「好啦我唔問咁多,作為朋友你放學我會繼續好好保護你。」

「嗯多謝你,如果冇咩事嘅你走先啦,我晏啲要出去。」

佢又出去?究竟晚晚出去做咩?返part time?出去玩?一切我都無從得知,因為我並冇資格理咁多。

「你唔洗我教功課咩?」

如果可以的話,我想盡可能係度陪你耐啲、唔想同你分開,只要見到你我都會開心,儘管只係可以見多你一分鐘。





「依家都考晒試啦,仲有乜撚功課洗你教,你走先啦,遲下有需要自然會搵你。」

結果連教功課呢個藉口都冇埋,果然係用完即棄,好掛住以前教功課同你一齊搏鬥嘅日子,依家只能夠思念,唔可以再有得長時間咁陪住佢。

「好啦咁我走先,唔阻你。」

「咪住先!」

正當我準備離去,Chole姐突然叫停左我,係咪想我留係度陪佢了?





「走之前你可唔可借一舊水俾我,我急用。」

原來係想問我借錢而已,係我諗多左。

「冇問題,一舊水姐,你拎去洗啦。」

說罷我就好爽快地係銀包拎左100蚊俾佢,救急扶危嘛,應該嘅…

喀啦喀啦~





好快我拉開鐵閘返到自己屋企,而阿盈見到我返黎第一時間過黎八卦我頭先接放學嘅事。

「阿洋你終於返黎啦,Wow~我見到你頭先同佢拖晒手咁英雄救美喎,你地進展都幾快,仲話冇鐘意人?」

平時八卦新聞又唔見你睇,依家我一返到黎就淨係八卦我。

「唉我認啦,我認我的確不知不覺咁鐘意左佢,其實由第一日去佢屋企開始已經有少少俾佢吸引住。」

「都估到你對人有野,平時咁著緊佢又咁肯幫佢,係你死口唔認咋嘛。」

我唔認,係因為我自己都唔知原來我已經鐘意左佢,鐘意一個人真係可以好突然。

「但你點解睇落好似好失望咁,你地唔係一齊左啦咩?」

阿盈知嘅野實在太少啦,我一直都冇同佢講過對Chole姐嘅感受。





「我同佢冇一齊,佢亦唔知我鐘意佢,佢當我係男朋友都係假,一切都只係一場戲,現實中我都只係佢嘅一個朋友,全部都係假架。」

我呢個時候終於可以抒發自己感受出黎,所以有少許激動。

「不過都要多謝你頭先救左我地,唔係你出現佢地一定會繼續追住我地。」

「洗咩多謝,你叫得我出黎見你有危險一定幫你架啦。」

「原來我頭先見到嘅只係煙幕,但你對佢付出咁多,佢就只係不斷利用你搵你著數,我覺得…我覺得佢似當你係兵。」

「兵?點會係兵?冇可能!佢係真係有事先搵我幫手,而我只係出於朋友嘅義氣咁去幫佢…係囉我地朋友黎嘛,佢一定係當我好朋友所以先不斷搵我幫手,一定係咁。」

「佢有時仲會對我好好架,幫我襯衫又幫我唧暗瘡,試問佢如果真係當我兵又點會幫我做埋啲咁核突嘅野,佢都有關心過我…」





正當我辨解緊嗰陣,種種佢點樣不斷利用我搵我著數嘅畫面截住左我呢個正面嘅想法,的確佢又真係對我冇付出過任何野,就只有我一個不斷付出…

但我絕對唔會接受呢個事實,Chole姐又點會咁樣對我,佢一定係當我朋友先咁放心係咁搵我幫手,咁朋友間自然都唔會計較咁多架啦。

「你係因為出於愛佢先咁著緊佢、一直幫佢為佢付出,但冇諗過佢竟然當你係兵、佢只係利用你,你一時接受唔到係正常架,因為你自己都未過到自己嗰關去面對。」

雖然佢地大家都係女人,理應佢最明白女人係點諗,但我呢次都唔能夠buy佢。

「冇可能…佢明明同我咁close點會當我係兵,佢唔係啲會收兵嘅人,我唔信!你當初都話佢心地好架唔係咩?」

「對唔住…睇黎我應該睇錯人,當初我覺得佢好係因為表裡不一,表面佢流露真性情好爽快應該好多fd,但內心就偏偏存在著一絲寂寞。」

「理應應該會珍惜朋友同重感情,但佢依家根本唔係咁,佢淨係識去利用人、拎著數,一啲都唔見佢珍惜。」

「所以我當初應該感受錯,佢嗰絲寂寞可以係因為屋企得佢一個住先有,並唔係啲咩大事。」





呢刻嘅阿盈竟然都覺得Chole姐係唔好,就連佢以前支持佢係好嘅說話都收返,究竟佢係咪真係咁衰…?

「冇可能架,唔通佢當初點都要同我做朋友就係為收兵?點解會咁…」

聽到連阿盈都唔再buy佢之後,我諗返一直以黎同佢做過嘅事,諗諗下眼框中又流露出一絲淚光。

「雖然係咁,但頭先我出黎幫你嗰陣我留意到啲野,係關於佢嘅野。」

「係咩野?」

當我一聽到係關於佢嘅野後,我就好似充滿希望咁目光專注望住阿盈。

「我本來唔想講俾你聽架,但見你喊晒咁都唔忍心唔講俾你聽。」





「嗯?」

「就係頭先我出黎見你拖住走嗰陣,我感受到佢內心有一種憂傷嘅感覺。」

「憂傷嘅感覺?明明頭先同佢擺脫左班女仔應該係開心至係,又何來憂傷?佢一定有野收埋!我就知道佢冇你諗嘅咁衰。」

我聽到呢個好消息後,我心情猶如撥去雲霧見青天,終於見返啲希望,我就知道佢冇咁衰,佢一定係有啲咩苦衷同困難先不斷搵我幫手,並唔係收兵。

「睇下你即刻開心到,都唔知佢係咪真係有野收埋先咁。」

「咁究竟你今日搞咩俾成班女仔追住你地?」

阿盈終於問起關於今日嘅野,然後我一五一十咁講晒俾佢聽…
已有 0 人追稿