢係我兄弟鐘意嘅人嚟㗎...

「好啦 ，依家可以同你講啦，不過我有條件㗎！唔好再叫我余心玥」

「你係咪玩嘢呀，唔叫你個名咁叫你咩。 呀Moon？Moon Yu？定滿月」



「呀玥...叫我呀玥」


「得啦，呀玥你講得未」

「其實我唔接受黃浩輝嘅原因好簡單...因為鐘意佢嘅係呀袖...而我....」

跟住呢句佢諗咗好耐先繼續講



「而我有鍾意嘅人」

....聽到呢句其實有少少失落感，但係呢種失落感係源於我為黃浩輝覺得唔抵定係我覺得自己朋友比人搶咗唔開心呢？不過呢啲個人嘅感受就由得佢啦

「咁點解麥芷悠鐘意佢，你仲要喺黃浩輝身邊，你又唔係唔知佢鐘意....」

「係，我知。不過我諗黃同學誤會咗啲嘢...
所以我要揾個時機令佢明白同接受個真相。而且....呀袖唔會主動埋佢身，如果我同黃同學反咗面咁佢兩個就冇㗎啦...」

「咁點解你第一日要同嗰個男仔做場戲？」



「因為我想婉轉啲話畀佢知，我哋無可能...如果佢自己發現咗，咁或者佢就會接受到。但係嗰日有個少少嘅意外....」

「個意外係....我？」

佢冇出到聲只係輕微咁點咗下頭，原來一開始我真係誤會咗佢個人....仲要搞禍咗佢set好嘅嘢...唔怪得佢一開始咁唔鐘意我

「不過唔緊要啦， 反正依家咪幾好，佢兩個依家仲一齊玩添，而且....我仲識到你」

唔知點解 ...係呢一刻我覺得眼前呢個女仔好得意，唔想呢個女仔所到任何嘅傷害，想保護佢，唔通呢啲就係朋友？日落嘅餘光照喺佢塊面上，眼入面折射咗太陽嘅光....日落？日落喇？！！！

「係喎...顧住傾計唔記得咗要做啲任務」

「今次幣啦冇做過啲任務添...」



我哋嘅目光啱啱好對上 ，然後大家又一齊笑，如果外人呢個畫面一定好靚，好似偶像劇內容咁，但係呢個畫面比一個電話破壞咗

「喂？呀男？我哋依家喺企鵝館出面吖，行緊落嚟㗎啦！」

「唔...唔係呀，係...係呀袖唔見咗！」

「咩話？？？？」

佢眼神充滿咗恐惧，成個身震晒。頭先因為太陽而發光嘅雙眼依家得番空洞....我諗住捉住佢隻手，結果佢啲眼淚湧晒出嚟

「咩事呀...唔好喊先啦」

「呀袖...呀袖出咗事...」

「我....」我真係唔知點安慰佢， 唯有拉住佢隻手，希望佢冇咁驚



「我哋去同佢哋集合先啦」

如果...哈，如果我知之後會發生啲咁嘅嘢我就應該拉住呀玥兩個人去揾

「呀袖明明同你一齊㗎嘛，點解會咁㗎？」

「咁我唔想做任務呀嘛，佢又話自己一個冇問題我咪唔理佢。反正一開始我就淨係想同呀玥一組」

「你點可以咁仆街㗎？黃浩輝你咩人嚟㗎」

「我仆街？點夠你梁學男嚟...」

...



啪

....

「賤格」

佢一下打落黃浩輝塊面到，個聲大到同過山車啲尖叫有得揮，佢對眼已經紅到成魔咁。

「呀玥...」

「你唔好叫我呀玥，你冇資格」

...

「呀袖有心臟病㗎....求下你哋一定要揾番佢...」



黃浩輝聽到呢樣嘢嘅時候，第一眼係有震驚嘅 ，不過之後唔知係咪因為面子又扮到好似毫不在意咁
之後見到前面有一大班人圍住中間嗰個女仔....係麥芷悠？

「呀袖！」

「呀袖你冇事呀嘛...要唔要去醫院？食咗心臟病啲藥未？」

「冇事呀傻妹，係個太陽曬到我有啲暈」

「你係佢朋友呀？我係呢到嘅職員我姓黃，以後呢你同佢出街唔好再分散啦 ，一個女仔又有心臟病咁好危險㗎」

「如果唔係黃浩輝個衰人你都唔會有事...」

「唔慣呀輝事㗎，係我自己夾硬嚟」

「等陣，唔好意思呀你哋係莊記嘅學生？」

「家....家姐」

「黃浩輝你個衰仔，抌低人哋一個女仔自己去咗邊」

哇，劇情咁峰迴路轉嘅，十足十人哋八點半啲師奶劇咁，睇少一陣都唔知佢噏乜
結果最後，呀玥因為送麥同學番屋企而梁學男就跟埋佢哋走，劉芷韻本身諗住繼續痴住佢個黃浩輝先生，結果因為佢dady mami急 call就走咗
而黃生因為要等佢家姐放工，所以我陪佢行到樂園閂門

「呀允吖..我哋好耐冇咁兩個人一齊行啦，係咪呀」

「上次應該都係細個喺長洲嗰時啦」

「我哋大家都變咗好多啦....」

係呀，變咗好多...以前嘅黃浩輝一定唔會就咁抌低一個女仔...更加唔會講啲咁嘅嘢

「係呢，你同呀玥...余同學好似friend咗好多」

「係呀，佢份人相處落都幾好...係呢其實我想問好耐，你係點鐘意余心玥㗎」

「其實...都唔係啲咩大事，應該係中四嗰陣，我有一場籃球比賽.....」

↓↓↓↓↓↓↓↓↓
「唉，又輸波...如果唔係隻腳唔聽使咪好，我真係冇用！」

「喂！呀輝，啱啱有個女仔比你， 喂ok喎，靚女嚟」

咩嚟㗎.....係一張紙？

「黃同學，你要加油呀！支袖子茶係比你㗎！輸咗唔緊要，下次又是一個新的你！
你是你本身的傳奇」

唔知點解，呢張紙令我又充滿咗動力....但係佢冇留處名喎...咦，有張八達通


「余心玥」
↑↑↑↑↑↑↑↑↑↑↑

「由嗰日開始，我就開始留意呢個女仔...」

「但係你咁講，你都係鐘意呢個寫紙嘅女仔啫，你有冇諗過佢可能唔係呀玥？」

「點可能啫，八達通都係佢㗎喎」

「咁如果係人哋借佢張八達通呢...？」

「冇可能」

「如 ...如果啫」

睇佢個樣，都知佢唔會接受呢個誤會㗎啦...
既然係咁都無謂拗落去，跟住我哋就落番山去熊貓館等黃浩輝家姐
因為之後第二日係國慶，所以我瞓到好晏先起身

估唔到咁快就到咗十月，聽人講十月係最好玩嘅月份，好多活動都安排喺呢個月，而且同新同學啱啱相處咗一個月關係會熟咗好多，靠班際比賽可以令大家嘅感情得以昇華。

到底係唔係呢？不過簡單咁講下我對佢哋依家嘅感覺，C班係一班廢柴同尖子集結一身嘅班所以人特別小，但係如果你話兩種極端會唔會唔夾，咁又唔會，所謂嘅尖子都係會上堂瞓覺，廢柴都好認真做筆記。上堂嘅時候大家仲會夾埋去玩老師，而且大家人都好好相處...總之我就幾鐘意C班啦！