[靈異] [愛情] [我同條女敦倫外傳]我屋企養左隻女鬼...: 戲假成真

跑到返佢屋企後，我倆都喘晒氣，估唔到我會同佢會經歷到一啲類似俾人追殺嘅情景。

「好彩我地跑得快佢地冇追到上黎。」

「究竟你頭先係點撚樣做到，你係咪召喚左啲咩野出黎？」

乜佢咁八卦架，依家又再問返我頭先所做嘅事，不過關於阿盈嘅事我都係唔好俾咁多人知為妙，更何況Chole姐佢唔信鬼嘅講出黎咪得啖笑。

「你唔好理啦，最緊要我地可以平安返到黎，你依家塊臉瘀左，等我去濕啲熱水幫你敷下塊臉啦。」



說罷我就立即動身前往浴室拎毛巾，盡我呢個做男朋友嘅責任。

「唔洗啦，呢啲野我自己理。」

正當我準備動身之際，Chole姐抓住我隻手停住左我動作。

「多謝你頭先救左我，你啲演技真係好鬼好，演男朋友呢個角色演得似模似樣。」

「由其你屌柒佢地嗰陣，個表情同神緒發揮得淋漓盡致，仲要好霸道咁講到唔還錢都係應該，你真係好撚正囉。」



演男朋友？即係頭先只係扮佢男朋友？佢同我講嘅野全部都係假…？呢一刻嘅我心情由本身好甜蜜去到依家碎到一地都係、心痛欲絕，咁算唔算俾佢玩感情？

「呢一切都係演戲？」

「係啊，好彩你黎到之後肯配合我做戲先可以呃過班八婆，仲救埋我走，有你呢個朋友真係唔撚話得。」

佢叫我接佢放學嘅目的就只係為幫佢脫困？就只有咁多…？朋友…我做咁多野為你付出咁多就只係得到一個咁普通嘅名銜——朋友。

唔通頭先就只有我一個咁傻當真去做佢男朋友？我仲因為佢發左一次脾氣屌柒班八婆、我仲好瀟灑咁拖住佢走，



最重要係我第一次聽到佢親口同我講當我係男朋友，知唔知我嗰一刻有幾開心，點知原來一切都係假，瞬間由天堂將我掉返落地下、咩希望都冇晒…

唔會架…唔會係咁，呢個結果唔應該係咁…未己我忍唔住流下眼淚。

「你做咩喊？你唔會以為係真下話？」

冇錯，我真係咁傻地當左係真，我好想我真係你男朋友，我所展現嘅情緒都係發自內心，並非演技。

「緊…緊係唔會啦，我又點會鐘意你呢啲爛口妹，我係第一次聽到你識多謝我感動咋。」

心裡很誠實，口裡卻說不，我繼續用藉口避開我內心真實嘅感受。

「多句謝姐，洗唔洗咁感動，我份人就好公道嘅，你對我好，我就會多謝你；你對我差，我自然就屌柒你。」

我要振作，呢一切都唔可以怪佢，因為都係我心甘情願，邊個叫我咁傻明知佢呢個mk妹冇幾何認真仲咁易信左佢，佢又點會鐘意我，



呢啲咪叫條路自己揀仆街唔好喊，依家我喊都係應得，或者一直以黎都只係我嘅一廂情願。

「知你公道啦，所以你依家係咪要頒個獎表揚下我？」

我抹過眼淚後，繼續用返朋友嘅身份對佢。

「獎就冇啦，一巴掌你要唔要？」

「哇話晒我都救左你，乜你咁樣對你嘅恩人，因住俾雷劈。」

「你就俾雷劈，我不知幾撚福大命大。」

「不過經過今日先知原來你咁撚勁，有你係度我先可以得以解困，你之後可唔可以都黎接我放學？有你係度佢地之後放學就唔敢再煩住我。」



Chole姐突然叫我之後都叫我接佢放學，係咪即係覺得我俾到佢安全感？唔好亂諗啦，我只係好似朋友咁幫佢，

雖然佢唔鐘意我，但一諗到我可以繼續扮佢男朋友其實都開心、起碼我仲可以同佢有短暫親密嘅接觸，就用呢個麻藥暫時麻醉一下我心痛嘅內心吧…

「好啊，你係學校都要小心。」

「呢一層你同我定，我自己會小心。」

「你可唔可以同我講真話？其實你係咪真係爭佢地咁多錢？你又係咪真係有姣佢地條仔…？」

「屌你我緊係冇啦，你聽佢地廢up？錢方面我確實有爭佢地嘅，但冇咁撚多囉，佢地班仆街特登作咁多出黎想食多我一道錢姐，佢地諗乜我仲唔知咩。」

「仔方面我就緊係冇姣啦，佢地又唔係靚仔又唔係有錢仔姣佢地做乜鳩，佢地無非都係想屈鳩我。」

然後Chole姐好確鑿咁向我辨解，聽落唔似係假。



「不過話晒你都係爭佢地錢，多與少都還左俾佢地先啦。」

「你條撚樣頭先唔係好串咁同佢地講唔洗還架咩，做咩依家就掉撚轉晒槍頭。」

講返頭先班女仔叫佢還錢，Chole姐語氣變到少許激動。

「我頭先扮緊野，你又俾佢地打完黎，緊係要激動啲嚇走佢地先，但冷靜落黎諗，欠債還錢，真係天經地義。」

「得啦，呢層你唔撚洗理，錢方面我自會還，你做好你自己本分接我得啦。」

然後Chole姐一如既往咁叫我收皮。

「好啦我相信你，如果你遲下有需要嘅就問我借啦。」



「得啦，錢老娘我多的是，我會還唔起呢少少錢？」

「知你勁啦，唔洗係度曬自己有幾有米嘅，你還左佢地應該就唔會成日煩住你。」

「話說佢地話以前同你係好姊妹，你地真係好姊妹？」

「以前係，不過依家同佢地反撚左面啦，就因為呢少少錢。」

「你咪撚理咁多啦，都係嗰句，你做好你份內事就得。」

呢刻嘅Chole姐就好似當正我係下人咁吩咐，感覺我地始終有一段距離，佢有野收埋都唔想俾我知，猶如一個既陌生又普通嘅朋友，我就只係佢嘅工具，需要時先會拎出黎用。