［校園/歡喜冤家］火星撞地球,撞撞下就有火花㗎啦: 第九章「5C？？」

講下十月會有咩活動先，首先月頭會有個兩日一夜班際比賽，學校會租一個度假營比大家喺入面進行各種競賽，例如歌唱，籃球， 呢啲普通嘢。仲有啲估歌吖 UNO咁嘅遊戲比體藝同學術班鬥一番。其實學校都係想大家揾到歸屬感同埋自己嘅長處啫。之後月中就係運動會，月尾係萬聖節活動。
而且呢個月係各個學會嘅開始，即係我期待咗好耐嘅機械及工程學會終於可以學嘢啦！呢個十月真係好正！！！

...

「譚梓允你負責揾人啦」

「吓？我....？鍾sir你係咪搞錯咗啲咩？」

「梗係你啦，咁通我咩。加油啦ME隊長」



（ME係指Mechanical and Engineering，即係機械及工程）

「咁....咁呀...余心玥呢？」

「心玥咁多嘢做邊得閒陪你招人，你自己搞掂佢，再見！」

偏心！！！！！！

不過諗諗下又係嘅，呀玥係成個科技部隊長...而且佢又係話劇社副隊,呢啲嘢又點到佢



....？

「咁多位師弟妹有冇興趣入科技部吖？」

「呀玥...？你點解係到嘅」

「呀男話你好愁拉人呀嘛,咁我咪嚟陪你囉！
嗱，唔係關心你㗎，純粹係你煩到呀男咋。
而且我係隊長嚟㗎嘛！唔好會錯意呀！」



「我都冇話要你幫,你個話劇社呢？唔使理㗎啦」

「得㗎啦，呀冧話我阻住佢先叫我過嚟」

「挑，以為你係有心幫我添...」

「師姐！心玥師姐！隊長問你去咗邊你唔喺度佢唔夠人手吖」

「Er....呀冧又會無啦啦轉口嘅....呀梓允吖？你自己搞掂佢啦吓~」

挑,口不對心。但係其實我想佢留低多啲...唔通我都口不對心？點解會咁嘅....


「你！唔通你就係新嚟嗰個靚仔師兄！我一直都好留意你㗎~」



「哈...哈你好」

「喂！留個whatsApp吖~我叫莉莉呀~」

「電咩話呀!學校範圍內嚴禁使用電話呀！唔該師妹請回啦！」

「唔WhatsApp電話都得卦,借張紙嚟吖~」

「冇呀！啲紙冇晒啦！呢到係科技部，你個靚仔師兄可能係個淨係識對住部電腦嘅毒男，破壞你印象就無謂啦？」

「咩科技部咁巴閉啫，呢條仔有冇咁勁呀！你又係佢邊個呀,余師姐」

「有！因為佢係我嘅....隊員！仲有我嘅同學!總之你就請回啦！馬師妹」



見到眼前呢個明明矮我成個頭,但係又好出力咁保護我嘅女仔真係覺得佢好得意...好想摸下佢個頭...

「喂！你個巴渣妹唔係去咗幫話劇㗎咩？依家你又係到做咩....仲有...你真係咁諗我？毒男嗰part...」

「乜..乜..乜嘢...我咁啱番嚟拎番支筆咋嘛！見佢搞我擋口咪鬧佢，你咩事吖...死..毒男！」

佢番面仲紅過隔離園藝社啲番茄，乜要承認幫你朋友真係咁難咩？傻妹~

結果今次招生好成功，成個科技部總共有成90個成員,聽肥佬講上年呀玥冇嚟招生先得嗰60人。不過諗諗下其實呀玥都幾勁，一個中五生可以管理到咁多人，如果佢出嚟社會一定好勁。

話時話好似下個禮拜就係班際祭,真係好期待！

「吓！又我去打籃球？」

「咩又啫，咁我哋冇人識籃球吖嘛」



「但係我好廢㗎喎...」

「好過冇啦，得㗎啦，你打贏A班嘅黃浩輝就贏晒㗎啦」

「龍哥....臣妾！臣妾...」

呢位係龍哥，係我哋班嘅班會主席。佢只要一出聲就冇人敢博嘴，但係其實大家都知道佢係口硬心軟只要氹一氹...

「冇呀,今次冇得傾」

「唉,見你咁同你講樣嘢啦。今次班會有啦啦隊撐場，你個呀玥都會去」

呀玥...去跳舞？
~~~~~~~~~~~~~~~~~~~~~~~~~~~~~~~~~~~



「垃圾老廖！！！！！」

冇啦啦搞咩啦啦隊，方唔係見到A班有唔抵得何sir咩。

早知就交齊佢啲功課啦....

...

「心玥呀，你篇作文呢？」

「Er...嗰陣呢...我隔離屋隻狗呢...肚餓..就」

「得㗎啦,唔使講」

「廖老師！只要你願意，小女做牛做馬赴湯蹈火都得㗎」

「真係？咁你去啦啦隊啦」

...

F**k...
我手腳唔協調㗎，游水都就浸死..仲點跳舞

「點吖,呀Moon你點唔點」

「唔得呀....文文不如你比我走啦」

佢叫文文，係我哋班嘅副主席...出咗名善解人意...你比我走啦

「唔得吖，廖sir下咗旨一定要你喺到㗎,不過講個好消息比你聽啦，呀Sun去籃球比賽...」

「啱啱你話呢個位點轉話？」

~~~~~~~~~~~~~~~~~~~~~~~~~~~~~~~~~~~

雖然平時都有做開運動,但係今次都係第一次咁認真去練習,聽到樓上舞蹈室啲音樂聲...唔知係咪呀玥呢？

嗱！我唔係淨係卦住呀玥㗎...咁話晒佢係我哋班嘅一份子呀嘛

跟住過咗冇耐，有班女仔落咗嚟係劉芷韻佢哋

「喂！劉芷韻，呀玥呢？」

「佢仲喺上面吖，佢癡線㗎係咁重複跳完全唔休息」

結果我上到去,見到佢拉住副主席喺到跳舞。佢啲動作已經冇乜靈魂，而且係死用蠻力嚟撐住自己 ....見到佢咁我覺得自己要更加努力,話晒大家同樣代表C班

我隨手拎咗張memo紙,黐咗喺舞蹈室門口

［余心玥,我哋一齊加油］

....

估唔到話咁快就到咗呢一日,之前大家為咗呢日都付出咗好多努力，今日終於要展現出嚟啦！
成個比賽流程係咁,首先初賽係AE班對BD班先.至於我哋因為少人呢個劣勢,所以我哋可以唔使進行初賽。 咁樣可以留返啲力，一陣淨係要打大佬！

「真係好期待第一次同你哋呢班咁好嘅同學一齊吖！」←呀玥

「你上年唔係玩過啦咩？」

「唔係吖，我上年讀D 班㗎。今年先轉過嚟」←呀玥

「既然係咁就要好好享受下啦！」←龍哥

總之....

「5C加油！」

呢一刻呢個畫面真係好青春...