[靈異] [愛情] [我同條女敦倫外傳]我屋企養左隻女鬼...: 接放學

「屌睇你條毒撚都dry左好耐啦，仲唔撚想快啲搵返條女出pool咩，依家我幫你執好個look包你好快溝到女。」

「你放心喎，你陪唔到我咪算鳩數，我又唔係得你一個fd，你溝到女我鄧你條毒撚開心添啦。」

聽到呢番說話我心更痛，果然佢不斷推開我，我係佢眼中亦唔係矜貴嘅一個人，有冇我都冇所謂，即係我個look就算執得幾好都唔會得到你歡心？但世界咁大，我淨係想要你一個…

「孔樂兒！」

我忍唔住啦，我實在按捺唔住內心嘅情緒，我要爆啦！



「做咩？」

Chole姐一臉疑惑望住我。

「我…其實我…其實我鐘意…」

但到左危急關頭我又變得戰戰兢兢唔敢講出口，只知道我心跳得好快好緊張、手心都出晒汗。

「我鐘意呢套衫，我就買呢套啦。」



最後我都係唔敢講出口兜走左，覺得如果真係講左出黎俾佢拒絕會好柒，其次講完如果佢連朋友都唔想同我做咪仆街…

「哦，想買呢套衫咪講出聲囉，做咩變到咁撚緊張咁大反應。」

「屌我都話呢套衫啱你架啦，你都覺呢，你今日呢一下大翻身包你好快溝死女。」

我竟然咁簡單嘅一句說話都講唔出口，我真係冇膽、我正一廢柴。

「冇計啦，因為我實在太鐘意呢套衫我太興奮，估唔到可以咁文青，我一定可以好快溝到條女俾你睇，到時你唔好掛住我。」



我按捺住內心嘅痛講出呢一堆假話，其實只係想激下佢，但佢應該都唔會有咩反應，

睇黎我之後都只可以咁樣暗戀佢、默默為佢付出，但當講完後我眼框就冇啦啦湧出淚水。

「你做咩流眼淚？」

仆街俾Chole姐見到我喊添。

「冇…冇啊，我興奮得濟興奮到忍唔住流眼淚咋嘛，多謝你今日幫我大改造，我終於唔洗再做毒撚。」

「屌你有套新衫姐唔洗興奮到喊掛，同埋唔撚洗多謝我喎，咪當報答你教我功課。」

「不過講起靚衫，我啱先都睇中左件衫幾靚，頂但最撚衰我今日又帶唔夠錢出街買唔到，唉so鳩sad。」

「你鐘意邊件，我買埋俾你啦。」



只要你開心就好，我鐘意嘅係你，我唔買俾你唔通買俾其他人咩，我默默地付出就得。

「咁撚好，多謝晒喎。」

說罷我就同Chole姐行返去女裝嗰邊揀衫，佢顯得好雀躍，睇得出佢呢刻嘅興奮係發自內心嘅興奮而唔係假…

當我地大家都買完衫後，我就遮住佢一齊去搭車返屋企，期間遮住佢嗰邊多於我，所以我最後都係淋濕左的。

返到屋企後，我每次都會同阿盈分享返嗰日同Chole姐做過乜，當然我冇講我鐘意佢，然而佢知道chole姐今日突然喊總覺得佢有啲野收埋。
.
.
.
「今日放學可唔可以黎接我放學？」



又兩日過去，呢日我晏晝起身冇耐就收到Chole姐send俾我嘅wts叫我接佢放學，女神今日竟然主動邀請我接佢放學？身為暗戀佢嘅我感到一陣興奮。

「好啊 但點解今日咁突然想我接你？」

好奇之下我都想問下佢點解想我接。

「屌你唔好問啦 叫你黎接就黎接。」

當然佢都係冇答我，究竟點解佢會想我黎接佢？

「Ok 我晏啲黎接你。」

到左差唔多4點嘅時候，我獨自黎到佢學校門口等佢放學，我著住前日我買嗰套文青裝黎到呢度，心諗如果我係佢男朋友就好，

身為一個男朋友黎接佢會好有一種保護感，亦都會好有愛，可惜我咩都唔係，就只係佢嘅一個朋友。



冇耐裡面嘅鐘聲響起，學生逐漸地一個個行出校門，期間有啲女仔望住係門口隔離等候嘅我，

唔知係覺得我靚仔定見成條街得我一個係度等人覺得奇怪，總之有少少老尷。

再過左一陣，前方出現一個熟悉嘅身影，佢孭住一個粉紅色嘅書包、側邊扣住一個之前去迪士尼我買俾佢嘅豬仔公仔，正一搖一擺地行緊出黎，

但奇怪嘅係，後面仲尾隨住幾個女仔疑似不斷指責佢，Chole姐冇理佢地，我隱約聽到班女仔叫佢還錢。

「bb你到左啦？」

Chole姐一步出校門見到我就即刻感到好雀躍地撓住我隻手，佢…佢仲叫左我一聲bb？究竟咩事？我一時無言以對，而後面幾個女仔亦止住了腳步暫時冇再指責住。

「呢個係我男朋友，有咩問題你搵佢啦。」



佢…佢講咩話，我係佢男朋友？佢直接當左我係佢男朋友？係咪意料著我要出pool啦？我一時間變得好緊張。

「係…我係佢男朋友，你地幾個做咩係度指責佢？」

「唔係下話，你條臭雞幾時又冇啦啦多條仔？」

臭雞？其中一個女仔竟然話Chole姐係臭雞，我感到有少少嬲。

「你地講乜撚野呀，做咩話我條女係臭雞？」

因為佢地出言太無禮，一黎就聽到佢污辱Chole姐，所以我咩都冇理直接當左Chole姐係我女朋友，我立即躍身成一位護花使者。

「傻仔你唔係信佢真係當你係佢條仔下話，佢當你係兵咋，你俾條臭雞玩鳩左啦。」

另一個女仔接著駁我。

佢地講呢啲野真係好難聽，我內心亦有少少難受，兵？冇可能，佢對我咁好又幫我唧暗瘡又幫我試衫又剩，點會當我係兵，佢都會著緊我關心我架，只係我付出比佢多姐…