總之我唔信,你班女仔無非想離間我地姐,我唔會中你地計,Chole姐呢刻都開得口當我係佢男朋友仲點會係假!

「阿洋你唔好聽佢地亂講,我真係當你係我男朋友。」

Chole姐變得好陰聲細氣咁同我講,同平時惡死嘅佢完全唔同,呢一刻我已經俾佢對我嘅愛衝昏左頭腦,估唔到我會有機會真係做到佢男朋友,我內心裡心如鹿撞。

「係囉你地班八婆咪撚亂講喎,我不知幾愛我條女,你地做咩事係咁煩住我條女。」

呢刻嘅我全身充滿保護慾,我已經唔理咁多盡一切可能唔俾佢地接近Chole姐。



「佢呢刻當你係仔,轉過頭都可以當返你係隻兵咋,佢淨係會利用你,我地呢幾個本身都係佢好姊妹,之前見佢好慘咁問我地借錢所以借錢俾佢。」

「佢向我地逐個借,借完一次又一次,但之後有借冇還,次次叫佢還錢都話冇錢還淨係識得拖。」

「屌你冇錢還又去買名牌包包著新衫買新公仔?分明唔撚想還錢想拖數想賴帳啦條仆街。」

佢講到啲新衫同公仔,其實都係我買俾佢,根本唔係用佢嘅錢。

「拖數都不特止,最嬲係佢仲係度著到靚一靚咁姣埋我地條仔借錢,屌你如果唔係我地條仔講返俾我地聽,實俾呢條臭雞姣撚埋上床啦。」



「成撚日話自己幾慘幾慘,其實就姣撚到出晒汁,仲話好姊妹喎,好姊妹係佢眼中條仔都係攞黎俾佢執兩劑架咋。」

「正一犯眾憎,依家個個知道佢拖數唔還仲要周圍姣仔都已經個個疏遠佢同佢絕交。」

佢地你一句我一句不斷數Chole姐啲惡行出黎,聽完後真係刷新我三觀,乜平時我識Chole姐係咁衰咁姣架咩…?冇可能,佢一定唔係呢啲人、我唔信,當中一定有啲咩誤會。

「總之你條仆街今日一定要還錢啊,條數已經拖左好耐,我就700、Yuki就1500、Cherry就1400、Tracy就500,仲有我地條仔每個都幾舊。」

佢地講到言之鑿鑿咁,照咁講如果係真嘅話爭落接近5000蚊啦喎…對我地學生黎講都真係一個頗大嘅金額。



「係咪真架…?」

我驚訝地望住Chole姐反問一句。

「唔係真架,我冇姣佢地條仔,係佢地老作講衰我,同埋我邊撚度爭佢地咁多錢,假架。」

當佢對住我講緊野之時,我仔細留意佢個樣同身體後,我發覺佢塊臉瘀左兩撻、兩隻手亦有唔同大小嘅瘀痕,咁多瘀傷一定係俾人打到咁,邊個咁大膽將你打到咁?

「咦,點解你塊臉同手瘀晒,邊個搞成你咁?」

「咪…咪佢地打鳩到我咁,佢地係學校迫我還錢。」

身為以前俾人恰嘅我,我聽到後心中十分氣憤,我明白俾人恰有咩感受,佢地為左叫Chole姐還錢竟然打到佢咁?

還錢姐,洗唔洗郁手郁腳,咁同欺凌有咩分別、同我以前又有咩分別?仲要身邊嘅係我一個重要嘅人,佢地竟然敢打到我條女瘀晒…



「喂你唔好老屈我地喎,我地幾時有打過你,今朝返黎你已經瘀晒。」

「你唔好諗住屈鳩我地唔還錢喎,總之今日你一定要還錢,呢條數已經拖左好耐架啦,你唔好諗住繼續拖。」

呢刻嘅我已經俾怒火衝昏左頭腦,咩說話都聽唔入耳,淨係凝住佢地將我條女打到咁傷,成班人圍住一個打好開心?

「你老味我地家下就唔還呀你吹咩,你地打我條女在先就係你地唔啱,點解仲要還俾你地,你不仁,我地就不義!」

「同埋食屎啦你班八婆,依家我條女借到錢係佢嘅能力、係你地心甘情願借,還唔到都預撚左啦。」

「仲有好心你班豬扒照下你地塊鏡啦,你地條仔咁易俾人姣到借錢係因為你地柒唔夠吸引咋,用你地個豬腦諗下啦!」

我終於忍唔住我要爆啦,因為Chole姐俾佢地打到咁我已經理唔上咩欠債還錢天經地義呢啲道理,我呢刻淨係知我要屌柒佢地、我要保護Chole姐還返俾佢一個公道。



「乜撚野呀你兩條仆街,唔還錢仲大條道理咁屌柒人?仲要你同條臭雞夾埋唔還錢,你兩個正一狗男女。」

「咪撚理佢地我地走。」

說罷我就帶住Chole姐調頭準備離去。

「喂你地咪撚諗住走呀,你地還錢啊!」

然後佢地4個女仔見狀當然都即刻走上前追諗住抓住我地,但我唔打女仔,同女仔打交一定係佢地佔優,呢個時候唯有召喚一個「人」出黎幫我。

「周雪盈!」

我大叫一聲,Chole姐感到一下愕然地望住我,佢一定覺得好奇怪,佢已經第二次聽到我大叫呢個名。

冇耐阿盈就出現左係我面前,正當佢地就黎抓住我地之時,阿盈見狀亦知咩事,佢隨即走到我身後。



「你班仆街走乜撚野,還錢啦…」

說罷下一秒阿盈伸直雙手做出一個推開佢地嘅姿勢,然後周圍就好似形成左一道強大嘅氣場咁將佢地紛紛向後推倒跌在地上。

「Chole姐,襯佢地跌低晒我地快啲跑返屋企。」

Chole姐見到身後嘅情況後感到不可思議地O晒嘴,一切都黎得太突然,佢一定唔知我咁勁有呢種能力,但要召喚到阿盈出黎幫手我都有少少覺得自己冇乜用。

「你啱先做咩黎…?點解你講左個名之後佢地會跌晒落地下?」

「你唔好理我啦,我地依家快啲返屋企先,費時佢地追上。」

當然佢地係唔會追上,因為阿盈會係後面保護住我地,我就咁拖住Chole姐隻手跑住帶住佢返屋企、好浪漫好有愛,第一次拖住佢隻手嘅我,我個心簡直溶化了…